მსოფლიოს ჩემპიონატი. ჭიდაობაში პლაჟზეც ვყოჩაღობთ

ჭიდაობის სხვა დისციპლინების მსგავსად, ქართველი ფალავნები საპლაჟო ჭიდაობაშიც დიდი წარმატებით გამოდიან.

ამ დღეებში თურქეთის ქალაქ სარიგერმეში ჩატარდა მსოფლიოს ჩემპიონატი ზემოაღნიშნულ დისციპლინაში, სადაც ჯემალ კილაძის ხელმძღვანელობით სულ 6 ათლეტი გამოდიოდა, გუნდი კი სამშობლოში ხუთი მედლით დაბრუნდა: 2-2 ოქრო ვერცხლი და 1 ბრინჯაო. მსოფლიოს ჩემპიონები კონსტანტინე ხაბალაშვილი (70) და იაკობ მაქარაშვილი (80) გახდნენ. მეორეზე ირაკლი მწითური (90) და ახალგაზრდული ნაკრების წევრი თორნიკე ქათამაძე (60) გავიდნენ, ჯაბა ყველაშვილი (80) კი მესამეზე გავიდა. ასევე მესამეა ჩვენი ნაკრებიც საერთო გუნდურ ჩათვლაში.

ხაბალაშვილმა პირველ წრეში 3:1 დაამარცხა ბერძენი ნიკო აროუზმანიდისი, ბრიტანელ ნიკოლა კოჯოკარუს 3:0 მოუგო, კოპაკაბანადან ჩამოსული ბრაზილიელი ჟოაო ვიქტორ დოს სანტოს სილვა კი არ გამოუცხადდა. მეოთხედფინალში ნორვეგიელ ერიკ ბარტს კვლავ 3:1 აჯობა, ნახევარფინალში მასპინძელი მეჰმედ ემინ ოგუტი 3:2 დაამარცხა, ფინალში კი უკრაინელ სემენ რადულოვთანაც 3:1 იმარჯვა.

ფინალში უკრაინელს სძლია მაქარაშვილმაც - ვასილ მიხაილოვს 2:0 აჯობა. თუმცა მომავალმა ჩემპიონმა ნახევარფინალშიც მნიშვნელოვანი ბრძოლა გადაიხადა თანაგუნდელ ყველაშვილთან - 3:2 მოუგო. შეგახსენებთ, რომ ესენი ერთმანეთს საქართველოს ჩემპიონატის ფინალშიც შეხვდნენ - ოლიმპიურ ჭიდაობაში და მაშინაც მაქარაშვილმა იმარჯვა. სამაგიეროდ, ყველაშვილმა მერე საერთაშორისო ტურნირებზე აუღო რევანში. სავარაუდოდ, ამ ტურნირზე მათი ყოფნა იმას ნიშნავს, რომ მსოფლიოს ჩემპიონატზე 79 კილოგრამში მოხვედრის შანსი აღარ აქვთ და იქ ავთანდილ კენჭაძის წაყვანა გადაწყვეტილია.

პირველ რაუნდში მაქარაშვილმა 3:1 მოუგო თურქ ტელატ უიარს, ყველაშვილს კი პაკისტანელი მუჰამედ ასად ბუტი არ გამოუცხადდა. მეორეში ჩვენებურებმა ესპანელები დაიბრიყვეს: მაქარაშვილმა დავიდ დე ხესუს პერეს კინტანა დააწვინა ბეჭებზე და წმინდად მოიგო, ხოლო ყველაშვილმა არგიმირო დომინკეს ჰერნანდესს 3:1 სძლია. მესამე რაუნდში მაქარაშვილმა კიდევ ერთი თურქი - უგურ ტასდანი დაამარცხა - 3:0, ყველაშვილმა კი რუმინელ ვასილე მადალინ მინზალას 3:2 სძლია. ამას უკვე ქართული ნახევარფინალი მოჰყვა, სადაც მაქარაშვილმა იმარჯვა და მერე ფინალში სულაც ჩემპიონობა იზეიმა, ყველაშვილმა კი ბრინჯაოსთვის შეხვედრაში თურქ ეფე სამი უნალს 3:1 აჯობა.

ჩვენმა გუნდმა უფროსებში ერთადერთი ფინალი 90 კილოგრამში დათმო, სადაც მწითური პაკისტანელ მუჰამედ ინამთან 1:3 დამარცხდა. თუმცა ეს მისი ერთადერთი მარცხი არ იყო - ჯგუფურ ეტაპზეც წააგო პირველივე პაექრობა ბერძენ კრისტოს სამარციდისთან, 2:3, თუმცა შემდეგ უნგრელ ტიბორ ბაგოს 3:0, ხოლო თურქ აჰმედ დოგან ბაირის 5:2 სძლია და წრიული სისტემით მიმდინარე წინასწარი ეტაპიდან მაინც გავიდა მეოთხედფინალში. იქ რუმინელი მიჰაი ნიკოლაე პალაგია 4:1 დაამარცხა, ხოლო ნახევარფინალში ესპანელ პედრო იაკინტო გარსია პერესს 3:2 სძლია. სავარაუდოდ, მწითურის აქ ყოფნაც ნიშნავს, რომ მსოფლიოზე არ მიდის და იქ ადგილი დავით მარსაგიშვილმა დაიბევა, თუმცა დაველოდოთ ეროვნული ნაკრების შემადგენლობის გამოცხადებას.

ახალგაზრდებში ქათამაძე ორჯერ შეხვდა მასპინძელ მურატ ბეკტასს და პირველად წინასწარ ეტაპზე მოუგო, მაგრამ წააგო მთავარი შეხვედრა - ფინალი. მან ტურნირი ბერძენ ასტერიოს ლალიოტისთან 5:0 მოგებით დაიწყო, რასაც ბეკტასთან პირველი მოგება მოჰყვა - 3:0. ნახევარფინალში მეორე თურქს - ჰუსეინ ჰასან ოზენს 3:1 სძლია, ფინალში კი ისევ ბეკტასს შეხვდა, ვინც მოახერხა რევანშის აღება - 3:0.

ჩვენი გუნდიდან უმედლოდ მხოლოდ როლანდ ანდრიაძე (+90) დარჩა, ვინც საკვალიფიკაციო ეტაპზევე წააგო თურქ უფუკ ილმაზთან: 1:3.

ყოველდღიური სპორტული გაზეთი "ლელო"
219
მკითხველის კომენტარები / 0 /
რუბრიკის სხვა სიახლეები