მშვილდოსანთა დაძაბული კალენდარი - 24-26 აპრილს საქართველოს ჩემპიონატი ოლიმპიურ დისციპლინაში

24-26 აპრილს ბათუმში, ანგისას სტადიონზე საქართველოს ჩემპიონატი გაიმართება მშვილდოსნობაში, რომელიც ოლიმპიურ დისციპლინაში ჩატარდება.

თანაც - ორ ასაკში, უფროსებსა და ახალგაზრდებში. 24-ში ოფიციალური ვარჯიშია, 15-ში საკვალიფიკაციო ეტაპი გაიმართება როგორც ქალებში, ასევე - ვაჟებში (ორივე ასაკში), 26 აპრილი კი ფინალების დღეა. 

სამწუხაროდ, ეროვნული ჩემპიონატი საკადრო პრობლემების ფონზე ჩაივლის, ვინაიდან ქალებს ორი ლიდერი დააკლდებათ - პირადში მსოფლიოს, გუნდურში კი ევროპის ვიცე-ჩემპიონი ქრისტინე ესებუა და გუნდურში ევროპის კიდევ ერთი ვერცხლის მედალოსანი იულია ლობჟანიძე. როგორც უკვე ვწერდით, ესებუა გათხოვდა, უკვე ტყუპ ბავშვებსაც ელოდება და ამჟამად კანადაშია წასული, სადაც, მინიმუმ, შვილების დაბადებამდე დარჩება კიდეც. რაც შეეხება ლობჟანიძეს, ჯანმრთელობის პრობლემების გამო ჯერჯერობით ვერ ვარჯიშობს - ოპერაცია გაიკეთა და როგორც თავად უთქვამს, ჯერ დატვირთვებით ვარჯიში არ შეიძლება. თუმცა ის მშვილდოსნობიდან არ წასულა და პარა-მშვილდოსნობაში მწვრთნელობა დაუწყია. 
მათ გარდა, ქალთა ტურნირში ყველა მეტ-ნაკლებად მნიშვნელოვანი მშვილდოსანი გამოვა, ხოლო ვაჟები უკლებლად იასპარეზებენ. 

ქვეყნის ჩემპიონატი ერთ-ერთი მთავარი შესარჩევი ეტაპია ეროვნულ ნაკრებთა დასაკომპლექტებლად. უახლოესი შეჯიბრება, რომელშიც ქალთა და ვაჟთა ეროვნული გუნდები გამოვლენ, 20-26 მაისს ანტალიაში გასამართავი მსოფლიოს თასის ეტაპია. ეს ამ რანგის რიგით მესამე ტურნირია, მანამდე კი ორი უკვე ჩატარებული იქნება. პირველი გუშინ დაიწყო კოლუმბიურ მედელინში, რომელიც 28 აპრილს დამთავრდება, ხოლო ერთ კვირაში - 6 მაისს კი მეორე დაიწყება ჩინურ შანხაიში. ჩვენები იმ შეჯიბრებებზე არ მიდიან - დიდწილად უსახსრობის გამო, თუმცა არც კალენდარია ხელსაყრელი - თავადაც ხედავთ, დროის მცირე მონაკვეთში ლამის ნახევარი დედამიწის გადაფრენ-გადმოფრენა მოუწევთ. ამიტომ გადაწყვიტეს, ის შეჯიბრებები გამოტოვონ და ანტალიაში იასპარეზონ. 

ზოგადად, მშვილდოსნებს მაისი და უახლოესი პერიოდი ფრიად დატვირთული აქვთ - მსოფლიოს თასების კალენდარი ზემოთ გითხარით და ანტალიური შეჯიბრებიდან ორ კვირაში ჰოლანდიურ ჰერტონგენბოშში სეზონის მთავარი შეჯიბრება - მსოფლიოს ჩემპიონატი გაიმართება, რომელიც წლეულს სალიცენზიო სტატუსისაა ანუ იქ ტოკიოს 2020 წლის ოლიმპიადის ლიცენზიები გაიცემა. ეს სოლიდური შეჯიბრება 16 ივნისს ჩამთავრდება, 22-ში კი მინსკში მეორე ევროპული თამაშები იწყება... ფაქტობრივად, მშვილდოსნებს ტურნირიდან ტურნირზე მოუწევთ გადასვლა, თუმცა, როგორც გითხარით, ჩვენები კოლუმბიურ-ჩინურ ბატალიებს დააკლდებიან. ბარემ აქვე ისიც ვთქვათ, რომ მსოფლიოს თასის ბოლო, მეოთხე შეჯიბრება 1-7 ივლისს ტარდება ბერლინში ანუ ევროპელ მშვილდოსნებს იქაც პირდაპირ მინსკიდან მოუწევთ გადასვლა, 9-13 ივლისს კი ნეაპოლში ზაფხულის უნივერსიადა ტარდება.

როგორც ვხედავთ, ეს შეჯიბრებაც მიბმულია წინამორბედზე, თუმცა ჯერჯერობით ვერ გეტყვით, ჩვენგან იტალიაში ვინმე გამოვა თუ არა.
ჩვენს მშვილდოსნებს შედარებითი დასვენება მაისში ექნებათ - ქვეყნის ჩემპიონატის შემდეგ და იმასაც შეკრებისთვის გამოიყენებენ. მას ისევ ბათუმში გაივლიან, ანტალიაში კი 18 მაისს გაფრინდებიან. 

ბარემ აქვე გეტყვით, რომ მინსკში, მეორე ევროპულ თამაშებზე ორი მონაწილე გვეყოლება - თითო ქალი და ვაჟი, რაც იმას ნიშნავს, რომ პირად პირველობასთან ერთად, შერეულ წყვილებშიც გამოვალთ. 

თუმცა უფროსთა გარდა, შეჯიბრებები ახალგაზრდებს და ჭაბუკებსაც ექნებათ. მაგალითად, ევროპის ახალგაზრდული თასი, რომელიც 13-18 მაისს სლოვენიურ კატეზში ჩატარდება. ჩვენები იქაც გამოვლენ, ხოლო სლოვენიაში წასაყვანი შემადგენლობა საქართველოს ჩემპიონატზე გაირკვევა. 

ყოველდღიური სპორტული გაზეთი "ლელო"
400
მკითხველის კომენტარები / 1 /
კინკრიჟა
0
ესებუას ფბ-ზე რომ შეიხედო, ლანძღავს და აგინებს ფედერაციის ხელმძღვანელობას და ლობჟანიძეც უბამს მხარს. ამაზეც დაწერეთ რამე.
მსგავსი ამბები
რუბრიკის სხვა სიახლეები
;