მსოფლიოს ჩემპიონატი ახალგაზრდებში: გოგონებიდან ლიპარტელიანის იმედად

მარაკეშში გუშინ დაწყებულ ახალგაზრდა ძიუდოისტთა მსოფლიოს ჩემპიონატში წარუმატებლად ჩაება ჩვენი ნაკრები.

გუშინ ჩვენგან მხოლოდ 66 კილოგრამის ძიუდოისტები ჭიდაობდნენ, სადაც ორი მონაწილე გვყავდა, თუმცა ორივე ნაადრევად დამარცხდა. პირველი წრე ორივემ წარმატებით გადალახა:

ევროპის წლევანდელმა ჩემპიონმა გიორგი თუთაშვილმა ხორვატი რობერტ კრაჩარი დააიპონა, ლუკა კაპანაძემ კი შვეიცარიელი ადამ ბაციევი ჩამოიშორა. თუთაშვილმა მეორე შეხვედრაც აღმავლობით ჩაატარა და ისევ დაამარცხა მოლდოველი ადილ ოსმანოვსი, ვისაც წლეულს ევროპის ჩემპიონატის ფინალშიც მოუგო.

ამჯერად თუთაშვილმა მეტოქე გაფრთხილებებით მოახსნევინა. სამაგიეროდ, დამარცხდა კაპანაძე - ბრაზილიელთა მომავალ მესამე პრიზიორ მიხაელ მარსელინოს ვაზარი კი აართვა, მაგრამ მოგვიანებით თავად იპონი გაუშვა და წმინდად წააგო. სამწუხაროდ, ბევრად შორს ვერც თუთაშვილი წავიდა და მომდევნო წრის პაექრობა მანაც დათმო - რუმინელ ლუკიან ბორს დუმიტრესკუსთან ვაზარი დაკარგა, რისი გაქვითვაც ვერაფრით შეძლო. არადა, ეს ამბავი მერვედფინალში მოხდა და სანუგეშო წრეში გადასვლის შანსი არც მას მიეცა. 

ასე დარჩა ჩვენი ნაკრები მაროკოში უმედლოდ, მაგრამ, იმედია, მომდევნო დღეები წარმატებას მოგვიტანს. თუმცა ეს დღეს თუ მოხდება, ამას მხოლოდ გოგონების ნაკრები თუ მოგვიტანს, თორემ ბიჭებში მარტო 73 კილოგრამის წარმომადგენლები ჭიდაობენ, ამ წონაში კი მონაწილე არა გვყავს. 

დღეს გოგონებში 57 და 63 კილოგრამის, ხოლო ბიჭებში მარტო 73-ის წარმომადგენლები ჭიდაობენ. ამ სამ წონაში ჩვენ მხოლოდ ერთი მონაწილე გვყავს - ევროპის წლევანდელი ჩემპიონი ეთერ ლიპარტელიანი (57), ვინც ამ ჩემპიონატის ერთ-ერთი ფავორიტია. შეგახსენებთ, რომ ძიუდოს ავტორიტეტულმა უცხოურმა საიტმა - JUDOINSIDE.COM-მა ლიპარტელიანი მსოფლიოს ამ ჩემპიონატის ყველაზე პერსპექტიულ ახალგაზრდა ძიუდოისტ გოგონათა ხუთეულში დაასახელა. 

ლიპარტელიანი პირველ წრეში თავისუფალია, მასთან შეხვედრის უფლების მოსაპოვებლად კი თავიდან ერთმანეთში უნგრელი ანდრეა კარმანი და კოლუმბიელი ნიკოლ პენქუე იჭიდავებენ. სხვათა შორის, კარმანი ფინურ ვანტააში, ევროპის წლევანდელ ჩემპიონატზეც ჯგუფში მის ახლოს იყო, მაგრამ ჩვენებურთან შეხვედრამდე ხორვატმა დორა ბორტასმა მოუგო. 

ამჯერად მარაკეშში ლიპარტელიანი თავის პირველ შეხვედრას თუ მოიგებს, მერვედფინალში გავა, სადაც მეტოქედ ფრანგი ოფელიე ველოზის, სლოვენიელი კაია კაიზერისა და უზბეკი იბოდატხონ აგოჯონოვას ტრიოდან უძლიერესი ეყოლება. ამავე ჯგუფშია, ოღონდ ქვედა მხარეს, ევროპის წლევანდელი ჩემპიონატის მეხუთეადგილოსანი ჰოლანდიელი შანონ ვან დე მეებერგიც.

ყოველდღიური სპორტული გაზეთი "ლელო"
457
მკითხველის კომენტარები / 0 /
მსგავსი ამბები
რუბრიკის სხვა სიახლეები
;