[VIDEO ჰაილაითები] მსოფლიოს ჩემპიონატი. 1/4 ფინალი. რუდი გობერმა და საფრანგეთმა აშშ დაამარცხეს!

ჩინეთში მიმდინარე მსოფლიოს თასზე მეოთხედფინალები გაიმართა. შეხვედრები ერთმანეთზე საინტერესო გახლდათ, თუმცა ყველაზე გამორჩეული მაინც საფრანგეთისა და აშშ-ის დაპირისპირება იყო,რომელიც სენსაციური შედეგით დასრულდა...

თუმცა ფრანგების გამარჯვება სემსაცურია თუ არა, ეგეც საკითხავია, რადგან ამ გუნდში NBA-ში გამოწვრთნილი კალათბურთელები თამაშობენ.

ასეა თუ ისე, ფრანგებმა დამაჯერებელი თამაშით აშშ 89:79 დაამარცხეს. რუდი გობერმა 21 ქულა და 16 მოხსნა მიითვალა, ევან ფურნიელ - 22 ქულა, ნანდო დე კოლომ - 18.

ამერიკელთაგან ყველაზე მეტი მიტჩელს ჰქონდა - 26 ქულა.

ავსტრალიის ნაკრებმა, როგორც მოსალოდნელი იყო ჩეხეთს აჯობა - 82:70. როგორც სხვა შემთხვევებში, სამხრეთნახევარსფეროელებს პატი მილსი გაუძღვათ, რომელმაც 24 ქულას მოუყარა თავი. ჩეხმა აუდამ კი 21 ქულა ჩააგდო.

ჩემპიონობისთვის ბრძოლას საქართველოს ნაკრების მომავალი მეტოქეც გამოეთიშა. სერბეთმა არგენტინასთან ვერაფერი გააწყო. მართალია ბოლომდე მისდევდა, მაგრამ არგენტინელები მუდმივად წინ იყვნენ. არც გადამწყვეტ მომენტში მოდუნებულან და 97:87 გაიმარჯვეს.

სამხრეთ ამერიკელებს უბერებელი ლუის სკოლა გაუძღვათ. მის ანგარიშზე 20 ქულაა. მატჩის ბომბარდირი კი სერბი ბოიან ბოგდანოვიჩი გახდა - 21.

რიკი რუბიომ 19 ქულას მოუყარა თავი, ერნანგომესმა - 18-ს და ესპანეთმა პოლონეთს 90:78 სძლია. პირენეელებმა 28 შედეგიანი გადაცემა შეასრულეს, რაც ნათელ წარმოდგენას გვიქმნის მატჩის ხასიათზეც და რუბიოს გუნდის გამარჯვების მიზეზზეც. სხვათა შორის, სწორედ რიკის ჰქონდა ყველაზე მეტი პასი - 9.

709
მკითხველის კომენტარები / 0 /
მსგავსი ამბები
რუბრიკის სხვა სიახლეები
;