მუხლი... რა დრო დასჭირდება თორნიკე შენგელიას ტრავმის მოსაშუშებლად?

ესპანელმა ექიმებმა თორნიკე შენგელიას ტრავმირებული მიხლის შესწავლის შემდეგ დაადგინეს - ქართველი ფორვარდი ერთი თვე იუქმებს. მას ტრავმის მოსაშუშებლად და რეაბილიტაციისთვის ოთხი კვირა სჭირდება.

შეგახსენებთ, რომ მან ტრავმა ესპანეთის ჩემპიონატში, რეალთან მატჩში მიიღო. საქართველოს ეროვნული ნაკრებისა და ესპანური "ბასკონიას" კაპიტანმა "რეალის" წინააღმდეგ მატჩში, ერთ-ერთ ეპიზოდში, შეტევისას, დრიბლინგში ბურთი უკნიდან მეორე მხარეს გადაიტანა, დამცველს წამოედო და მარჯვენა მუხლი იტკინა. თორნიკემ თამაშის გაგრძელება ვერ შეძლო.

არადა, თორნიკე თამაშის იშტაზე იყო, შედეგიანადაც ირჯებოდა და ერთ-ერთ ეპიზოდში ულამაზესადაც ჩატენა. შენგელია თამაშში სათადარიგოთა სკამიდან ჩაერთო და 15:21 წუთში 10 ქულა და 5 მოხსნა მიითვალა. ქართველმა მძიმე ფორვარდმა 2-დან 1 ორქულიანი და 8-ვე საჯარიმო ჩააგდო, სამქულიანი ააცილა, მის წინააღმდეგ კი 4-ჯერ დაჯარიმდნენ.

შედეგად, ჩვენებურის სარგებლიანობის კოეფიციენტი 18-ს გაუტოლდა და ის ბასკური კლუბის რიგებში მხოლოდ ბრაზილიელ უკანახაზელ მარსელინიო უერტასს ჩამორჩა, რომელმაც 24 ქულა ჩააგდო. მატჩი მადრიდელებმა 91:74 მოიგეს, რომელთა რიგებშიც მინიმუმ 12 ქულა სასტარტო ხუთეულის ყველა წევრმა მოაგროვა, არგენტინელი ფაკუნდო კამპაცო (15 ქულა, 10 პასი) და კაბოვერდელი ვალტერ ტავარეში (14 ქულა, 10 მოხსნა) კი ორმაგ დუბლს გამორჩნენ.

აღსანიშნავია, რომ "ბუესა არენაზე" გამართულ შეხვედრას 15 544 მაყურებელი დაესწრო, რითაც ესპანური ლიგის ყველა დროის რეკორდი იქნა გამეორებული. იდენტური მაჩვენებელი 2015-16 წლების სეზონში დაფიქსირდა და საინტერესოა, რომ მაშინაც "ბასკონია"-"რეალის" ჯახზე.

"ბასკონიას" 10 მოგება და 4 მარცხი მოუგროვდა და ესპანეთის ჩემპიონატის სატურნირო ცხრილში გიორგი შერმადინის "უნიკახასთან" ერთად, მესამე-მეოთხე ადგილებს ინაწილებს.

შენგელიას გუნდი მომდევნო მატჩს 6 იანვარს, სტუმრად, "მანრესასთან" გამართავს.

ყოველდღიური სპორტული გაზეთი "ლელო"
1613
მკითხველის კომენტარები / 0 /
მსგავსი ამბები
რუბრიკის სხვა სიახლეები
;