მსოფლიო რაგბის ჩანახატი ქართველ მორაგბეზე: მამუკაშვილი მათემატიკაზე, მხატვრობაზე, ნადირობასა და ვისკიზე 

საქართველოს ნაკრებში პირველი ლელო მიმდინარე მსოფლიოს თასის გათამაშებაში შერკინების კვაჭმა შალვა მამუკაშვილმა გაიტანა.

მისთვის იაპონიის უდიდესი სარაგბო ფორუმი კარიერში მეორეა. შალვამ ამავე პოზიციაზე 2015 წელს ინგლისში გამართულ მსოფლიოს თასის გათამაშებაშიც იასპარეზა. მსოფლიოს რაგბის ოფიციალურმა ვებგვერდმა შალვა მამუკაშვილზე ჩანახატი გამოაქვეყნა, სადაც ქართველი მორაგბე საინტერესო, სრულიად განხვავებული კუთხითაა წარმოჩენილი. გთავაზობთ ამონარიდს ამ პუბლიკაციიდან. 

„შალვა მამუკაშვილის ცხოვრება სრულიად სხვა მიმართულებით წავიდოდა, მშობლიურ ქალაქ თბილისში რაგბის ბურთი ხელში ხუთი წლის ასაკში რომ არ აეღო.

თბილსისი სახელმწიფო უნივერსიტეტის პროფესორ-მათემატიკოსთა ოჯახის შვილი ახლოს იყო ოჯახური ტრადიციის გაგრძელებასა და მათემატიკის მასწავლებლობასთან, მაგრამ მოხდა ისე, რომ ის გახდა პირველი ქართველი მორაგბე, რომელმაც ინგლისის პრემიერშიფში ითამაშა.

დედაჩემი უნივერსიტეტის პროფესორია, მათემატიკასა და ინფორმაციულ ტექნოლოგიებს ასწავლის, ოჯახში ბევრი მასწავლებელი გვყავს - ბაბუა, ბებია, ბიძიები და ბიცოლები, ყველა მათემატიკას ასწავლის უნივერსიტეტში. ჩემი უმცროსი ძმა ბანკში მუშაობს, სადაც ასევე მათემატიკასთან დაკავშირებული სამუშაოს შესრულება უწევს და ძალიან კარგად გამოსდის. - თქვა შალვამ. 

მან თბილისში კომაროვის სახელობის ფიზიკა-მათემატიკური სკოლა დაამთავრა და უნივერსიტეტში ინფორმაციული ტექნოლოგიების სწავლაც დაიწყო. თუმცა, მერე რაგბიმ მთლიანად დაიკავა მისი ცხოვრება. შალვამ საქართველო 23 წლის ასაკში დატოვა და 2014 წელს მანჩესტერულ „სეილ შარკსს“ შეუერთდა.

„რაგბი ერთადერთი სპორტია, რაც როდესმე მითამაშია და ჩემი პირველი და უკანასკნელი პოზიცია ორი ნომერი იყო. ყოველთვის შერკინების შუაგულში ვიყავი. პრემიერშიფში თამაში დიდი გამოცდილება და წინ გადადგმული ნაბიჯი იყო ჩემთვის“ - დასძინა მან. 

მამუკაშვილის მოდევნო გუნდი შოტლანდიური „გლაზგო“ იყო. მერე საფრანგეთში განაგრძო კარიერა. ჯერ „მონპელიეს“, ღირსებას იცავდა, მერე „ტულონსა“ და „კარკასონში“ მოსინჯა ძალა. საფრანგეთიდან მამუკაშვილი საქართველოში დაბრუნდა და მისი ცხოვრებაც ძალიან მალე რადიკალურად შეიცვალა - შეეძინა გოგონა, ტასო. ეს სამი წლის წინ მოხდა.

ზოგჯერ მავიწყდება, როგორ ვცხოვრობდი იქამდე, სანამ მამა გავხდებოდი. რაგბის მსგავსად, ამ მოვლენამ ყველაფერი შეცვალა. ახლა უფრო მეტ პასუხისმგებლობას ვგრძნო“.

შალვას მეუღლე მხატვარია, აბსტრაქტული სტილის მიმდევარი და ცოლი დაეხმარა ინტერესების მათემატიკისა და კომპიუტერებიდან ფერწერაზე გადატანაში.

დაქორწინების შემდეგ ფერწერით დავინტერესდი“, - ამბობს შალვა ღიმილით და იღებს ისეთ გამომეტყველებას, რომ ამ საკითხზე მეტი არაფრის თქმა არ შეუძლია.

„ჩვენ ყველგან გალერეებში დავდივართ. მგონია, ყველა მათგანში ვარ ნამყოფი. არ მყავს საყვარელი მხატვარი. თუმცა, ვან გოგი და სალვადორ დალი მომწონს.

როცა გლაზგოში პირველად ვნახე დალის „ჯვარცმული ქრისტე“, 30 წუთი თვალს ვერ ვაცილებდი. ის ბრწყინვალე იყო. ჩემს ქალიშვილსაც უყვარს ხატვა“.
2015 წლის რაგბის მსოფლიო თასზე მამუკაშვილს დაბადების დღე ახალ ზელანდიასთან თამაშის დროს ჰქონდა. წელს კი ფიჯისთან თამაშამდე ერთი დღით ადრე, 2 ოქტომებრს ექნება იუბილე. ის პატარა ტორტსა და ბევრ მილოცვას ელოდება. 

ფიჯისთან თამაშის შემდეგ შეიძლება აღვნიშნოთ კიდეც. გააჩნია, როგორ დასრულდება შეხვედრა. იაპონური ვისკი კარგია, თუმცა შოტლანდიური მირჩევნია.

როცა თავისუფალი დრო მაქვს, ფრინველებზე ნადირობა მომწონს. ცუდი მიზანი არ მაქვს, თუმცა ჯერ მხოლოდ დამწყები ვარ“.

ახლგაზრდა მამას ახლახან დაუმთავრდა კონტრაქტი რუსულ „ენისეისთან“ და მსოფლიო თასის დასრულების შემდეგ ახალი კლუბის პოვნა მოუწევს.
მინდა ევროპაში ვითამაშო, ოჯახიდან და საქართველოდან არც ისე შორს. ბუნებრივია, ჩემი მეუღლე და ქალიშვილი ჩემთან ერთად იქნებიან, სადაც უნდა წავიდე, თუმცა ჩემს დიდ ოჯახთან ახლოს ყოფნა მინდა“.

ყოველდღიური სპორტული გაზეთი "ლელო"
1217
მკითხველის კომენტარები / 0 /
მსგავსი ამბები
რუბრიკის სხვა სიახლეები
;