მშენებარეები და ასაშენებლები: ფეხბურთი სტადიონების მოლოდინში

ფეხბურთი სტადიონების მოლოდინში

საქართველოში მშენებარე თუ გასანახლებელ სტადიონებზე მიმდინარე სამუშაოების თაობაზე ფეხბურთის ფედერაციის თანამშრომელმა კახა შალამბერიძემ ფოტოები გამოაქვეყნა, საიდანაც ბევრი სიახლე შევიტყვეთ...

ბათუმში კარგი ტემპია

დავიწყოთ ბათუმით, სადაც ახალი, 20-ათასიანი არენის მშენებლობა კარგი ტემპით მიდის. უკვე ამოყვანილია მეორე იარუსის კონსტრუქციები. წესით, "ბათუმი არენის" მშენებლობა 2020 წელს უნდა დასრულდეს. მაგრამ საინტერესო ისაა, რომ სამუშაოები იმდენად კარგი ტემპით მიდის, სამუშაო გრაფიკსაც კი უსწრებს.

გრაფიკზე ადრე არავინ ითხოვს მშენებლობების დასრულებას, მთავარია, დროულად, ანუ გრაფიკით გათვალისწინებულ პერიოდში დასრულდეს. ეს ის სტადიონია, სადაც საქართველოს ყველა ასაკის ნაკრები ითამაშებს და ქართულ გუნდებს დაეხმარება, რომ ევროთასებზე ასპარეზობას მხოლოდ თბილისელი მაყურებელი არ ჰყავდეს.

ფოთში დახურეს...

ბათუმის მსგავსი ტემპი ფოთში ვერ არის, სტადიონიც აგვისტოში ვერ ჩააბარეს, მაგრამ მაინც დამაიმედებელი მდგომარეობაა. "ფაზისზე" მშენებლებმა გადასახური კონსტრუქციები დაამონტაჟეს, რომელიც მალე დაიტვირთება თავისი ფუნქციით.

ფოთში ეს აუცილებელი იყო, რადგან ზღვისპირა ქალაქში წვიმა ხშირია, გადახურულ სტადიონზე კი მაყურებელი თავს დაცულად და კომფორტულად იგრძნობს.

ამას გარდა, დარჩენილია გასახდელების, საშხაპეების, მსაჯების, დელეგატის, საექიმო და დოპინგკონტროლის ოთახების მოწესრიგება. ეს სამუშაოები უკვე მიმდინარეობს, ტრიბუნებზე კი ინდივიდუალური სკამები დამონტაჟდება. იგეგმება კოსმეტიკური სამუშაოებიც.

მართალია, პირველი ეტაპის სამუშაოთა დასრულების ვადამ გადაიწია, მაგრამ არის გეგმა, რომ ეს ყოველივე წლის ბოლომდე დასრულდეს. ასეთ შემთხვევაში, "ფაზისზე" თამაში მომავალ წელს იქნება შესაძლებელი.

ახალი განათება

სამუშაოები დაწყებულია მიხეილ მესხის სახელობის სტადიონის სათადარიგო მოედანზეც, სადაც ოთხივე კუთხეში განათების სისტემა მონტაჟდება. თვის ბოლომდე ბოძები დაიდგმება და მერე პროჟექტორებიც აბდღვრიალდება.

განათების სისტემის მონტაჟი იმიტომ არის აუცილებელი, რომ "მიხეილ მესხი 2" უფრო კომფორტული და სატელევიზიოდ კარგად "შეფუთული" გახდეს. რადგან ეროვნული ლიგის თამაშების დიდ ნაწილს სწორედ ეს არენა მასპინძლობს, ახლა განათებაზე საღამოს მატჩების ჩატარება იქნება შესაძლებელი.

წყალტუბო

წყალტუბოს 26 მაისის სახელობის ცენტრალურ სტადიონზე სარეაბილიტაციო სამუშაოები წელს დაიწყო და თანამედროვე სტანდარტების ბუნებრივი საფარი დააგეს.

ქალაქის მერიის ცნობით, სარეაბილიტაციო სამუშაოები დასკვნით ეტაპზეა. ამჟამად ტრიბუნების, ლოჟების, სარბენი ბილიკებისა და სველი წერტილების რეაბილიტაცია მიმდინარეობს, რისთვისაც ადგილობრივი ბიუჯეტიდან გამოყოფილია 458 000 ლარი.

რეაბილიტაციის პროექტის განხორციელების შემდეგ, წყალტუბოს ცენტრალური სტადიონი თანამედროვე სტანდარტებს მიუახლოვდება და მესამე კატეგორიის მოთხოვნებს დააკმაყოფილებს.

"ეს საშუალებას მოგვცემს, რომ წყალტუბოში მაღალი დონის მატჩებს ვუმასპინძლოთ, რაც ხელს შეუწყობს ქალაქის ტურისტული პოტენციალის განვითარებას", - ამბობს წყალტუბოს მუნიციპალიტეტის მერი გრიგოლ იოსელიანი.

საჩხერეშიც დაიწყეს...

ტრიბუნებისა და გასახდელების აშენება საჩხერეშიც დაიწყეს. იქ სარწყავი სისტემა არ არსებობდა და ეს საკითხი უკვე მოგვარებულია.
საბოლოოდ, 2020 წლისთვის საჩხერეში 5-ათასიანი კოხტა, საფეხბურთო სტადიონი აშენდება, რომელზეც, პროექტის განხორციელების შემთხვევაში, ევროგათამაშების საწყისი ეტაპის მატჩების გამართვაც იქნება შესაძლებელი.

თუმცა, ამაზე მაინც აშენების შემდეგ ვილაპარაკოთ, რადგან მსგავსი დაპირებები უკვე იყო და სავალალო მაგალითებიც გვახსოვს. ასე რომ, სტადიონის აშენება ჯერ არ ნიშნავს, რომ იქ თამაში შესაძლებელია.

ზუგდიდის პრობლემა

ყველაზე რთულად საქმე ზუგდიდშია, სადაც სტადიონის მშენებლობა შარშან დაასრულეს, მაგრამ ფეხბურთის ფედერაცია არენას ჯერ არ იბარებს. უპირველესი მოთხოვნაა, მშენებლობისას დაშვებული შეცდომები გამოსწორდეს, რაც ზუგდიდის მერიის პრეროგატივა და ვალდებულებაა. სფფ-მ მათ შეცდომებზე მიუთითა და ახლა მათ გამოსწორებას ელოდებიან.

საქმე ისაა, რომ ზუგდიდში სტადიონის მშენებლობის პირველი ეტაპი დასრულებულია, თუმცა - უეფას სტანდარტების გათვალისწინების გარეშე. ცნობილია, რომ მოედნის გარშემო ბეტონის ჯებირი ააშენეს, რაც ხსენებული სტანდარტების უხეში დარღვევა იყო.

როგორც შევიტყვეთ, სტადიონზე ხარვეზები ჯერ არ გამოსწორებულა. ამიტომაც არის ზუგდიდის სტადიონი ჯერ კიდევ უფუნქციოდ.

მოლოდინში

23 სექტემბერს ბოლნისში სტადიონი უნდა გახსნილიყო, მაგრამ... ეს დღე ჯერ არ დამდგარა. ასევე არაფერია ცნობილი სამტრედიის ეროსი მანჯგალაძის სახელობის სტადიონზე, ქობულეთის "ჩელე არენაზე"...

რიგში კი თელავია - ამ ქალაქის გუნდი ეროვნულ ლიგა 2-შიც ლიდერთა შორისაა, საქართველოს თასის ნახევარფინალშიცაა გასული და, შესაბამისად, ევროთასებზე მოხვედრის შანსიც გაუჩნდა...

მაგრამ თელავის გივი ჩოხელის სახელობის სტადიონი გასარემონტებელია, ინდივიდუალური სკამები და ელემენტარული კომფორტი არ არის. გუნდის წინსვლისთვის კი ინფრასტრუქტურის გაუმჯობესება აუცილებელია.

იგივე ითქმის ნებისმიერ სხვა ქალაქზე. ზოგადად, წინსვლა და განვითარება მხოლოდ კარგი სტადიონებითა და მოედნებითაა შესაძლებელი.

ყოველდღიური სპორტული გაზეთი "ლელო"
1035
მკითხველის კომენტარები / 0 /
რუბრიკის სხვა სიახლეები