მუნდიალი 2018. არგენტინის ნაკრები - ყველაფერი ან არაფერი

ლეო მესის აქვს უნიკალური, მაგრამ უკანასკნელი შანსი ერთხელ და შესაძლოა, სამუდამოდ, ჩაეწეროს ფეხბურთის ისტორიაში საუკეთესო მოთამაშედ. ამისთვის მან "ალბისელესტეს" მსოფლიოს ჩემპიონატი უნდა მოაგებინოს...

- დავასრულებ თუ არა სანაკრებო კარიერას ამ მუნდიალის შემდეგ? არ ვიცი, ყველაფერი იმაზე იქნება დამოკიდებული, თუ როგორ ვითამაშებთ მსოფლიოს ამ ჩემპიონატზე. როგორ დასრულდება აქ ყველაფერი ჩვენთვის. სამი ფინალი დავთმეთ და პრესა ამას მხოლოდ უარყოფითი კუთხით გვიფასებს, არადა, ფინალში გასვლა დიდი წარმატებაა. არგენტინის ნაკრებს ისეთი ფეხბურთელები ჰყავს, როგორებსაც ნებისმიერი ნაკრები ინატრებდა - განუცხადა ლიონელ მესიმ კატალონიურ პრესას მას მერე, რაც არგენტინის ნაკრები რუსეთში ჩავიდა.

როგორც ხედავთ, ლეოსთვის ყველაფერი ამ მუნდიალზე ირკვევა. მას ცუდად ახსოვს წინა მუნდიალის ფინალი, ბოლო ორი ფინალი კოპა ამერიკაზე... ის ერთხელ უკვე გაიქცა ნაკრებიდან და ამის გაკეთება არც მეორედ გაუჭირდება, თუ ყველაფერი ცუდად იქნება.

ხორხე სამპაოლის გუნდი მუნდიალის ერთ-ერთი ფავორიტია, თუმცა თუ, სიტყვაზე, ბრაზილიელებისგან, გერმანელებისგან და ესპანელებისგან ჩავარდნას არ ელიან, "ალბისელესტესგან" ყველაფერი არის მოსალოდნელი, კარგიც და ცუდიც და ეს ამ ნაკრების ნებისმიერმა ფანმა კარგად უწყის.
მესის მართლაც დიდი მისია აკისრია, მაგრამ მარტო "ბარსას" ფორვარდი ვერაფერს იზამს თუ მას გვერდში თანაგუნდელები არ ამოუდგებიან.

იკარდი

ხორხე სამპაოლი უკვე მწვავედ გააკრიტიკეს - მან იტალიის ჩემპიონატის ბომბარდირი და მსოფლიოს ერთ-ერთი საუკეთესო ფორვარდი მაურო იკარდი შინ დატოვა. სამპაოლის თავდასხმაში ისეთი სუპერვარსკვლავები ჰყავს, როგორიც სერხიო აგუერო, გონსალო იგუაინი და პაულო დიბალა არიან (მესიზე რომ აღარაფერი ვთქვათ), მაგრამ, სიმართლე ითქვას, იკარდი არც ერთ მათგანს არ ჩამოუვარდება თუ არ სჯობს კიდეც მათ (არც აქ ვგულისხმობთ ლეოს).

იკარდის არ წაყვანაში ყველა ქვედა დინებებს ხედავს, რადგან სპორტული თვალსაზრისით მართლაც ძნელია ამ გადაწყვეტილების გამართლება. არსებობს თუ არა "მესის კლანი" და მის მიერ დაიბლოკა თუ არა იკარდი, ახლა მხოლოდ მკითხაობა შეიძლება, გავა წლები და ამ ამბავსაც ნათელი მოეფინება.

უიღბლობა

უცნაურ გადაწყვეტილებებს უიღბლობაც დაერთო. ჯერ ვარჯიშზე უმძიმესი ტრავმა მიიღო არგენტინელთა მთავარმა გოლკიპერმა სერხიო რომერომ და ის მუნდიალზე ვერ წავიდა. შემდეგ კი მანუელ ლანსინიმ მიიღო ტრავმა და სამპაოლის მისი შეცვლაც მოუხდა. ახლა ევერ ბანეგაა ტრავმირებული, თუმცა ექიმები იმედს არ კარგავენ, რომ ის გამოჯანმრთელებას შეძლებს. თუ არა და, არგენტინას ძალიან გაუჭირდება - ნახევარდაცვა გუნდის ერთ-ერთი ყველაზე სუსტი წერტილია და იქ თუ არც ბანეგა ითამაშებს...

ტაქტიკა

სამპაოლი გუნდს ან 2-3-3-2 ტაქტიკით ათამაშებს ან 4-1-3-2-ით. კარში ალბათ, არმანი ჩადგება. უკან ეს ხუთეული მოიაზრება - ფასიო, ოტამენდი, ანსალდი, მასკერანო, ტალიაფიკო.
ბანეგას შუა ხაზში პავონი და დი მარია დაეხმარებიან, წინ კი მესი და აგუერო დაიწყებენ. როგორც ხედავთ, სამპაოლის შეტევის გვარიანად გაძლიერება ნებისმიერ დროს შეეძლება.

საიდუმლო იარაღი

ნაკრების საიდუმლო იარაღი 22 წლის ბოკელი კრისტიან პავონია, რომელმაც ბოლო ორ სეზონში ძალზე მოუმატა. ლეო მესი "ბარსას" პავონის შეძენას ურჩევს. მის ანგარიშზე არგენტინის ჩემპიონატში 6 გოლი და 11 საგოლე პასია. პავონის ნაკლი ფიზიკური მზადყოფნაა, ის ტანდაბალია და შეიძლება, ძლიერ ოპონენტებთან დაიჩაგროს, თუმცა 23-წლამდელ ფეხბურთელებში მუნდიალის მონაწილეებს შორის, ალბათ, ყველაზე ნიჭიერია.

პირველი ადგილი
აუცილებლობაა

ჯგუფში არგენტინელთა მეტოქეები ნიგერია, ხორვატია და ისლანდია არიან. საკმაოდ კონკურენტუნარიანი ჯგუფია. არგენტინას ძალიან სჭირდება ამ ჯგუფის მოგება, რადგან ამ შემთხვევაში ის, დიდი ალბათობით, დანიას, პერუს ან ავსტრალიას შეხვდება. ეს კი მესის და კომპანიის მეოთხედფინალისტობის უტყუარი ნიშანია. აი, მერე რა მოხდება, ეს უკვე არავინ იცის...

ყოველდღიური სპორტული გაზეთი "ლელო"
916
მკითხველის კომენტარები / 0 /
;