მსხვერპლი დედის ხარჯზე? როგორ გააგდო რაბიომ აგენტი 'ბარსელონას' ხათრით... და ეს აგენტი დედამისია!

2018 წლისს 11 დეკემბრის შემდეგ ადრიან რაბიოს ფეხბურთი აღარ უთამაშია. არადა, საკამათო არ უნდა იყოს, რომ ის ფრანგული ფეხბურთის ერთ-ერთი მთავარი ტალანტია.

ყველაფერი ეს ხდება ფეხბურთელსა და “პარი სენ-ჟერმენს” შორის არსებული უთანხმოების გამო. რაბიოს სამი თვის შემდეგ უსრულდება კონტრაქტი ფრანგული ფეხბურთის გრანდთან და ხელშეკრულების გახანგრძლივება აღარ სურს...

არადა, “პარი სენ-ჟერმენმა” ყველაფერი გააკეთა იმისთვის, რომ რაბიო შეენარჩუნებინა. ცოტა ხნის წინ 23 წლის ფრანგ ვარსკვლავს შესთავაზეს ახალი, 4-წლიანი ხელშეკრულება. ამ კონტრაქტის თანახმად მნიშვნელოვნად უნდა გაზრდილიყო ადრიანის ხელფასი - მას წელიწადში 12 მილიონი ევრო უნდა მიეღო საგადასახადო დაქვითვების გარეშე. ფრანგულ კლუბს ძალიან არ უნდოდა მისი დათმობა იმ მარტივი მიზეზის გამო, რომ რაბიო ამ კლუბის აღზრდილია.

“პარი სენ-ჟერმენის” სპორტულმა დირექტორმა ენრიკე ოტერომ განაცხადა, რომ ფეხბურთელსა და კლუბს შორის მოლაპარაკება საბოლოოდ შევიდა ჩიხში და მოლაპარაკება არავითარ შემთხვევაში აღარ შედგება. ამის გათვალისწინებით, რაბიო მთელი დარჩენილი სეზონის განმავლობაში სკამზე იჯდება და აღარ ითამაშებს.

ახლა სიტყვა მივცეთ ფეხბურთელის დედას, რომელიც, ამავდროულად, მისი აგენტიცაა: “ჯერ კიდევ ზაფხულში პირდაპირ ვუთხარი პსჟ-ის ხელმძღვანელობას, რომ რაბიოს აღარ უნდოდა გუნდში დარჩენა. ამავე დროს, არანაირად არ დაგვირღვევია შეთანხმება და არცერთ კლუბთან არ გვიწარმოებია მოლაპარაკება. ჩვენ ვაფასებთ კლუბის პოზიციას და მის ინტერესებს, მაგრამ თუ “პარი სენ-ჟერმენის” ხელმძღვანელობა, სპორტული დირექტორის ენრიკე ოტეროს სახით, გვიტევს, გვაქვს იმის სრული უფლება, რომ თავი დავიცვათ”, - თქვა ფეხბურთელის დედამ, ქალბატონმა ვერონიკ რაბიომ.

მას შვილზე ძალიან დიდი გავლენა აქვს და ეს შემთხვევით სულაც არ არის. სწორედ მან შეიტანა უდიდესი წვლილი ადრიანის აღზრდაში. ბავშვობიდან დაჰყავდა ფეხბურთზე მომავალი ვარსკვლავი...

მერე ადრიანის მამას ინსულტმა მოძრაობის უნარი დააკარგვინა და ცოტა ხნის წინ გარდაიცვალა კიდეც. ვერონიკმა ჯერ კიდევ მაშინ გამოავლინა დიდი გავლენა შვილზე, როცა წინა კონტრაქტი გააფორმა “პარი სენ-ჟერმენთან”.

სანამ ხელშეკრულებას მოეწერებოდა ხელი, ქალბატონმა თქვა, რომ პარიზულ კლუბს სულ სხვა აქცენტები აქვს და არ ზრუნავს მისი აღზრდილების შენარჩუნებაზე. ამ ბრალდებას მყისვე გასცა პასუხი პსჟ-ის მაშინდელმა მწვრთნელმა ლორან ბლანმა - ადრიანის ახლობლები ხელს უშლიან მოლაპარაკებასო...

გადმოვინაცვლოთ დღევანდელობაში და ვთქვათ, რომ “ბარსელონასთან” მოლაპარაკებას თავად ქალბატონი ვერონიკი აწარმოებდა. კატალონიურ კლუბში ჩათვალეს, რომ ფეხბურთელის დედის მოთხოვნები არასტაბილურობით ხასიათდებოდა. სწორედ ამან შეიყვანა ჩიხში მოლაპარაკებები.

თანაც, “ბარსელონამ” შეძლო და იყიდა ჰოლანდიელი ვუნდერკინდი ფრენკი დე იონგი. ის კატალონიური კლუბის შემადგენლობაში სულ მალე ითამაშებს. ბოლო ინფორმაცია კი ის არის, რომ “ბარსასა” და რაბიოს შორის მოლაპარაკება ისევ განახლდა. რა არის ამის მიზეზი? ალბათ, ის, რომ ცოტა ხნის წინ ფეხბურთელმა დედა აგენტობიდან ჩააჩოჩა.

ბევრი მიიჩნევს, რომ რაბიომ ასეთი გადაწყვეტილება ერთადერთი მიზნით მიიღო - დედამისის ზღვარგადასული მოთხოვნებით არ გააბრაზოს “ბარსელონა”. ადრიანს ძალიან უნდა კატალონიურ კლუბში თამაში და მზადაა, საამისოდ დიდი მსხვერპლიც გაიღოს.

დანარჩენს ერთად ვნახავთ. ფაქტია, “ბარსასა” და ფეხბურთელის ინტერესები ამ შემთხვევაში ერთმანეთს ემთხვევა. კატალონიელებს ნამდვილად სჭირდებათ “ახალი სისხლი”, განსაკუთრებით მოედნის ცენტრში.

სწორედ რაბიო შეიძლება იყოს ის ფეხბურთელი, ვისი გადაბირებაც ასე თუ ისე დაამშვიდებს კატალონიელთა ქომაგებს. ახალგაზრდა ფეხბურთელს ჯერ კიდევ ბევრი რამ აქვს სათქმელი და “ბარსელონა” საამისოდ მართლაც რომ შესანიშნავი “ტრიბუნაა”...

P.S პსჟ რაბიოს ხელფასს უქვითავს

“პარი სენ-ჟერმენის” ხელმძღვანელობა აპირებს ხელფასის ნაწილი ჩამოაჭრას ნახევარმცველ ადრიენ რაბიოს. სააგენტო “ფრანს პრესის” (AFP) ცნობით, პარიზული კლუბი აამოქმედებს 23 წლის ფეხბურთელის კონტრაქტში არსებულ პუნქტს, რომლის მიხედვითაც შეუძლია ჯამაგირის შემცირება მოთამაშის მხრიდან ეთიკური დარღვევის შემთხვევაში.

ამგვარი სასჯელის საბაბი უნდა გახდეს რაბიოს არყოფნა შეკრებაზე, რომელიც “პარი სენ-ჟერმენმა” ყატარში 13-17 იანვარს გამართა. მაშინ, ფეხბურთელს საპატიო მიზეზი ჰქონდა - ჯერ ბებია დაკარგა, შემდეგ კი მამის მდგომარეობა დამძიმდა და ის მოგვიანებით გარდაიცვალა. “პარი სენ-ჟერმენის” ხელმძღვანელობამ რაბიო პარიზში დატოვა, მაგრამ ახლა უნდა ხელფასის ნაწილის დაქვითვა.

შეგახსენებთ, რომ რაბიო ჩამოშორებულია ძირითად გუნდს კლუბთან კონტრაქტის გაფორმებაზე უარის თქმის გამო.

ყოველდღიური სპორტული გაზეთი "ლელო"
997
მკითხველის კომენტარები / 0 /
მსგავსი ამბები
რუბრიკის სხვა სიახლეები
;