მუნდიალი 2018. მერვედფინალის სიმბოლური ნაკრები

მსოფლიოს ჩემპიონატი ნელ-ნელა უახლოვდება აპოგეას. ვნახეთ მერვედფინალები, პარასკევს და შაბათს მეოთხედფინალები გველოდება...

ამასობაში კი მუნდიალს ბევრი კარგი ფეხბურთელი დაემშვიდობა, რომ აღარაფერი ვთქვათ მეგავარსკვლავებზე - ლიონელ მესისა და კრიშტიანო რონალდოზე. ეს კი იმის ნიშანია, რომ მსოფლიოს საუკეთესო ფეხბურთელის ტახტი თავისუფალია და მის დასაკავებლად ბრძოლა დაწყებულია.

ასე რომ, წარსულში რჩება დიდი და ლამაზი ეპოქა. გვწყდება თუ არა გული ამაზე, ეს ცალკე თემაა, ეპოქის ცვლა კი, ზოგადად, ყოველთვის საინტერესო პროცესია...

პოპულარულმა საფეხბურთო ვებგვერდმა გოალ.ცომ-მა შემოგვთავაზა მერვედფინალის სიმბოლური ნაკრების მისეული ვერსია. ძალიან მაღალი ალბათობით, სწორედ ამ ფეხბურთელებს შორის "იმალება" მიმდინარე მუნდიალის საუკეთესო მოთამაშე, და არა მარტო ამ მუნდიალის...

იგორ აკინფეევი
მეკარე, რუსეთი

შესანიშნავი იყო ესპანეთთან პენალტების სერიაში. მოიგერია კოკესა და დიეგო ასპასის 11-მეტრიანები. შეიძლებოდა, მისი კონკურენტი ყოფილიყო ხორვატთა მეკარე დანიელ სუბაშიჩი, მაგრამ აკინფეევმა უშუალოდ თამაშის დროსაც არა ერთი შესანიშნავი "სეივი" შემოგვთავაზა.

მარიო ფერნანდესი
მარჯვენა მცველი, რუსეთი

მაქსიმალურად შეზღუდა საფრთხე ესპანელთა შეტევის მარცხენა ფლანგზე, რითიც გვარიანად დაეხმარა თავის გუნდს თამაშის პენალტების სერიამდე მიყვანაში.

ვიქტორ ლინდელიოფი
ცენტრალური მცველი, შვედეთი

შესანიშნავი ტანდემი შექმნა ვეტერან ანდრეას გრანკვისტთან. უშუალოდ მერვედფინალურ მატჩში კი გამორჩეული როლი ითამაშა შვედეთის ნაკრების კარის "მშრალად" შენახვაში.

დიეგო გოდინი
ცენტრალური მცველი, ურუგვაი

უდავოდ გამორჩეულია მიმდინარე მუნდიალზე და ჩინებული იყო უშუალოდ მერვედფინალშიც. მისი როლი კრიშტიანო რონალდოსა და სხვა პორტუგალიელი შემტევების განეიტრალებაში, განუზომლად დიდია.

დიეგო ლაქსალტი
მარცხენა მცველი, ურუგვაი

ის შეიძლება ამ მსოფლიოს ჩემპიონატის ერთ-ერთი აღმოჩენაც იყოს. პორტუგალიასთან მატჩში შესანიშნავად გამოიყურებოდა როგორც უშუალო მოვალეობების შესრულებისას, ასევე მაშინ, როცა ედინსონ კავანისა და ლუის სუარესს მის ფლანგზე "უსუფთავებდა" სივრცეებს შეტევებისთვის.

პოლ პოგბა
ცენტრალური ნახევარმცველი, საფრანგეთი

საფრანგეთის ნაკრების გული და სული უკვე მსოფლიო კლასიკად ქცეულ დაპირისპირებაში, რომელშიც "ლურჯებმა" 4:3 მოუგეს არგენტინას. პოგბა ბურთის ართმევაშიც კარგი იყო და ჩინებული პასებითაც ამარაგებდა კილიან მბაპეს, ოლივიე ჟირუსა და ანტუან გრიზმანის შემტევ ტრიოს.

მარუან ფელაინი
ცენტრალური ნახევარმცველი, ბელგია

იაპონიასთან გამარჯვებაში გადამწყვეტი იყო მისი თავური, რის შემდეგაც ანგარიში გათანაბრდა (2:2) და ბელგია მყარად "დაბრუნდა თამაშში". ის შეცვლაზე შევიდა და "მეორე სართულზე" მუდმივ წნეხში ჰყავდა იაპონელი მცველები.

ტაკაში ინუი
ცენტრალური ნახევარმცველი, იაპონია

მიუხედავად იმისა, რომ იაპონია გავარდა, ინუის ბრწყინვალე შორეულმა გოლმა, პასებმა და დრიბლინგებმა გუნდი მეოთხედფინალის ზღვართან მიიყვანა. მან ყველაფერი გააკეთა გამარჯვებისთვის და არ არის დამნაშავე იმაში, რაც თამაშის ბოლოს მოხდა.

კილიან მბაპე
თავდამსხმელი, საფრანგეთი

მისი დუბლი იყო გადამწყვეტი საფრანგეთის ნაკრების გამარჯვებაში. თუ ასე გააგრძელა, დიდი შანსი აქვს, მუნდიალის საუკეთესო ფეხბურთელი გახდეს.

ედინსონ კავანი
თავდამსხმელი, ურუგვაი

შეიძლება ითქვას, პირადად მოაგებინა ურუგვაის, პორტუგალიის ნაკრების კარში გატანილი ორი გოლის (მეორე, უბრალოდ, შედევრი იყო) წყალობით. შესანიშნავად მოქმედებდა შეტევის ყველა პოზიციაზე. ალბათ, მისი და ლუის სუარესის წყვილი, ამ მომენტისთვის, საუკეთესოა მუნდიალზე.

ნეიმარი
თავდამსხმელი, ბრაზილია

შეიძლება, ბევრს აღიზიანებს მისი სამსახიობო მონაცემების დემონსტრირება, მაგრამ უშუალოდ სათამაშო სიტუაციებში შესანიშნავი იყო მექსიკასთან შეხვედრაში. ჯერ თავად გაიტანა გოლი, თამაშის ბოლოს კი რობერტო ფირმინოს გაუმართა ხელი.

ყოველდღიური სპორტული გაზეთი "ლელო"
545
მკითხველის კომენტარები / 0 /
;