მუნდიალი 2018. ჩემპიონები და პატარა ქვეყნის დიდი გმირები

საფრანგეთი 4:2 ხორვატია

გოლები: 1:0 მანჯუკიჩი (18-საკ. კარში), 1:1 პერიშიჩი (28), 2:1 გრიზმანი (38-პენ), 3:1 პოგბა (59), 4:1 მბაპე (65), 4:2 მანჯუკიჩი (69)

საფრანგეთი (4-3-3): ლორისი - პავარი, ვარანი, უმტიტი, ერნანდესი - პოგბა, კანტე (55. ნზონზი), მატუიდი (73. ტოლისო) - მბაპე, ჟირუ (81. ფეკირი), გრიზმანი
მწვრთნელი: დიდიე დეშამი

ხორვატია (4-2-3-1): სუბაშიჩი - ვრსალკო, ლოვრენი, ვიდა, სტრინიჩი (81. პიაცა) - რაკიტიჩი, ბროზოვიჩი - რებიჩი (71. კრამარიჩი), მოდრიჩი, პერიშიჩი - მანჯუკიჩი
მწვრთნელი: ზლატკო დალიჩი

გაფრთხილება: კანტე (27), ერნანდესი (41), ვრსალკო (90+2)
არბიტრი: ნესტორ პიტანა (არგენტინა)

ფინალის შემდეგ

დიდიე დეშამი (საფრანგეთის ნაკრების მწვრთნელი): "დღეს ჩვენთან ერთად მთელი საფრანგეთი და მილიონობით ქომაგი ხარობს მსოფლიოში.

შემტევი, სანახაობრივი ფეხბურთის დემონსტრირება გვინდოდა და, ალბათ, გამოვიდა, რადგან 4 გოლი გავიტანეთ. მსოფლიოს ჩემპიონობა განსაკუთრებული მოვლენაა თითოეული ფეხბურთელის ცხოვრებაში და დღეს ჩვენ, ყველანი, ძალიან ბედნიერები ვართ".

ზლატკო დალიჩი (ხორვატიის ნაკრების მწვრთნელი): "ჩვენ ძალიან გვინდოდა გამარჯვება... მეორე ტაიმში აღარ გვეყო ფიზიკური ძალა. ყველაფრის მიუხედავად, ჩემი ბიჭები გმირები არიან და მე მათ ძალიან დიდ მადლობას ვუხდი. დღეს ჩვენი პატარა ქვეყანა ამ გუნდით ამაყობს".

ლუკა მოდრიჩი (ხორვატიის ნაკრების კაპიტანი): "ჩემთვის ყოველთვის გუნდური ტიტულები დგას წინა პლანზე. მერჩივნა, ხორვატიას მოეგო მუნდიალი და საერთოდ არ მინდოდა საუკეთესო ფეხბურთელის ჯილდო... მარცხის მიუხედავად, ჩვენ მაინც ბედნიერები და ამაყები ვართ. თავი არ დაგვიზოგავს. ვამაყობ ჩემი თანაგუნდელებით! დიდებულია, რასაც მივაღწიეთ".

ანტუან გრიზმანი (საფრანგეთის ნაკრების შემტევი): "ჩვენ მსოფლიოს ჩემპიონები ვართ და ამით ყველაფერია ნათქვამი. ეს დღე უბედნიერესია ჩემს ცხოვრებაში. ამისკენ დიდხანს მივდიოდით და ყველაფერი ისე დასრულდა, როგორც ჩვენ, როგორც მთელ საფრანგეთს უნდოდა".

საფრანგეთის ნაკრებმა ისტორიაში მეორედ მოიგო მსოფლიოს ჩემპიონატი. რა თქმა უნდა, გამარჯვებულებს არ ასამართლებენ. ლოგიკურად რომ ვთქვათ, ფრანგებს ამ მუნდიალზე საუკეთესო გუნდი ჰყავდათ და ისინი პირველობას იმსახურებდნენ, მაგრამ ფინალმა მაინც დატოვა კონკრეტული კითხვის ნიშნები...

მინიმუმიდან მაქსიმუმი

დღევანდელ ფეხბურთში ძალიან დიდი მნიშვნელობა ენიჭება საგოლე მომენტების ყაირათიანად გამოყენებას. საფრანგეთის ნაკრებმა ამ მხრივ, პრაქტიკულად, იდეალურად ითამაშა. ორიოდე გაცუდებული მომენტიც იმ დროიდან გვახსენდება, როცა თამაშის ბედი თითქმის გადაწყვეტილი იყო.

საფრანგეთის ნაკრებს აქვს ხორვატებზე მეტი რესურსი, უფრო გრძელი სათადარიგო სკამი. ამიტომ, ყველასთვის გასაგები მიზეზების გამო, მეტოქეზე მეტი შანსი შემორჩა. აქედან გამომდინარე, მათი ტრიუმფი სავსებით დამსახურებულია.

მარტოკაცი ჭამაშიაც ბრალიაო

მსოფლიოს ჩემპიონატი დაემორჩილა იმ რკინის ლოგიკას, საითაც მიდის დღევანდელი ფეხბურთი და ამაში გასაკვირი არც არაფერია. მუნდიალი მოიგო ყველაზე გუნდურმა ნაკრებმა, რომელსაც შემადგენლობაში აქვს იდეალური კონკურენცია. უკეთ რომ ვთქვათ, ფრანგთა შორის, პრაქტიკულად ყველა პოზიციაზე, ორი თანაბარი ძალის ფეხბურთელია.

რა თქმა უნდა, ბევრს უნდოდა, უმაღლეს საფეხბურთო ოლიმპზე ლიონელ მესი ან კრიშტიანო რონალდო ენახა, მაგრამ დღევანდელი ფეხბურთი ისეთია, რომ ერთი კაცი, რაც უნდა ძლიერი ფეხბურთელი იყოს, ვერაფერს მოიგებს.

ნეტავ, სად არის მაქსიმუმი?

ამ მუნდიალმა ისე ჩაიარა, საფრანგეთის ნაკრები, ამ სიტყვის პირდაპირი მნიშვნელობით, არ დამდგარა უფსკრულის პირას. დიდიე დეშამის გუნდი თითოეული მატჩის კონკრეტულ მონაკვეთში უმატებდა და ეს მომატება საკმარისი ხდებოდა გამარჯვების მოსაპოვებლად.

პირადად მე, ჯერაც ვერ ვიპოვე პასუხი კითხვაზე, სად არის საფრანგეთის ნაკრების მაქსიმუმი. უბრალოდ, ამ ჩემპიონატზე "ლურჯებს" მისი ჩვენება არ დასჭირვებიათ და იმიტომ. გუნდის ასაკიდან გამომდინარე, ფრანგებს თავისუფლად შეუძლიათ ამ ყველაფრის დემონსტრირება ყატარის მუნდიალზე, მანამდე კი ევროპის ჩემპიონატია...

გმირები

ხორვატიის ნაკრები გმირია! ხორვატებისა და, ალბათ, მსოფლიოს დიდი ნაწილისთვის ზლატკო დალიჩის ფეხბურთელები მსოფლიოში საუკეთესონი არიან. ხორვატიამ, რომელმაც ზედიზედ სამი 120-წუთიანი მატჩი ითამაშა, საიდანაც ორჯერ პენალტების სერიის ნერვულ ჭიდილშიც გაიმარჯვა, ბოლომდე იბრძოლა და არც 1:4-ზე გატყდა.

პატარა ხორვატია ამაყობს თავისი ნაკრებით და ეს დიდი გამარჯვება ჩვენთვისაც ნიშანდობლივია. როცა პატარა ერი ამას ახერხებს, შენც გიჩნდება ამბიცია და შეგრძნება, რომ შეგიძლია, ასეთი თუ არა, ამაზე ცოტა ნაკლები სიხარული მაინც განიცადო...

კითხვის ნიშნები

ფრანგებმა დამსახურებულად მოიგეს და ამაზე ორი აზრი არ შეიძლება იყოს, მაგრამ კითხვის ნიშნები მაინც გაჩნდა არგენტინელი არბიტრის, ნესტორ პიტანას მსაჯობის მიმართ. ფრანგების მიერ გატანილი პირველი გოლი "სტანდარტს" მოჰყვა. ბევრი მიიჩნევს, რომ იმ ეპიზოდში ჯარიმა არ იყო...

ყველაზე დიდი სჯა-ბაასი კი ხორვატთა კარში დანიშნულ 11-მეტრიანს მოჰყვა, რომლის დროსაც პიტანამ ვიდეორეფერი დაიხმარა. უკვე ძალიან ძნელია იმის თქმა, რა დროს ნიშნავენ ხელით თამაშისას პენალტს და რა დროს - არა.

ფაქტია, პიტანამ 11-მეტრიანის ნიშნულისკენ გაიშვირა ხელი, მაგრამ ისიც გვახსოვს, რომ გაცილებით აშკარა ყოფილა ხელით თამაში და არბიტრის სასტვენი დადუმებულა...

ყატარამდე!

ოთხი წლის შემდეგ მუნდიალი ყატარში გაიმართება. ხანგრძლივი ლოდინი მოგვიწევს, მაგრამ თავს იმით ვიმშვიდებთ, ყოველ წელს რომ ტარდებოდეს, აშკარად დაეკარგებოდა ფასი. ასეთ ლოდინსაც თავისი ხიბლი და ეშხი აქვს.

შემოდგომა-ზამთარში მუნდიალი არასოდეს გვინახავს და არც ყატარია საფეხბურთო ქვეყანა, მაგრამ მის უდიდებულესობას მაინც მოუთმენლად დაველოდებით!


* საფრანგეთის ნაკრები მეორედ გახდა მსოფლიოს ჩემპიონი. პირველად ფრანგებმა მუნდიალი 20 წლის წინ, 1998 წელს, საკუთარ კედლებში მოიგეს, დაამარცხეს რა ფინალში ბრაზილიის ნაკრები - 3:0. საინტერესოა, რომ დღევანდელი გუნდის ერთ-ერთი ლიდერი, კილიან მბაპე, მაშინ დაბადებულიც არ იყო.

* ფრანც ბეკენბაუერისა და მარიო ზაგალოს შემდეგ დიდიე დეშამი მესამეა, ვინც მსოფლიოს ჩემპიონატი მოთამაშის რანგშიც მოიგო და მწვრთნელის ამპლუაშიც.

* ბრაზილიის ნაკრების შემდეგ (1970) საფრანგეთის ეროვნული გუნდი გახდა პირველი, ვინც მუნდიალის ფინალში 4 გოლი გაიტანა.

* მარიო მანჯუკიჩი გახდა პირველი ფეხბურთელი, ვინც მსოფლიოს ჩემპიონატის ფინალში ავტოგოლი გაიტანა.

* 19 წლისა და 207 დღის კილიან მბაპე მეორე ახალგაზრდა ფეხბურთელია მუნდიალების ისტორიაში, ვინც ფინალში გოლის გატანა მოახერხა. 1958 წელს პელემ ეს 17 წლისა და 249 დღის ასაკში შეძლო.

* პოლ პოგბა "მანჩესტერ იუნაიტედის" პირველი ფეხბურთელი გახდა, ვინც მსოფლიოს ჩემპიონატის ფინალში გაიტანა.

* ჰოლანდიელი ერნი ბრანდსტის შემდეგ (1978) მარიო მანჯუკიჩი გახდა მეორე ფეხბურთელი, ვინც მსოფლიოს ჩემპიონატის ერთ მატჩში გოლიც გაიტანა და ავტოგოლიც.

მსოფლიოს ჩემპიონატის ყველა ფინალი

1930 (ჩატარდა ურუგვაიში)
ურუგვაი-არგენტინა 4:2
1934 (იტალია)
იტალია-ჩეხოსლოვაკია 2:1, დდ
1938 (საფრანგეთი)
იტალია-უნგრეთი 4:2
1950 (ბრაზილია)
ურუგვაი-ბრაზილია 2:1*
1954 (შვეიცარია)
გფრ-უნგრეთი 3:2
1958 (შვედეთი)
ბრაზილია-შვედეთი 5:2
1962 (ჩილე)
ბრაზილია-ჩეხოსლოვაკია 3:1
1966 (ინგლისი)
ინგლისი-გფრ 4:2, დდ
1970 (მექსიკა)
ბრაზილია-იტალია 4:1
1974 (გფრ)
გფრ-ჰოლანდია 2:1
1978 (არგენტინა)
არგენტინა-ჰოლანდია 3:1, დდ
1982 (ესპანეთი)
იტალია-გფრ 3:1
1986 (მექსიკა)
არგენტინა-გფრ 3:2
1990 (იტალია)
გფრ-არგენტინა 1:0
1994 (აშშ)
ბრაზილია-იტალია 0:0, პენ 3:2
1998 (საფრანგეთი)
საფრანგეთი-ბრაზილია 3:0
2002 (კორეა/იაპონია)
ბრაზილია-გერმანია 2:0
2006 (გერმანია)
იტალია-საფრანგეთი 1:1, პენ 5:3
2010 (სამხ. აფრიკა)
ესპანეთი-ჰოლანდია 1:0, დდ
2014 (ბრაზილია)
გერმანია-არგენტინა 1:0, დდ
2018 (რუსეთი)
• საფრანგეთი-ხორვატია 4:2
- გამარჯვებული გაირკვა მეორე ჯგუფური ეტაპის ბოლო მატჩში, რომელსაც დე-ფაქტო ფინალის სტატუსი მიენიჭა.


ყველა პრიზიორი

1930
ურუგვაი
არგენტინა
აშშ*
1934
იტალია
ჩეხოსლოვაკია
გერმანია
1938
იტალია
უნგრეთი
ბრაზილია
1950
ურუგვაი
ბრაზილია
შვედეთი**
1954
გფრ
უნგრეთი
ავსტრია
1958
ბრაზილია
შვედეთი
საფრანგეთი
1962
ბრაზილია
ჩეხოსლოვაკია
ჩილე
1966
ინგლისი
გფრ
პორტუგალია
1970
ბრაზილია
იტალია
გფრ
1974
გფრ
ჰოლანდია
პოლონეთი
1978
არგენტინა
ჰოლანდია
ბრაზილია
1982
იტალია
გფრ
პოლონეთი
1986
არგენტინა
გფრ
საფრანგეთი
1990
გფრ
არგენტინა
იტალია
1994
ბრაზილია
იტალია
შვედეთი
1998
საფრანგეთი
ბრაზილია
ხორვატია
2002
ბრაზილია
გერმანია
თურქეთი
2006
იტალია
საფრანგეთი
გერმანია
2010
ესპანეთი
ჰოლანდია
გერმანია
2014
გერმანია
არგენტინა
ჰოლანდია
2018
საფრანგეთი
ხორვატია
ბელგია

* - პირველ მსოფლიოს ჩემპიონატზე მესამე ადგილისთვის მატჩი არ ჩატარებულა. ფიფამ ბრინჯაოს პრიზიორად სცნო აშშ, რომელსაც ტურნირზე საერთო მონაცემები იუგოსლავიაზე უკეთესი ჰქონდა.
** - მესამეადგილოსანი გამოვლინდა მეორე ჯგუფურ ეტაპზე უკეთესი მაჩვენებლებით.

ყოველდღიური სპორტული გაზეთი "ლელო"
774
მკითხველის კომენტარები / 0 /
;