მსოფლიოს ჩემპიონატი სამბოში. ფინალური ტრიუმფი: ელენე ქებაძისა და ბესო ბერულავას ოქროები

რუმინეთის დედქალაქ ბუქარესტში დღეს დასრულდა სამბისტთა მსოფლიოს ჩემპიონატი და ჩვენმა სამბისტებმა ბოლო დღეც ტრიუმფით ჩაამთავრეს: 2 ოქრო და 1 ვერცხლი მოიპოვეს. ამჯერად მსოფლიოს ჩემპიონები ზუგდიდელი ბესარიონ ბერულავა (82) და ლაგოდეხელი (თუმცა ეს უკვე აჭარის სახელით გამოდის) ელენე ქებაძე (+80) გახდნენ. ფინალში დამარცხდა კასპელი ბექა ბერძენიშვილი (+100).

საინტერესოა, რომ ფინალში სამივე ჩვენებური რუსს შეხვდა. ბერულავამ მსოფლიოს ჩემპიონი სერგეი კირიუხინი დაამარცხა, ქებაძემ - ტიტულოვანი ანა ბალაშოვა, ხოლო ბერძენიშვილმა ასევე სახელოვან არტემ ოსიპენკოსთან წააგო.

ამდენად, ჩვენმა დელეგაციამ მსოფლიოს ჩემპიონატზე გამოსვლა 8 მედლით დაამთავრა: 4 ოქრო, 1 ვერცხლი და 3 - ბრინჯაო. შეგახსენებთ, რომ მსოფლიოს ჩემპიონები ასევე გახდნენ წყნეთელი (თუმცა ესეც აჭარის სახელით გამოდის) ნინო ოძელაშვილი (72) და თელაველი ვახტანგ ჩიდრაშვილი (57), ხოლო მესამეზე ფოთელი გივი ნადარეიშვილი (52), ქარელელი პაატა ღვინიაშვილი (90) და მარყოფელი დავით ლორიაშვილი (100) გავიდნენ.

ამასთან, ოძელაშვილი გახდა პირველი ქართველი ქალი, ვინც საჭიდაო სახეობებში მსოფლიოს ჩემპიონობა მოიპოვა, ხოლო ჩიდრაშვილი ზედიზედ მეხუთედ დაეუფლა მსოფლიოს ჩემპიონის ტიტულს - ამ მხრივ ის უნიკალური ქართველი სამბისტია.

ქართული ცეკვა ტატამზე! ნინო ოძელაშვილმა მსოფლიოს ჩემპიონობა ემოციურად აღნიშნა [VIDEO]

1967
მკითხველის კომენტარები / 0 /
მსგავსი ამბები
რუბრიკის სხვა სიახლეები
;