მშვილდოსანთა ტურნირი. ლვოვში ლვოველების გარეშე

საქართველოს მშვილდოსანთა ნაკრები ლვოვში გაფრინდა, სადაც საერთაშორისო ტურნირში მიიღებს მონაწილეობას, რომელიც უფროსებსა და ჭაბუკებში ტარდება. 

უფროსებში ვაჟთა ნაკრებში ჯაბა მოსეშვილი, ლაშა ფხაკაძე, ზურაბ მესტვირიშვილი და ნიკა თავდგირიძე გამოვლენ, ხოლო ქალებში ხათუნა ნარიმანიძე, ციკო ფუტკარაძე, ირა არჯევანიძე და თეონა კუტალაძე გამოვლენ. ერთი მონაწილე გვეყოლება ჭაბუკებში - თემურ მაკიევი. 

ჭაბუკებში ბათუმელი ანრი ბასილაძეც უნდა წასულიყო, თუმცა, სამწუხაროდ, გამგზავრებამდე ორი დღით ადრე მას მამა გარდაეცვალა, რის გამოც სახლში დარჩა. ამავე მიზეზით გამოაკლდა გუნდს მისი ბიძაც, მწვრთნელი გურამ ბასილაძე, მათ ნაცვლად კი გუნდში თავდგირიძე და კუტალაძე შეიყვანეს. 

ლვოვი ყოფილ საბჭოთა კავშირში მშვილდოსნობის ერთ-ერთი აღიარებული ცენტრი იყო, ჩვენი მშვილდოსნებისთვის კი ნაცნობი ადგილია, ხოლო ზოგიერთისთვის - სულაც მშობლიური: ლვოველია ნაკრების ყოფილი წევრი, ევროპის ვიცე-ჩემპიონი და მსოფლიოს პრიზიორი გუნდურში (ოღონდ ეს მედალი უკრაინის ნაკრების შემადგენლობაში მოიპოვა) იულია ლობჟანიძე, ხოლო მსოფლიოს ვიცე-ჩემპიონი პირადში და ევროპისა - გუნდურში ქრისტინე ესებუა, არსებითად, იქ გაიზარდა, როცა აფხაზეთის ომს გარიდებული მისი ოჯახი საბოლოოდ იქ დასახლდა. სამწუხაროდ, მიზეზთა გამო, ახლა არც ერთი მათგანი არაა გუნდში. 

ლვოვის ტურნირი ჩვენი ნაკრებისთვის ერთ-ერთი მოსამზადებელი ეტაპია, გუნდს კი წინ მნიშვნელოვანი სეზონი ელოდება - მოგეხსენებათ, ნაკრებს ჯერ არც ერთი ლიცენზია არა აქვს, მათი მოპოვების ბოლო შანსი კი საგაისო სეზონია. წლევანდელი უკვე მთავრდება - ნოემბრის ბოლოდან ზამთრის ანუ დარბაზების ტურნირების სეზონი იწყება, მათი შეჯიბრებები კი არაოლიმპიურ, 18-მეტრიან დისტანციაზე იმართება.

ამიტომ ტოკიოს ოლიმპიადის დარჩენილი საგზურები გაისად მარტიდან გათამაშდება, როცა ისევ განახლდება შეჯიბრებები ოლიმპიურ, 60-მეტრიან დისტანციებზე. 

საქართველოს ნაკრებისთვის მომდევნო ეტაპი უკვე საქართველოში - ბათუმში ჩასატარებელი საერთაშორისო ტურნირი იქნება, რომელიც 3 ოქტომბერს აიღებს სტარტს ანგისას სასროლეთზე. 

ყოველდღიური სპორტული გაზეთი "ლელო"
195
მკითხველის კომენტარები / 0 /
მსგავსი ამბები
რუბრიკის სხვა სიახლეები
;