მუნდიალს კობა ჟორჟიკაშვილი აფასებს: საფრანგეთის ნაკრების სიძლიერე მის სრულყოფილებაშია

"ქართველმა მწვრთნელებმა მსოფლიოს ჩემპიონატისგან ბევრი უნდა ვისწავლოთ"

დასრულებული მსოფლიოს ჩემპიონატის შეფასება "ლელომ" კობა ჟორჟიკაშვილს სთხოვა - მწვრთნელს, ვისაც ფიქრი და ანალიზი უყვარს. ჟორჟიკაშვილმა ახლახან დატოვა ბოლნისის "სიონი" და, რა თქმა უნდა, ჩვენი ინტერვიუს მეორე ნაწილში სიტყვა ამაზეც ჩამოვუგდეთ...

- მუნდიალის ზოგადი შეფასებით დავიწყოთ...

- მთავარი ტენდენცია ის იყო, რომ თუ წარმატების მიღწევა გინდა, ყველა რგოლში სრულყოფილად დაკომპლექტებული უნდა იყო. ადრე გვინახავს ისეთი შემთხვევები, როცა კონკრეტულ რგოლში ესა თუ ის ნაკრები შედარებით სუსტი იყო და მაინც მიუღწევია წარმატებისთვის.

ახლა ასეთი რამ აღარ მომხდარა და ეს თანამედროვე ფეხბურთის ერთ-ერთი მთავარი ტენდენციაა. ნახევარფინალში ევროპის ოთხი გუნდი გავიდა. ეს იმას ნიშნავს, რომ საფეხბურთო განათლების მიხედვით ტონის მიმცემი არის სწორედ ევროპა. ევროპაში ჩამოსული აფრიკელი თუ სამხრეთამერიკელი ფეხბურთელი იღებს სრულყოფილ საფეხბურთო განათლებას. ეს ფაქტია.

- რას იტყვით მსოფლიოს ახალ ჩემპიონზე?

- ჩვენ ხშირად გვაქვს შეხება ფრანგული სამწვრთნელო სკოლის წარმომადგენლებთან, ხშირად გვიკითხავენ ლექციებს... ფრანგები ამისკენ კარგა ხანია, მიდიან. ეს არის უმაღლეს დონეზე დაბალანსებული გუნდი, რომელსაც პრაქტიკულად არ აქვს სუსტი წერტილი და ეს ფაქტორი გადამწყვეტი აღმოჩნდა.

საფრანგეთი ევროპის ტოპჩემპიონატებისთვის კადრების მიმწოდებელი ერთ-ერთი მთავარი ქვეყანაა. ამას დაემატა ძალიან კვალიფიციური მწვრთნელის ფაქტორი და შედეგიც დადგა. მოკლედ რომ ვთქვათ, საფრანგეთის სიძლიერე იყო მის სრულყოფილებაში.

- როგორ ახსნით ხორვატიის ნაკრების ფენომენს?

- ჩემს ახალგაზრდობაში, როცა ფეხბურთს ვთამაშობდი, იყო ასეთი გამონათქვამი - მითხარი, როგორია შენი გუნდის ნახევარდაცვა და გეტყვი, როგორი გუნდი გყავსო. ხორვატებს საუკეთესო ნახევარდაცვა ჰყავთ, თუნდაც მოდრიჩისა და რაკიტიჩის ფაქტორი რად ღირს.

გარდა ამისა, ამ ნაკრებს სისხლში აქვს ბოლომდე ბრძოლა და ეს ასე რომ არ ყოფილიყო, ვერაფრით მოიგებდა ოვერტაიმებს და თერთმეტმეტრიანების სერიებს.

ხორვატიის ჩემპიონატი საუკეთესო რომ არ არის ევროპაში, ეს ყველამ ვიცით, მაგრამ ასეთ ჩემპიონატშიც კი ისინი ახერხებენ ფეხბურთელების იმ დონემდე მიყვანას, რომ ეს ფეხბურთელები მერე წამყვანმა ევროპულმა კლუბებმა აიყვანონ.

ზოგადად, ჩემპიონატის დონე მნიშვნელოვანია, მაგრამ არა - გადამწყვეტი. საფრანგეთს ძლიერი შიდა პირველობა აქვს, მაგრამ ის ევროპაში საუკეთესო რომ არ არის, ამაში, ალბათ, დამეთანხმებით.

აქვე უნდა ვთქვათ ისიც, რომ საფრანგეთის ნაკრებს ჰქონდა ძალიან ღრმა სათადარიგოთა სკამი. ეს თანამედროვე ფეხბურთში ძალიან მნიშვნელოვანი ფაქტორია.

- გერმანიისა და ესპანეთის ნაკრებთა კრახზე რას იტყოდით?

- არც ცხოვრებაში და არც ფეხბურთში უმიზეზოდ არაფერი ხდება. ჩემი აზრით, ამ ორი ნაკრების პრობლემებიდან საერთო ის არის, რომ ორივე ცოტა დაბერდა.

"ახალი სისხლის" პრობლემა ორივე შემთხვევაში დადგა. ჩვენ ერთი წლის წინ ვნახეთ კონფედერაციათა თასზე მოასპარეზე გერმანია გადახალისებული შემადგენლობით და იმ გუნდის თამაშში სხვანაირი მუხტი იგრძნობოდა. ამ ფეხბურთელებს, გერმანელებსაც და ესპანელებსაც, ყველა ტიტული აქვთ მოგებული. "დამდგარი" ფეხბურთით სცადეს ფონს გასვლა და არ გამოვიდა.

შეიძლება, ბოლომდე არც შეაფასეს მეტოქე. დღევანდელ ფეხბურთში ვერავის მოუგებ, თუ ბოლომდე არ დაიხარჯე. ჩემი აზრით, იმავე ესპანეთს დიდი კვალი დაატყო ჩემპიონატის დაწყებამდე ორი დღით ადრე მომხდარმა სამწვრთნელო ცვლილებამ. კი, იერო დიდი ფეხბურთელი და კარგი ასისტენტია, მაგრამ მთავარი მწვრთნელის ავტორიტეტი მაინც სხვაა.

- როგორ ფიქრობთ, რა შეიძლება ისწავლოს ქართველმა მწვრთნელმა მსოფლიოს ჩემპიონატისგან?

- ძალიან ბევრი რამ. მაგალითად, დღეს მიღებულია მოსაზრება, რომ ბურთის კონტროლი ყველაფერს თუ არა, ბევრ რამეს მაინც წყვეტს. ცხადია, ამაში არის სიმართლის მარცვალი. მაგრამ ბურთის ფლობას თან უნდა ახლდეს გონივრული გადასვლა დაცვიდან შეტევაში და პირიქით.

ფინალში ხორვატიას ბურთის ფლობის გაცილებით დიდი პროცენტი ჰქონდა, მაგრამ თამაში საფრანგეთმა მოიგო. მუნდიალზე გამოჩნდა ისიც, რომ არაფრით არ შეიძლება, მწვრთნელს ერთი გეგმა ჰქონდეს და იმას მიჰყვებოდეს მთელი შეხვედრის განმავლობაში. უნდა იყოს რამდენიმე გეგმა.

მარტო ფინალს რომ დავაკვირდეთ, კარგად ჩანს, რამდენჯერ შეცვალა დიდიე დეშამმა თავისი გუნდის თამაში. მნიშვნელოვანია ისიც, თუ როგორ გაიზარდა დღევანდელ ფეხბურთში სტანდარტული მდგომარეობების როლი. ჩვენ უნდა ვიმუშაოთ ერთდროულად "სტანდარტების" უკეთ გამოყენებაზე და იმაზეც, თუ როგორ ავირიდოთ თავიდან ეს "სტანდარტები". გემახსოვრებათ, საფრანგეთმა პირველი ორი გოლი სწორედ სტანდარტული მდგომარეობებიდან შეაგდო.

- ახლა ბოლნისის "სიონიდან" წასვლაზეც უნდა გკითხოთ...

- ახალი ჯერ არაფერია. შეიძლება ითქვას, მოლოდინის რეჟიმში ვარ. თან პროლიცენზიის კურსს გავდივარ. მუნდიალის რამდენიმე თამაშის ანალიზი მაქვს დავალებული და ამაზე ვმუშაობ.

რა თქმა უნდა, "სიონის" ხელმძღვანელობა არ იყო კმაყოფილი შედეგით. ამ შედეგით არც მე ვიყავი კმაყოფილი, მაგრამ, მეორე მხრივ, ყველაფერს აქვს თავისი მიზეზი. როცა მე მოვედი გუნდის მთავარ მწვრთნელად და ვნახე კონტინგენტი, მაშინვე ვთქვი, რომ "სიონის" მიზანი უმაღლეს ლიგაში ადგილის შენარჩუნება იქნებოდა და ასეც მოხდა. გუნდი იბრძვის ამისთვის და მინდა, ამ ბრძოლაში წარმატებები ვუსურვო მას.

- შემადგენლობის მხრივ, "სიონი" მართლაც ერთ-ერთი ყველაზე სუსტია საქართველოში. არ სცადეთ გუნდის ახალი ფეხბურთელებით გაძლიერება?

- "ტრანსფერმარკტზე" რომ შეხვიდეთ, "სიონის" საერთო ღირებულება ქართულ კლუბებს შორის ყველაზე დაბალია. ხელმძღვანელობას მივაწოდე სასურველი ფეხბურთელების ჩამონათვალი, მაგრამ... სამწუხაროდ, გუნდში მათი მოყვანა ვერ მოხერხდა.

მიმაჩნია, რომ ამ დროისთვის შეიძლებოდა, მეტი ქულა გვქონოდა, ცოტა გამართლების მომენტიც რომ ყოფილიყო. მჯერა, "სიონი" შეინარჩუნებს ადგილს უმაღლეს ლიგაში. მინდა წარმატება ვუსურვო კლუბის ხელმძღვანელობას, სამწვრთნელო შტაბსა და ფეხბურთელებს.

- თქვენი შეცდომები თუ იყო?

- ცხადია, უშეცდომო არც მწვრთნელია. რა თქმა უნდა, მეც მქონდა შეცდომები, მაგრამ ჩემი აზრით, გუნდის წარუმატებლობაში ამ შეცდომების წვლილი მცირეა.

ყველაფერს რომ თავი დავანებოთ, ჩემპიონატის მსვლელობისას "ხერხემალი" დაგვეშალა, რომელსაც მცველი გულვერდ თომაშვილი, ნახევარმცველი გიორგი დათუნაიშვილი და თავდამსხმელი ჯაბა დვალი შეადგენდნენ. მადლობა ფეხბურთელებს, რომლებიც ყველა შეხვედრაში ბოლომდე იხარჯებოდნენ. აშკარად ჩაგვივარდა ორი მატჩი - "ტორპედოსა" და "ჩიხურასთან", მაგრამ ამასაც ჰქონდა თავისი მიზეზები...

ყოველდღიური სპორტული გაზეთი "ლელო"
1220
მკითხველის კომენტარები / 0 /
;