მსოფლიოს ჩემპიონატი ახალგაზრდებში: იმავე შემადგენლობით, - ბიჭებში ისევ ორ წონას გამოვტოვებთ

მაროკოული მარაკეში ვეტერანთა მსოფლიოს ჩემპიონატის დასრულებიდან სულ რამდენიმე დღეში მორიგ დიდ შეჯიბრებას უმასპინძლებს - 16-20 ოქტომბერს იქ მსოფლიოს ჩემპიონატი უკვე ახალგაზრდებს შორის ჩატარდება. ესაა პირად-გუნდური ტურნირი, სადაც პირველი სამი დღე პირად პირველობას დაეთმობა, 20 ოქტომბერს კი გუნდური შეჯიბრებაა. 

ტურნირში ბიჭების გუნდიც გვეყოლება და გოგონებისაც, თუმცა ჩვენი ორივე ნაკრები არასრულად იქნება წარმოდგენილი: ბიჭებში ისევ გამოვტოვებთ ორ წონას - 55-სა და 73-ს, თუმცა კვლავაც 9 მონაწილე გვეყოლება, გოგონებში კი ამჯერად 5-ის ნაცვლად მხოლოდ სამი მონაწილე გვეყოლება. 

ბიჭების ნაკრების მთავარი მწვრთნელი ლაშა გუჯეჯიანის გადაწყვეტილებით, მაროკოშიც ისევ ის 9 სპორტსმენი იჭიდავებს, რომლებიც სექტემბერში ტრიუმფალურად გამოვიდნენ ფინურ ვანტააში ჩატარებულ ევროპის ახალგაზრდულ ჩემპიონატში. შეგახსენებთ, რომ იქ ხუთივე წონაში ჩვენებმა გაიმარჯვეს, სადაც კი გამოვიდნენ, 81 კილოგრამში სულაც ქართული ფინალი გაიმართა, მთლიანობაში კი ამ 9-კაციანმა ნაკრებმა ფინეთში შვიდი მედალი მოიპოვა - 5 ოქრო და თითო ვერცხლ-ბრინჯაო და დამაჯერებლად გაიმარჯვა გუნდურ ჩათვლაში.

შეგახსენებთ, რომ იქ ჩემპიონები გიორგი თუთაშვილი (66), ტატო გრიგალაშვილი (81), ლაშა ბექაური (90), ილია სულამანიძე (100) და გელა ზაალიშვილი (+100) გახდნენ. ვერცხლის მედალი ვლადიმერ ახალკაცმა (81) მოიპოვა, მესამეზე კი მიხეილ ბექაური (90) გავიდა. დარჩენილი დუეტიდან ბრინჯაოს მედლისთვის საბა ინანეიშვილმაც (+100) იჭიდავა, ხოლო ერთადერთი, ვინც ნაადრევად გამოვარდა, ლუკა კაპანაძეა (66). ამის მიუხედავად, გუჯეჯიანი მასაც ენდო და მსოფლიოს ჩემპიონატზეც წაიყვანა. მწვრთნელი ევროპის ჩემპიონატამდეც აცხადებდა, რომ სეზონის ერთ-ერთ მთავარ ტურნირზე ის სპორტსმენები მიჰყავდა, რომლებმაც სხვებზე მეტად დაიმსახურეს ეს. მისი პოზიცია ახლაც იგივეა. 

სამაგიეროდ, კლებაა გოგონების ნაკრებში, სადაც გია თენაძეს მხოლოდ სამი შეგირდი მიჰყავს. ამჯერად შემადგენლობაში არაა ახალგაზრდებში ევროპის მედალოსანი სოფიო სომხიშვილი (+78) და ევროპის ახალგაზრდული ოლიმპიური ფესტივალის მესამე პრიზიორი ნატალია ყიფშიძე (48). სამწუხაროდ, დიდი ხანია, სომხიშვილს მხარის ტრავმა აწუხებს და სწორედ ეს იყო ევროპის პირველობაზე მისი მარცხის მთავარი მიზეზი და ამის გამო ტოვებს მსოფლიოს ჩემპიონატსაც. ბუნებრივია, შემადგენლობაში არიან ახალგაზრდებში ევროპის წლევანდელი ჩემპიონი ეთერ ლიპარტელიანი (57) და მესამე პრიზიორი მარიამ ჭანტურია (70). გარდა იმისა, რომ ორივე მათგანი წლევანდელი სეზონის ტრიუმფატორია, გოგონების ნაკრების შემადგენლობა გუნდური ტურნირის ინტერესებითაა განპირობებული - სამივე მონაწილე ისეთ წონაში გვყავს, რომლებიც შერეულ ნაკრებში გოგონების წონებად შედის. 

საქართველოს ნაკრები

ბიჭები
66 კგ. გიორგი თუთაშვილი, ლუკა კაპანაძე
81 კგ. ტატო გრიგალაშვილი, ვლადიმერ ახალკაცი
90 კგ. ლაშა ბექაური, მიხეილ ბექაური
100 კგ. ილია სულამანიძე
+100 კგ. გელა ზაალიშვილი, საბა ინანეიშვილი

გოგონები
57 კგ. ეთერ ლიპარტელიანი
70 კგ. მარიამ ჭანტურია
+78 კგ. სალომე მაყიშვილი

ყოველდღიური სპორტული გაზეთი "ლელო"
1200
მკითხველის კომენტარები / 0 /
მსგავსი ამბები
რუბრიკის სხვა სიახლეები
;