მსოფლიოს 2026 წლის ჩემპიონატი. რას ითხოვს მაროკო და რას ვითხოვთ ჩვენ?

2026 წელს მაროკოს მსოფლიოს ჩემპიონატის მასპინძლობა სურს. რამდენიმე დღის წინ კანდიდატი ქვეყნის საორგანიზაციო კომიტეტის წევრები საქართველოს სამუშაო ვიზიტით ესტუმრნენ.

დელეგაციის წევრებს სფფ-ის ხელმძღვანელებმა უმასპინძლეს. შეხვედრის მიზანი სტუმართა მხრიდან მაროკოს, როგორც 2026 წლის ფიფას მსოფლიო თასის მასპინძლობის კანდიდატად გაცნობა იყო.

დელეგაციის წევრებმა, ნავალ ელ მუტკაველის ხელმძღვანელობით, საქართველოს ფეხბურთის ფედერაციის ოფიციალურ პირებს მუნდიალის მასპინძლობასთან დაკავშირებით საკუთარი ხედვა გააცნეს.

შეხვედრას სფფ-ის პრეზიდენტი ლევან კობიაშვილი, გენერალური მდივანი დავით მუჯირი და პირველი ვიცეპრეზიდენტი კახა ჭუმბურიძე დაესწრნენ. მაროკოს საორგანიზაციო ჯგუფის ხელმძღვანელ ელ მუტკაველთან ერთად, პრეზენტაცია კომიტეტის წევრებმა - სამირა სიტაილიმ და ქამალ ლაჰლო ჰამიდიმ მოაწყვეს. შეხვედრას საქართველოში მაროკოს სამეფოს საპატიო გენერალური კონსული მიხეილ ალხანიშვილიც დაესწრო.

ამ შეხვედრის თაობაზე მედიისთვის მხოლოდ მშრალი ინფორმაცია გავრცელდა, უფრო მეტი რამ სწორედ ალხანიშვილმა გაგვიმხილა:

"ცხადია, მაროკო დაინტერესებულია, რომ მსოფლიოს ჩემპიონატის მასპინძლობა მოიპოვოს. საამისოდ, ფიფას კონგრესზე მის კანდიდატურას მხარი მაქსიმალურად ბევრი ქვეყნის ფედერაციამ უნდა დაუჭიროს, მათ შორის, საქართველომაც. მაგრამ არის მეორე მხარე - საქართველოსაც სჭირდება მაროკოს და ნავალ ელ მუტკაველის მხარდაჭერა.

მოგეხსენებათ, გიორგი კვირიკაშვილმა ზამთრის ოლიმპიადის საქართველოში ჩატარების იდეა გააჟღერა. ეს არ არის უბრალოდ იდეა, საქართველოს მიზანი მისკენ სვლა უნდა იყოს და მაროკოს დელეგაციასთან შეხვედრისას ფეხბურთის ფედერაციაში სწორედ ეს საკითხი დაისვა - უნდა ჰქონდეს თუ არა ჩვენს ქვეყანას ზამთრის ოლიმპიადის მასპინძლობაში მაროკოს მხარდაჭერის იმედი.

საქმე ისაა, რომ მაროკო საერთაშორისო ოლიმპიურ კომიტეტში დიდი გავლენით სარგებლობს, რადგან ამ ქვეყნის ოლიმპიური მოძრაობის ლიდერი ნავალ ელ მუტკაველი, რომელიც საქართველოში გვესტუმრა, საერთაშორისო ოლიმპიური კომიტეტის პრეზიდენტის, თომას ბახის მოადგილეა.

მართალია, ეს ფეხბურთს არ ეხება, მაგრამ მნიშვნელოვანია, რომ ფეხბურთის ფედერაციამ,ზოგადად, ქვეყნის ინტერსებიდან გამომდინარე იხელმძღვანელა", - ამბობს ალხანიშვილი.

ყოველდღიური სპორტული გაზეთი "ლელო"
1569
მკითხველის კომენტარები / 0 /
მსგავსი ამბები
რუბრიკის სხვა სიახლეები
;