მსოფლიოს ჩემპიონატი. ბაზაძემ მსოფლიოზე საუკეთესო მიღწევა გაიმეროა

უნგრეთის დედაქალაქში მოფარიკავეთა მსოფლიოს ჩემპიონატზე გუშინ მოხმალავე ვაჟთა დასკვნითი ორთაბრძოლები გაიმართა.

ჯგუფური ეტაპიდან თავისუფალი იყო სანდრო ბაზაძე, რომელიც რეიტინგით მე-11 ნომრად გახლდათ განთესილი. გუშინ პლეი ოფში პირველი შეხვედრა აარონ ზი ლონგ ჰოს (ჰონკონგი) მოუგო - 15:12, შემდეგ მის კვალს გაუყენა მარია პასკუალ დი ტელა (არგენტინა) - 15:7; რვა საუკეთესოში შესასვლელი პაექრობა კი იტალიელ ლუკა კურატოლისთან დათმო - 10:15 და, როგორც 2017 წელს ლაიპციგში, მე-12 ადგილზე გავიდა. 

მიხეილ მარდალეიშვილმა ჯგუფურ ეტაპზე ექვსიდან ხუთ შეხვედრაში წარმატებას მიაღწია და მხოლოდ ერთი ორთაბრძოლა წააგო - გიბრან ზეა (მექსიკა, 2:5), კლაივ იანგ ლეუ (სინგაპური, 5:3), ანდრეი იაგოდკა (უკრაინა, 5:3), არნე დე რიდერი (ბელგია, 5:1), პანჩო პაშკოვი (ბულგარეთი, 5:3), ჰაკან ილდირიმი (თურქეთი, 5:1), მერე პლეი ოფში მოჰაბ სამერი (ეგვიპტე) დაჯაბნა - 15:10 და 64 საუკეთესოში დაიბევა ადგილი. გუშინ სტარტზევე სახელოვან უნგრელ მოფარიკავეს - ინდივიდუალურში 2017 წლის მსოფლიოს ჩემპიონს, გუნდურში მსოფლიოს ჩემპიონატების 2-2 ვერცხლისა და ბრინჯაოს, ევროპის პირველობებზე თითო ოქრო-ვერცხლისა და ორი ბრინჯაოს მფლობელ ანდრაშ სატმარს შეხვდა და დაძაბულ პაექრობაში 11:15 დამარცხდა. საბოლოოდ მარდალეიშვილს 45-ე ადგილი ერგო, ხოლო ბექა ბაზაძემ და ნიკა შენგელიამ, შესაბამისად, 68-ე და 90-ე ადგილები დაიკავეს. 

მოხმალავეთა კვარცხლბეკზე ადგილები ასე განაწილდა: 1. სანგუკ ოჰი (კორეა), 2. ანდრაშ სატმარი (უნგრეთი), 3. მოჯთაფა აბედინი (ირაი), ლუკა კურატოლი (იტალია).

ხვალ 20 ივლისს მედლებისთვის პაექრობაში ოთხი ჩვენებური ჩაებმება, რომლებმაც კვალიფიკაციისა და პლეი ოფის პირველი ორთაბრძოლების შემდეგ 64 საუკეთესოში მოხვდნენ. შეგახსენებთ, რომ მოხმალავეები - თეოდორა კახიანი და ლიკა ჯიჯეიშვილი, შესაბამისად, პალინა კაშპიროვიჩსა (ბელარუსი) და ქსიაო ძიანთან (ჩინეთი) გაარკვევენ ურთიერთობას, ხოლო რაპირით მოფარიკავეები - ლუკა ღაღანიძე და ლაშა გალუაშვილი, შესაბამისად, ალაელდინ აბულკასემსა (ეგვიპტე) და ჯუნ ჰეოს (კორეა) გაუწევენ მეტოქეობას,

20 ივლისვე პირველ ორთაბრძოლებს გამართავს საქართველოს მოხმალავეთა ნაკრები (სანდრო და ბექა ბაზაძეები, მიხეილ მარდალეიშვილი და ნიკა შენგელია).

ყოველდღიური სპორტული გაზეთი "ლელო"
328
მკითხველის კომენტარები / 0 /
მსგავსი ამბები
რუბრიკის სხვა სიახლეები
;