მუნდიალს გია გეგუჩაძე აფასებს: გაიმარჯვა ტოტალური ფეხბურთის ელემენტებმა

მსოფლიოს ჩემპიონატის შეფასება ვთხოვეთ ქართულ რეალობაში ერთ-ერთ ყველაზე წარმატებულ მწვრთნელს, გია გეგუჩაძეს.

ის ახლა ბათუმის "დინამოს" მიუძღვის უმაღლესი ლიგისკენ, აქამდე კი წარმატებით წვრთნიდა რამდენიმე ქართულ კლუბს, მუშაობდა საქართველოს ახალგაზრდულ ნაკრებშიც...

- მსოფლიოს ჩემპიონატს პირადად მე დადებითად შევაფასებდი. ეს ტურნირი სხვა ამბებთან ერთად იმითაც დაგვამახსოვრდება, რომ არაერთი მოულოდნელი შედეგი დაფიქსირდა.

ფეხბურთი ამიტომაც არის ლამაზი და საინტერესო, რომ მოულოდნელობებს შეიცავს. საერთოდ, პროგნოზებს არ ვაკეთებ, მაგრამ ძალიან გამაკვირვა გერმანიის ნაკრების ჯგუფში ჩარჩენამ. ასევე, ველოდი, რომ ბრაზილიის ნაკრები უფრო შორს წავიდოდა... მოკლედ, მრავლად იყო სიურპრიზები.

- რადგან გერმანია და ბრაზილია ახსენეთ, ახლავე გკითხავთ - რას უნდა დავაბრალოთ ამ გუნდების წარუმატებელი გამოსვლა? ბევრის აზრით, მომქანცველმა საკლუბო სეზონმა ლიდერები გადაღალა...

- ალბათ, ყველაფერი ერთად იყო, მათ შორის, ის, რაც თქვენ აღნიშნეთ. მაგრამ მე უფრო სხვა რამეზე გავამახვილებდი ყურადღებას - ამ ორი ნაკრების მიერ საგოლე მომენტების გამოყენების ძალიან დაბალ პროცენტს. პირადად ჩემთვის, გერმანიის ნაკრებისგან ასეთი რამ რთულად წარმოსადგენი იყო.

- რა იყო თქვენთვის მთავარი სიურპრიზი ამ ჩემპიონატზე?

- ისევ გერმანიის ნაკრებზე ვიტყვი: ამ გუნდის ჯგუფში ჩარჩენა ჩემთვის ყველაზე დიდი სიურპრიზი იყო.

- ხორვატიის ნაკრებზე რას იტყოდით?

- ეს არის ძალიან შეკრული გუნდი. თითოეული მათგანი ღირსებითა და ბრძოლის ჟინით სავსე გადის მინდორზე. მეორე მხარეა ის, რომ დიდი ფეხბურთელებითაა დაკომპლექტებული. თუ გადავხედავთ მათ შემადგენლობას, ყველა ვარსკვლავია. პატარა ქვეყანაა და ყველამ ვიცით, რაც გამოიარეს. თუმცა მოახერხეს და უდიდესი სიხარული აჩუქეს თავიანთ ხალხს.

- ალბათ, იმაზე, თუ საით მიდის ფეხბურთი, შეიძლება ვიმსჯელოთ ჩემპიონზე დაკვირვებით. რას წარმოადგენს თანამედროვე საფრანგეთის ნაკრები?

- ეს არის უძლიერესი გუნდი ყოველგვარი გადაჭარბების გარეშე. ჩვენ ვამბობთ, რომ დღევანდელ ფეხბურთში უდიდესი როლი ენიჭება კონკურენციას და ეს ახლაც დამტკიცდა.

შემადგენლობას თუ გადავხედავთ, ვნახავთ, რომ საფრანგეთის ნაკრებში ერთ ადგილზე ორი თანაბარი ძალის მოთამაშე მოდის. ამ გუნდის პლუსი იყო ისიც, რომ აჩვენა ძალიან რაციონალური ფეხბურთი. მაქსიმალურად გამოიყენა საგოლე მომენტები. არ ითამაშა ისეთი ავანტიურული ფეხბურთი, როგორიც გვაჩვენა გერმანიის ნაკრებმა. ფრანგების თამაშში მრავლად იყო ტოტალური ფეხბურთის ელემენტები.

- ტოტალური ფეხბურთი ახსენეთ და იყო თუ არა ეს დომინანტი მიმართულება მუნდიალზე?

- ჩემი აზრით, ეს იყო წარმატების მომტანი ფეხბურთი. ჩვენ მრავლად ვნახეთ მისი ელემენტები და დავრწმუნდით, რომ ასეთი ფეხბურთი დღესაც ისეთივე წარმატების მომტანია, როგორიც ადრე იყო.

- რომელ ფეხბურთელებს გამოარჩევდით?

- ძალიან მომწონს ლუკა მოდრიჩი. ვიტყვი პირდაპირ, რომ უკვე კარგა ხანია, მას დიდ ფეხბურთელად მივიჩნევ და მოხარული ვარ, რომ ბოლომდე გამოავლინა თავისი თავი და გახდა ჩემპიონატის საუკეთესო ფეხბურთელი. ასევე, უნდა გამოვყო ედენ აზარი და კილიან მბაპე. ჯერ კიდევ ჭაბუკთა ჩემპიონატის შემდეგ ძალიან მომეწონა მბაპე. მას დიდი მომავალი აქვს.

- აუცილებლად უნდა გკითხოთ ესპანეთის ნაკრების კრახზე. რა იყო ამის მიზეზი? ეგრეთ წოდებული "ტიკი-ტაკა" საბოლოოდ ხომ არ გადის საფეხბურთო ავანსცენიდან?

- ჩემი აზრით, ესპანეთის ნაკრების წარუმატებლობის მიზეზი არ არის "ტიკი-ტაკა", პირიქით, ამ გუნდმა ვერ მოახერხა "ტიკი-ტაკას" თამაში. ანუ, ვერ გააკეთა ის, რაც ყველაზე უკეთ გამოსდის და, შესაბამისად, მიიღო ასეთი შედეგი. ისე, სრულყოფილი არაფერია და შეიძლება, იგივე "ტიკი-ტაკაც" ითხოვდეს განვითარებას, ახალი ხერხების დამატებას იმისთვის, რომ სწორედაც უფრო სრულყოფილი გახდეს. ესპანეთი თამაშიდან თამაშამდე სულ უფრო უფერული ხდებოდა. ბოლოს კი მოხდა ის, რაც მოხდა.

- რაიმე რევოლუციური ცვლილება თუ დაინახეთ?

- არა, ასეთი არ დამინახავს. რაღაც ცვლილებები კი იყო, რადგან ფეხბურთი ვითარდება და ეს გარდაუვალი პროცესია.

- ვიდეორეფერიზე რა აზრის ხართ?

- ერთმნიშვნელოვნად დადებითად მიმაჩნია მისი დანერგვა. ეგაა, მას ჯერ კიდევ სჭირდება დახვეწა. კარგია, რომ მსოფლიოს ჩემპიონატზე გამოიყენეს ვიდეორეფერი, მაგრამ ჯერ ზოგ დიდ ჩემპიონატშიც არაა დანერგილი. როდის დაინერგება ეს ტექნოლოგია საქართველოში, ამის თქმა ძალიან რთულია. ალბათ, ეს არ იქნება უახლოესი დროის პერსპექტივა.

რა თქმა უნდა, ვიდეორეფერიმ მნიშვნელოვნად შეამცირა შეცდომების რაოდენობა ფეხბურთში. ის თამაშის მსვლელობის დროს არც დიდ პაუზას იწვევს.

ყოველდღიური სპორტული გაზეთი "ლელო"
1044
მკითხველის კომენტარები / 0 /
;