მშვილდოსანთა საერთაშორისო ტურნირი ბათუმში: ფუტკარაძე და ქალთა ნაკრები ფინალში არიან

ბათუმში, ანგისას სტადიონზე უკვე 25-ედ ტარდება მშვილდოსანთა საერთაშორისო ტურნირი. ამჯერად ტურნირში 8 ნაკრები გამოდის: საქართველო, სომხეთი, აზერბაიჯანი, უკრაინა, პოლონეთი, თურქეთი, ყაზახეთი და ლატვია, მონაწილეთა რაოდენობა კი 70-მდეა. 

ყველაზე დიდი გუნდით თურქეთია ჩამოსული - მათ ოლიმპიური მზადების ცენტრის 35-კაციანი ნაკრები ჩამოიყვანეს, რომელთა ერთ-ერთი მწვრთნელიც ნატო ნასარიძეა. 

სამწუხაროდ, რამდენიმე ლიდერი მასპინძლებსაც აკლიათ: არ გამოდის ჩვენი ფედერაციის პრეზიდენტი, ხათუნა ნარიმანიძე, ლაშა ფხაკაძე და ზურაბ მესტვირიშვილი. 

შაბათს საკვალიფიკაციო ეტაპი გაიმართა, რომელმაც თურქთა დიდი უპირატესობით ჩაიარა. სამწუხაროდ, ჩვენები სამეულში ვერ მოხვდნენ, თუმცა პლეი ოფებში ეს ხარვეზი რამდენადმე გამოასწორეს. 

ვაჟებში შესარჩევი ეტაპი საკმაოდ დიდი უპირატესობით მოიგო ეფენ გურკინ მოროშმა - 662 ქულა. მეხუთეზე კი ქუთაისელი ჯაბა მოსეშვილი გავიდა 643-ით. საკმაოდ კარგად გამოვიდა 15 წლის თემურ მაკიევი - 634 ქულა და მე-8 ადგილი, ჩვენგან მესამე შედეგი კი ხელვაჩაურელ ანრი ბასილაძეს ჰქონდა - 609 ქულა და მე-15 ადგილი. 

ქალებში 630-ქულიანი აისიმა კარაოღლუ პირველ ადგილზე გავიდა. ხელვაჩაურელი ციკო ფუტკარაძე 608-ით მეოთხე იყო, ხოლო ბათუმელი ნანა მახარაძე 604-ით - მეხუთე. თბილისელმა მედეა გვინჩიძემ 578 ქულა დააგროვა, რაც მე-11 შედეგი აღმოჩნდა. 

ბუნებრივია, გუნდურშიც შესარჩევი თურქებმა მოიგეს. ვაჟებში მათმა I-მა ნაკრებმა 1953 ქულით გაიმარჯვა . ჩვენგან საუკეთესოდ თბილისის ნაკრები (მაკიევი, ლევან ჩიტიშვილი, ალექსანდრე მაჭავარიანი) გამოვიდა, რომელმაც 1819 ქულა მოაგროვა და მეოთხეზე გავიდა, აჭარის ნაკრები კი (ბასილაძე, მირიან წულუკიძე, ზვიად დუმბაძე) 1696 - ქულით ბოლოსწინა, მერვე ადგილზე გავიდა. 

ქალებში თურქეთის I-მა ნაკრებმა გაიმარჯვა 1844 ქულით. მეორე აზერბაიჯანია 1797-ით, მესამეზე კი აჭარის ნაკრები (ფუტკარაძე, მახარაძე, ირა არჯევანიძე) გავიდა 1760-ით. 

გუშინ პლეი ოფები გაიმართა. ჩვენგან ქალებმა იყოჩაღეს, რომლებსაც ფინალში პირადშიც ჰყავთ მონაწილე და - გუნდურშიც. ფინალური ეტაპი დღეს გაიმართება და ამით ტურნირიც დასრულდება, პირადში კი ქალებში ოქროს მედლისთვის ფუტკარაძე იბრძოლებს, ხოლო მისი მეტოქე აზერბაიჯანელი რამაზანოვა იქნება. 

ფუტკარაძემ პლეი ოფის II წრეში თურქი ესლემ ნისა დემეზი დაამარცხა, მეოთხედფინალში მახარაძესთან 0:2 აგებდა, მაგრამ გაუთანაბრა და გადასროლაში აჯობა - 5:4, 1/2 ფინალში კი ყაზახ დიანა ტურსუნბეკს მოუგო. 

II წრეში მახარაძემ აზერბაიჯანელი სვეტლანა სიმონოვა გამოთიშა შეჯიბრებას, რითაც რევანში აუღო ლალი მწყერაშვილის წაგების გამო. არჯევანიძემ I წრეში ამალია ჯუმაევა დაამარცხა, მაგრამ შემდეგ ზემოხსენებულ თურქ კარაოღლუსთან წააგო და გამოვარდა. გვინჩიძემ ორი პაექრობა მოიგო - ჯერ თურქ გიზემ ოსკანთან, მერე კი აზერბაიჯანელ ოზაი გასიმოვასთან, ვინც საკვალიფიკაციოში მეექვსეზე გავიდა.

სამაგიეროდ, გასიმოვას წაგებისთვის „შური“ რამაზანოვამ იძია და მოუგო გვინჩიძეს. ვაჟებში მოსეშვილმა I წრეში თურქი მერიჰ სიმავი გამოთიშა შეჯიბრებას, მერე მაჭავარიანსაც მოუგო, მესამე წრეში კი გადასროლაში დამარცხდა ზემოხსენებულ თურქ აკისთან, ვინც მანამდე ლევან ჩიტიშვილიც გამოგვიგდო.

თითო წრე მაჭავარიანმა და ჩიტიშვილმაც გადალახეს. თანაც, პლეი ოფში 21-ე ადგილით შესულმა მაჭავარიანმა მე-12-ადგილოსანი ყაზახი ომარ ბეკბერგენი დაამარცხა, ხოლო მე-20 ნომრად შესულმა ჩიტიშვილმა მე-13-ზე მყოფი თურქი ოსმან აირბარს ალტუნტასი დაჯაბნა. მაკიევმა თავიდან აზერბაიჯანელ ჯაჰან მუსაევს კი აჯობა, მაგრამ მერე წააგო თურქ მუსა არზუმანთან. ბასილაძემ საწყის შეხვედრაში აზერბაიჯანელი ალექსეი კოპნინი დაჯაბნა, მაგრამ ფინალის მეორე ნომერ თურქ სერტთან ვერაფერს გახდა, როგორც მანამდე - თემურ ჯინჭარაძე.

დუმბაძე პირველივე წრეში თურქ ჩოლაკოღლუსთან დამარცხდა, იმავე ეტაპზე კი ბექა გუგეშაშვილმა მეექვსე ნომრად მყოფ უკრაინელთა მომავალ ფინალისტ არტემ მელეხოვთან დათმო, წულუკიძემ - მეშვიდე ნომერ ყაზახ მანსურ ალიმბაევთან, ხოლო ოთარ სილაგაძემ - მეორე ყაზახ ანდრეი კუზმინთან. ვაჟთა ფინალში მოროში მელეხოვს შეხვდება. 

გუნდურში ქალებში აჭარის ნაკრები ფინალშია გასული., სადაც თურქეთის I ნაკრებს შეხვდება, ხოლო ვაჟების ფინალში თურქეთის I და II გუნდები გაეჯიბრებიან ერთმანეთს. 

ქალებში ჩვენმა სამეულმა ჯერ თურქეთის III ნაკრებს აჯობა - 6:2, ნახევრაფინალში კი აზერბაიჯანს 6:0 მოუგო. ვაჟებში აჭარის გუნდმა სომხეთს აჯობა - 6:0, მაგრამ შემდეგ იმავე ანგარიშით თურქეთის I ნაკრებთან წააგო. თბილისის გუნდი მეორე წრეში თურქეთის მეორე ნაკრებთან 2:6 დამარცხდა. 

ირაკლი თავაძე
ბათუმი - თბილისი

ყოველდღიური სპორტული გაზეთი "ლელო"
104
მკითხველის კომენტარები / 0 /
მსგავსი ამბები
რუბრიკის სხვა სიახლეები
;