მუშკეტერთა მსოფლიოს ბუდაპეშტი მასპინძლობს 

პლანეტის უძლიერესი მოფარიკავეები 15 ივლისიდან უნგრეთის დედაქალაქში მოიყრიან თავს, რადგან ბუდაპეშტი წლის უმნიშვნელოვანეს შეჯიბრებას - მსოფლიოს ჩემპიონატს უმასპინძლებს.

ეს პირველობა იმითაც არის განსაკუთრებული და მნიშვნელოვანი, რომ მედლებთან ერთად 2020 წლის ტოკიოს ოლიმპიადისთვის სარეიტინგო ქულები თამაშდება. ამ დიდ ფორუმში საქართველოს ღირსებას 10 სპორტსმენი (მთავარი მწვრთნელი სერგო ხატიაშვილი) დაიცავს. 

15 ივლისს საფარიკაო ბილიკებზე პირველები მოხმალავე ვაჟები გავლენ. ჩვენი ნაკრების ლიდერია სანდრო ბაზაძე - ახალგაზრდებში ევროპის სამგზის ჩემპიონი და უფროსებში ევროპის ჩემპიონატების სამგზის ბრინჯაოს პრიზიორი. წლეულს კაიროს გრან-პრიზე ქართული ფარიკაობის ისტორიაში პირველად მან მესამე ადგილი დაიკავა, მერე ევროპაზე დაისაკუთრა ბრინჯაო, მოსკოვის გრან-პრიზე რვა საუკეთესოში შევიდა. 

25 წლის სანდრო ბაზაძე ამჟამად FIE-ს რეიტინგით მეთორმეტე-მეცამეტე ადგილებს ინაწილებს, ამიტომ მსოფლიოზე განთესილი იქნება და შეჯიბრებაში პლეი ოფიდან, ანუ 18 ივლისიდან ჩაებმება, ხოლო 20-21 ივლისს ნაკრების სხვა წევრებთან ერთად გუნდურ პირველობაში იასპარეზებს.

-მსოფლიოს ჩემპიონატში მეხუთედ ვმონაწილეობ, - მითხრა სანდრომ. - ეს ტურნირი სხვა შეჯიბრებებისგან განსხვავებულია, რადგან გასამმაგებული სალიცენზიო ქულები თამაშდება. კარგად ვარ მომზადებული და ვეცდები, უმაღლეს შედეგს მივაღწიო. თუმცა ჩემთვის არა მარტო ინდივიდუალური, არამედ გუნდური შეჯიბრებაც განსაკუთრებულია. კარგი ბიჭები გვყავს და იმის პოტენციალი გვაქვს, რომ გავიმარჯვოთ და ტოკიოს თამაშებზე გავემგზავროთ...

15 ივლისს მოხმალავე ვაჟთაგან ჯგუფურ ტურნირში ჩაებმებიან 29 წლის ბექა ბაზაძე, 25 წლის მიხეილ მარდალეიშვილი და 20 წლის ნიკა შენგელია. რამდენიმე დღის წინ მარდალეიშვილმა იტალიაში მსოფლიოს უნივერსიადაზე ინდივიდუალურში მე-5 ადგილი დაიკავა, ხოლო უფრო ადრე პადოვაში მსოფლიოს თასზე მე-15 იყო. შენგელიამ 20-წლამდელთა ევროპის ჩემპიონატზე ბრინჯაოს მედალი დაიმსახურა. 

მოხმალავე ვაჟთა პარალელურად 15 ივლისს მოსინჯავს ძალებს დაშნით მოფარიკავე 27 წლის მაია გუჩმაზოვა, რომელიც საქართველოს სახელით მსოფლიოს ჩემპიონატებში მესამედ იასპარეზებს. 

17 ივლისს ჯგუფურ ეტაპზე იბრძოლებენ პლეი ოფში გასასვლელად რაპირით მოფარიკავეები - 22 წლის ლუკა ღაღანიძე და 21 წლის ლაშა გალუაშვილი. ლუკა წლეულს 23-წლამდელთა ევროპის ჩემპიონატში მე-14 ადგილზე გავიდა, ხოლო ამავე ასაკში მსოფლიოს თასზე ლაშამ მე-7 ადგილი დაიკავა.

მოხმალავე ქალთა ჯგუფურ ეტაპში 17 ივლისიდან გაეჯიბრებიან მეტოქეებს ევროპის ექს-ჩემპიონი 25 წლის თეოდორა კახიანი, მისი თანატოლი დარია ანტონოვა და 19 წლის ლიკა ჯიჯეიშვილი, რომელიც წლეულს 20-წლამდელთა მსოფლიოს ჩემპიონატში მეხუთე იყო. 2019 წლის ევროპის ჩემპიონატის შედეგებით სამივემ FIE-ს რეიტინგი გაიუმჯობესა. მოხმალავე ქალთა გუნდურ პირველობაში ისინი 22-23 ივლისს იბრძოლებენ. 

-ჩვენი მოფარიკავეები მსოფლიოს ჩემპიონატისთვის შესანიშნავად მოემზადნენ, - გვითხრა საქართველოს ფარიკაობის პრეზიდენტმა მერაბ ბაზაძემ. - ბოლო წლებია, ჩვენი გოგო-ბიჭები შედეგებს აუმჯობესებენ და, იმედია, ბუდაპეშტშიც გვასახელებენ. ამ შეჯიბრებას ჩვენთვის გადამწყვეტი მნიშვნელობა აქვს, რადგან მსოფლიოს თასებსა და ევროპის ჩემპიონატებთან შედარებით აქ სარეიტინგო ქულები სამმაგდება და ეს 2020 წლის თამაშების საგზურების მოსაპოვებლად გვჭირდება.

შარშან ჩინეთში მსოფლიოს ჩემპიონატზე ჩვენმა მოხმალავე ვაჟთა ნაკრებმა გუნდურში მე-4 ადგილი დაიკავა. წლეულს ევროპაზე მედლის მოპოვებაც შეგვეძლო, მაგრამ იტალიელებთან შეხვედრისას რუმინელი არბიტრის უხამსმა საქციელმა კვარცხლბეკს მიღმა დაგვტოვა - აპენინელებთან 44:45 წაგვაგებინა. ეს უმსგავსოება მთელმა ევროპამ ნახა. მაშინ ხმა არ გაგვიღია. საჩივრების წერა არ მიყვარს, მაგრამ ბუდაპეშტში უსამართლობაზე თვალს ვერ დავხუჭავ - ჩვენი სპორტსმენების დაჩაგვრას ვერავის ვაპატიებ.

ყოველდღიური სპორტული გაზეთი "ლელო"
278
მკითხველის კომენტარები / 0 /
მსგავსი ამბები
რუბრიკის სხვა სიახლეები
;