მსოფლიოს რეიტინგები ძიუდოში: ჩინურმა მასტერსმა რეიტინგში დაგვაწინაურა

ჩინურ გუანჯოუში ჩატარებული მსოფლიოს მასტერსის შემდეგ ძიუდოს საერთაშორისო ფედერაციამ მსოფლიოს ახალი რეიტინგი გამოაქვეყნა, რომელიც, ვიმედოვნებთ, უკვე სრულყოფილია, თუმცა თავს ვერ დავდებთ, რომ გარკვეული ხარვეზები ისევ არ იქნება.

რეიტინგი პერიოდულად ისედაც განიცდის ცვლილებებს, როცა ერთი წლის შედეგები ნახევრდება, ორი წლისა კი საერთოდ უქმდება, მაგრამ შეცდომებიც ხშირია ხოლმე, რასაც გზადაგზა ასწორებენ.

ახალ რეიტინგში ჩვენებს კიდევ უფრო მეტი წინსვლა აქვთ, რაც მასტერსზე კარგმა გამოსვლამ განაპირობა. შვიდი წონიდან ჩვენები ორში - 100-სა და მძიმეში კვლავაც ლიდერობენ, თუმცა ვალერი ლიპარტელიანიც (100) და გურამ თუშიშვილიც (+100) მასტერსზე გამარჯვების შემდეგ იმდენად მოსწყდნენ მდევრებს, სამიოდე მნიშვნელოვანი ტურნირიც რომ გამოტოვონ, პირველობას უჭიდავებლადაც შეინარჩუნებენ. მათ განაღდებული აქვთ რეიტინგის პირველობა და, შესაბამისად, თითოს 50 ათასი დოლარიც, რასაც წონების საუკეთესოები იღებენ.

ამჯერად სამ წონაში ვიმყოფებით მეორე საფეხურზე - 60, 66 და 73-ში. 90-შიც მოწინავეთა შორის ვართ და ისევ 81 კილოგრამი რჩება იმ ერთადერთ წონად, სადაც ფავორიტებს ჩამოვრჩებით. თუმცა რეიტინგში ასეთ პროგრესსაც ახლავს თავისი მინუსები - სამწუხაროდ, უმეტეს წონებში სარეზერვოები ბევრად ჩამორჩებიან ჩვენი ნაკრების ცალკეული წონების ლიდერებს ანუ გუნდში კონკურენცია, რბილად რომ ვთქვათ, არც ისე დიდია. მოწინავე ლიდერთა გარდა, 100-ეულში რაოდენობრივად ბევრი ფალავანიც არ გვყავს, ხოლო ვინც შედის, მათი უმეტესობა სალიცენზიო ზონას ბევრადაა დაშორებული და 50-ეულშიც კი კანტიკუნტად შედიან.

60 კგ.
როგორც ვწერდით, მასტერსზე არ გამოსულან იაპონელი ლიდერები, რაც მათ შედეგებზე აისახა და ლიდერობა დაკარგეს. სამაგიეროდ, მასტერსის ფინალში გასვლამ რუსეთის სახელით მოჭიდავე ევროპის ჩემპიონი და მსოფლიოს ფინალისტი რობერტ მშვიდობაძე გაალიდერა. მას კვალში უდგას ევროპის ჩემპიონი და მსოფლიოს ორგზის მესამე პრიზიორი ამირან პაპინაშვილი, ვინც, მოგეხსენებათ, ჩინეთში ბრინჯაო მოიპოვა, რითაც 900 ქულა შეიმატა. სამწუხაროდ, უახლოეს 2 თვეში ჩვენებური გვარიანად დაკარგავს ქულებს, რითაც იაპონელი მსოფლიოს პრიზიორი რიუჯუ ნაგაიამა დაუხლოვდება, მაგრამ გერმანიის ტურნირისთვის ისიც გვარიანად დაკარგავს ქულებს და ძველი სტატუს-კვოც აღდგება.

1. რობერტ მშვიდობაძე (რუსეთი) - 6176 ქულა
2. ამირან პაპინაშვილი (საქართველო) - 6026
3. რიუჯუ ნაგაიამა (იაპონია) - 5570
4. ნაოჰისა ტაკატო (იაპონია) - 5050
5. ამარტუვშინ დაშდავაა (მონღოლეთი) - 4121
14. ლუხუმ ჩხვიმიანი (საქართველო) - 2861
45. ჯაბა პაპინაშვილი (საქართველო) - 856

66 კგ.
ამ წონაში ევროპის ჩემპიონმა და მსოფლიოს მესამე პრიზიორმა ვაჟა მარგველაშვილმა შეინარჩუნა ლიდერობა, თუმცა იაპონელთა მსოფლიოს ჩემპიონ ჰიფუმი აბეს ჯერაც გვარიანად ჩამორჩება.

მომავალი სეზონის დასაწყისში ორივე დაკარგავს ქულებს, ოღონდ იაპონელი - მთელი 500-ით მეტს, თუმცა ჩვენებური მაინც ვერ დაეწევა. ამასობაში მარგველაშვილს ნელ-ნელა მიუჩოჩდა სხვა იაპონელი - ჯოშირო მარუიამა, ვინც მასტერსის მოგებამ და ამისთვის მიღებულმა 1800-მა ქულამ მესამე ადგილამდე აღაზევა, თუმცა მთავარია, ჩვენებურმა წარმატებით იჭიდაოს მომავალ შეჯიბრებებზე (რაშიც, მინიმუმ, მესამეზე გასვლა მაინც იგულისხმება) და მარუიამა მას ვერ დაეწევა. თანაც, რეიტინგში ასეთი განლაგება იქნებ კიდევაც გვაწყობდეს, რადგან ამ შემთხვევაში მარგველაშვილი ნახევარფინალში მარუიამას შეხვდება (ცხადია, იაპონელები ამ წონას თუ გააორებენ), ის კი მეტოქედ ნამდვილად ჯობია ზეტალანტ აბეს.

აქვე შეგახსენებთ, რომ ჰიფუმი და მისი და - უტა აბე წლეულს ბაქოში ერთად გახდნენ მსოფლიოს ჩემპიონები, რითაც მსოფლიოს ძიუდოს ისტორია გადაწერეს, ეს და-ძმა კი ძიუდოში ერთადერთი სამგზის ოლიმპიური ჩემპიონის, ტადაჰირო ნომურას (60) დისშვილები არიან.

1. ჰიფუმი აბე (იაპონია) - 6050
2. ვაჟა მარგველაშვილი (საქართველო) - 5780
3. ჯოშირო მარუიამა (იაპონია) - 5065
4. ბარუხ შმაილოვი (ისრაელი) - 4681
5. ტალ ფლიკერი (ისრაელი) - 4365
41. ბაგრატ ნინიაშვილი (საქართველო) - 1133
53. ლაშა გიუნაშვილი (საქართველო) - 878

73 კგ.
ოლიმპიური და ევროპის ჩემპიონი ლაშა შავდათუაშვილიც მეორეა, თუმცა მისთვის ამ პოზიციის შენარჩუნება უფრო საშურია, ვიდრე რეიტინგის ლიდერზე, კორეელთა მსოფლიოს მოქმედ ჩემპიონ ჩანგრიმ ანზე დაწევა, ვინც საგრძნობლადაა დაწინაურებული. ოღონდ საიმედოა ის გარემოება, რომ უახლოეს ორ თვეში ჩვენებურზე მეტ ქულას მისი მდევარი იაპონელი, მსოფლიოს კიდევ ერთი ჩემპიონი სოიჩი ჰაშიმოტო დაკარგავს, მაგრამ ის ისეთი დონის კონკურენტია, შეიძლება, შავდათუაშვილს ფეხის ყოველი დაცდენა ძვირად დაუჯდეს. თუმცა ჰაშიმოტომ რომც გაუცვალოს ადგილი ჩვენებურს, ამით არაფერი იცვლება - ახლანდელი რეალობით მათი გზები ნებისმიერ ტურნირზე ნახევარფინალში იკვეთება, რაც არცთუ სახარბიელო პერსპექტივაა.

1. ჩანგრიმ ანი (კორეა) - 6280
2. ლაშა შავდათუაშვილი (საქართველო) - 5721
3. სოიჩი ჰაშიმოტო (იაპონია) - 5508
4. რუსტამ ორუჯოვი (აზერბაიჯანი) - 5246
5. ტომი მაკიასი (შვედეთი) - 4818
77. ფრიდონ გიგანი (საქართველო) - 534

81 კგ.
როგორც გითხარით, ყველაზე ცუდი სარეიტინგო ვითარება ამ წონაში გვაქვს. არადა, მძიმე წონასთან ერთად, ასეულში ყველაზე მეტი - 6 მონაწილე აქ გვყავს. მათი უმეტესობა ახალგაზრდაა და ფრიად იმედის მომცემი. ვიქონიოთ იმედი, რომ უკვე მომავალ სეზონში ისინი რადიკალურად შეცვლიან ვითარებას დადებითისკენ.

1. საეიდ მოლაე (ირანი) - 6394
2. ფრანკ დე ვიტი (ჰოლანდია) - (5240)
3. ტაკეში სასაკი (იაპონია) - 4462
4. ვედატ ალბაირაკი (თურქეთი) - 4290
5. სოტარო ფუჯივარა (იაპონია) - 4205
26. ზებედა რეხვიაშვილი (საქართველო) - 1908
33. თამაზ კირაკოზაშვილი (საქართველო) - 1561
41. ნუგზარ ტატალაშვილი (საქართველო) - 1171
69. ტატო გრიგალაშვილი (საქართველო) - 544
88. ლუკა მაისურაძე (საქართველო) - 406
98. კობა მჭედლიშვილი (საქართველო) - 344

90 კგ.
ამ წონაში დათმო პოზიციები ევროპის პრიზიორმა ბექა ღვინიაშვილმა, რაც ძირითადად მენისკის ოპერაციით გამოწვეულმა უქმობამ გამოიწვია. მან ჩინეთში მასტერსზე კი იჭიდავა, მაგრამ - წარუმატებლად და ახლა რეიტინგში მე-12 ადგილამდე დაეშვა. თუმცა გვჯერა, ეს ჩავარდნა დროებითია და გაისად, სეზონის დასაწყისშივე ის ისევ შევა მოწინავე ოქტეტში, რაც ტურნირებზე განთესვის საშუალებას მისცემს.

ამასთან, ჩვენს ნაკრებში ეს წონა, ალბათ, ყველაზე გამორჩეულია კონკურენციის თვალსაზრისით, რადგან რამდენიმე ძლიერი ფალავანი გვყავს. აქ რეიტინგს ესპანელთა სახელით მოჭიდავე მსოფლიოს წლევანდელი ჩემპიონი ნიკოლოზ შერაზადიშვილი უდგას და მამლუქებსაც თუ მივათვლით, გამოდის, რომ შვიდი წონიდან ოთხს ქართველები ლიდერობენ.

1. ნიკოლოზ შერაზადიშვილი (ესპანეთი) - 7166
2. კრისტიან ტოტი (უნგრეთი) - 5749
3. ალექსანდრ კუკოლი (სერბეთი) - 4574
4. ივან ფელიპე სილვა მორალესი (კუბა) - 4355
5. მიხაილ იგოლნიკოვი (რუსეთი) - 4093
12. ბექა ღვინიაშვილი (საქართველო) - 3177
15. უშანგი მარგიანი (საქართველო) - 2907
43. ავთანდილ ჭრიკიშვილი (საქართველო) - 1016
59. ლაშა ბექაური (საქართველო) - 700
63. გიორგი პაპუნაშვილი(საქართველო) - 644

100 კგ.
ამ წონაშიც კარგა ხანს შეინარჩუნებს პირველობას ევროპის სამგზის ჩემპიონი, მსოფლიოს სამგზის ვერცხლის მედალოსანი და ოლიმპიადის ფინალისტი ვალერი ლიპარტელიანი - ის 2500 ქულაზე მეტით უსწრებს უახლოეს მდევარს, ვისაც ამხელა სხვაობის გასაბათილებლად ერთი მასტერსის ან მსოფლიოს ჩემპიონატის მოგებაც არ ეყოფა, ან ორი "დიდი მუზარადი" და ზედაც ჩაროზად "დიდი პრიზი" უნდა დააყოლოს, რაც უძნელესი საქმეა, ჩვენებურმა კი ამასობაში წარმატებას ვერ უნდა მიაღწიოს.

არადა, ლიპარტელიანი ნებისმიერ ტურნირზე ფავორიტთა შორის იქნება და თან არც მდევარია მაინცდამაინც მრისხანე - ჰოლანდიელი ევროპის მედალოსანი მიხაელ კორელი. თანაც, პარიზის "დიდი მუზარადისთვის" ჰოლანდიელი უფრო მეტ ქულას დაკარგავს განულება-განახევრებით. ამასთან, ლიპარტელიანი ყველა წონის ტოპ-რეიტინგშიც მეორეა და მხოლოდ თანაგუნდელ გურამ თუშიშვილს (+100) ჩამორჩება.

1. ვალერი ლიპარტელიანი (საქართველო) - 7408
2. მიხაელ კორელი (ჰოლანდია) - 4885
3. პეტერ პალტჩიკი (ისრაელი) - 4880
4. გუჰამ ჩო (კორეა) - 4596
5. ჟორჟე ფონსეკა (პორტუგალია) - 4233
46. ონისე სანებლიძე (საქართველო) - 953
50. ლაშა ტაველური (საქართველო) - 850
90. იასონ ნემსაძე (საქართველო) - 324

+100 კგ.
მსოფლიოსა და ევროპის ჩემპიონი გურამ თუშიშვილი ამ წონის რეიტინგის ლიდერობის გარდა, ვაჟთა შვიდივე წონაში საუკეთესო მაჩვენებელს ფლობს - 8102 ქულა. კარგა ხანს არც მის ლიდერობას ემუქრება საფრთხე, რადგან შარშანდელი ქულების განახევრებით ჩვენს ტურნირამდე თითქმის არაფერი აკლდება და არც ორი წლის წინანდელთა განულებებით მოჰყვება ბევრი "სეკვესტრში". ამასთან, გარკვეულ ქულებს მისი უშუალო მდევარიც დაკარგავს. თან, დიდი იმედია, ამასობაში თუშიშვილიც მოიპოვებს მორიგ დიდ წარმატებებს.

ამ წონაში მთავარი უცნაურობა დაუმარცხებელი და ლეგენდარული ფრანგის - ტედი რინერის 29-ე ადგილია, თუმცა ის ტოკიოს ოლიმპიადისთვის საგანგებო გრაფიკით ემზადება და ტურნირებზე თითქმის არ გამოდის.

1. გურამ თუშიშვილი (საქართველო) - 8102
2. ლუკაშ კრპალეკი (ჩეხეთი) - 5371
3. დუურენბაიარ ულიზბაიარი (მონღოლეთი) - 3894
4. დავიდ მოურა (ბრაზილია) - 3793
5. რაფაელ სილვა (ბრაზილია) - 3480
34. ადამ ოქრუაშვილი (საქართველო) - 1228
41. ლევან მატიაშვილი (საქართველო) - 1089
55. გელა ზაალიშვილი (საქართველო) - 756
56. ონისე ბუღაძე (საქართველო) - 750
84. გიორგი ქავთარაძე (საქართველო) - 364

ყოველდღიური სპორტული გაზეთი "ლელო"
979
მკითხველის კომენტარები / 0 /
მსგავსი ამბები
რუბრიკის სხვა სიახლეები
;