მსოფლიოს რეიტინგი. თავისუფლები, უკეთ, ვიდრე კლასიკოსები

მსოფლიოს ჭიდაობის გაერთიანებულმა ფედერაციამ გამოაქვეყნა ახალი რეიტინგი.

შეგახსენებთ, რომ მასში სპეციალური სარეიტინგო შეჯიბრებებისა და კონტინენტური პირველობების შედეგები შედის, რეიტინგის ოთხი მოწინავე ფალავანი კი მსოფლიოს ჩემპიონატზე განითესება და ისინი ნახევარფინალამდე ერთმანეთს არ შეხვდებიან.

ბერძნულ-რომაულიჭიდაობა

დავიწყოთ ბერძნულ-რომაული ჭიდაობით, რადგან საუკეთესო რეიტინგის მქონე ფალავანი ამ სახეობაში გვყავს. ესაა ევროპის მოქმედი ჩემპიონი, მსოფლიოს პრიზიორი რობერტ კობლიაშვილი (87), ვინც 33 ქულით IV ადგილზეა. ამ ნაკრებში ესაა ერთადერთი ფალავანი, ვინც სადღეისოდ განთესილ ოთხეულში შედის.

განთესილი კვარტეტის სიახლოვეს ორი ფალავანია: VI ადგილებზე არიან 67 კილოგრამში ევროპის ვიცე-ჩემპიონი და ოლიმპიური პრიზიორი შმაგი ბოლქვაძე 30 ქულით და 72-ში ევროპის წლევანდელი ბრინჯაოს პრიზიორი იური ლომაძე - 29-ით.

ამათ გარდა, ათეულში ჩვენი კიდევ ორი ფალავანი შედის და ორივე ევროპის წლევანდელი მესამე პრიზიორი: დავით ჩხარტიშვილი (60) 23 ქულით VIII საფეხურზეა, მძიმეწონოსანი იაკობ ქაჯაია კი ამდენივე ქულით ზუსტად მეათეა. XI ადგილზეა თორნიკე ძამაშვილი 77-ში - 28 ქულა.

55 კილოგრამში ევროპის მესამე პრიზიორი ნუგზარ წურწუმია 16 ქულით მე-13 ადგილზეა. ლევან ქავჟარაძის (63) ანგარიშზე 18 ქულა და XII პოზიციაა. 82 კილოგრამში რეიტინგში ორი ფალავანი გვყავს და ორივე ტიტულოვანი, თუმცა არც ისე მაღალ პოზიციაზე: ევროპის ორგზის ჩემპიონი ზურაბ დათუნაშვილი 19 ქულით XIII-ეა, მსოფლიოს პრიზიორი ლაშა გობაძე კი 17-ით - XVIII. 97 კილოგრამი ერთადერთი წონაა, სადაც განთესილებში ანუ მოწინავე 20 კაცში წარმომადგენელი არ გვყავს.

თავისუფალი ჭიდაობა

რეიტინგის მხრივ, გაცილებით უკეთესი მდგომარეობა გვაქვს თავისუფალ ჭიდაობაში, რადგან განსათეს ოთხეულში ერთბაშად ექვს წონაში შევდივართ. ყველაზე მაღალ პოზიციაზე - მეორე ადგილზე ევროპის ფინალისტი ელიზბარ ოდიკაძეა 97 კილოგრამში - 37 ქულა. სამი კაცი მესამე ადგილზეა.

ესენია ევროპის ორგზის და მსოფლიოს ფინალისტი ბექა ლომთაძე 61 კილოგრამში (41 ქულა), 70 კილოგრამში მსოფლიოს ჩემპიონი ზურაბ იაკობიშვილი (45) და ევროპისა და მსოფლიოს ჩემპიონი, ოლიმპიური პრიზიორი მძიმე წონაში გენო პეტრიაშვილი (37). ორი კაციც მეოთხე საფეხურზეა: 86-ში ევროპისა და მსოფლიოს ბრინჯაოს მედალოსანი სანდრო ამინაშვილი (41) და 92-ში საქართველოს ჩემპიონი ირაკლი მწითური (32).

ოლიმპიური და მსოფლიოს ჩემპიონი, ევროპის სამგზის გამარჯვებული ვლადიმერ ხინჩეგაშვილი წლეულს გადავიდა 65 კილოგრამში, თუმცა ევროპის წლევანდელმა მესამე პრიზიორმა მაინც მოასწრო და VIII ადგილამდე აღზევდა - 25 ქულა. 57, 74 და 79 კილოგრამებში 20-ეულში არ შევდივართ.

ყოველდღიური სპორტული გაზეთი "ლელო"
1306
მკითხველის კომენტარები / 0 /
მსგავსი ამბები
რუბრიკის სხვა სიახლეები
;