მშვილდოსნებთან ზამთარი დადგა

მას შემდეგ, რაც დამთავრდა ზაფხულის სეზონი მშვილდოსნობაში, ჩვენი ჩუბინები ზამთრის დისციპლინაზე გადავიდნენ, რომელიც დარბაზში ტარდება, 18-მეტრიან დისტანციაზე. პირველი ასეთი შეჯიბრება 14-17 ნოემბერს გაიმართა თბილისში, პარასპორტის დარბაზში. ეს იყო საქართველოს თასი 18-მეტრიან დისტანციაზე, რომელიც ორ ასაკობრივ კატეგორიაში - უფროსებსა და ახალგაზრდებს შორის ჩატარდა, რომელშიც პარამშვილდოსნებიც მონაწილეობდნენ. ტურნირში ძველ ტრადიციულ გუნდებთან - აჭარასთან, ქუთაისსა და თბილისთან ერთად მარნეულიც გამოდიოდა, სადაც მშვილდოსნობა შედარებით ახალი სახეობაა და, შეიძლება ითქვას, პირველ ნაბიჯებს დგამს. იქაურებს შრომაც დაუფასდათ - გოგონებში ვერცხლის მედალი მარნეულელმა სალომე ხარშილაძემ მოიპოვა.

თუმცა ეს არ იყო ერთადერთი გამონაკლისი ახალი სახე მედალოსანთა შორის - ქალებში მესამე ადგილზე პარამშვილდოსანი თეა ბოლქვაძე გავიდა. მართალია, ის მშვილდოსნობაში ახალი კადრი ნამდვილად არაა და პარამშვილდოსნობაში საკმაოდ წარმატებული სპორტსმენიცაა, თუმცა ასე „კლასიკურ“ მშვილდოსნობაში მაინც „ახალი ხილია“.

ტურნირში ქვეყნის თითქმის ყველა უძლიერესი სპორტსმენი გამოვიდა, დანარჩენ მედლებს კი ისევ ძველი ლიდერები დაეუფლნენ. გამოვარჩევთ ბიჭებში გამარჯვებულ თბილისელ თემურ მაკიევს - ეს ბიჭი საკმაოდ კარგი მაჩვენებლებით გამოირჩევა და მისგან პირველობა ახალი არაა. თან, ჯერ კიდევ ახალი კადრია - არც ისე დიდი ხნის წინ გამოჩნდა დიდ ასპარეზზე და მისი წარმატება ამიტომაცაა სასიხარულო, როგორც ახალი კადრისა. ასევე მისასალმებელია მედეა გვინჩიძის გამარჯვებაც - ის მაკიევთან შედარებით გამოცდილია, მაგრამ საყურადღებოა, რომ თანდათან იმკვიდრებს სტაბილური ახალგაზრდა მსროლელის იმიჯს.

ქალებში ისევ ციკო ფუტკარაძემ გაიმარჯვა, ვაჟებში კი საპრიზო სამეულს კვლავაც ძველი სამეული შეადგენს. ეგაა, რომ მათ შორის ადგილები იცვლება. ამჯერად გამარჯვება ქუთაისელ ჯაბა მოსეშვილს დარჩა, ვინც ბოლო პერიოდში სტაბილურად პირველობს. თუმცა ცუდია, ამ ტრიოს დავაში სხვები რომ ვერ ერევიან.

მედალოსნები, ტრადიციულად, დაჯილდოვდნენ მედლებით, თასებითა და სიგელებით, თუმცა იყო ერთი სასიამოვნო სიახლეც: პრიზიორთა დაჯილდოების სურვილი გამოთქვა იტალიურმა პიცერია „ალესანდრომ“, რომელმაც მედალოსნებს პიცერიის ვაუჩერები გადასცა.

ქალები

  1. ციკო ფუტკარაძე; 2. ნანა მახარაძე (ორივე - აჭარა); თეა ბოლქვაძე (თბილისი, პარაცენტრი).

ვაჟები

  1. ჯაბა მოსეშვილი (ქუთაისი); 2. ლაშა ფხაკაძე; 3. ზურაბ მესტვირიშვილი (ორივე - თბილისი).

გოგონები

  1. მედეა გვინჩიძე (თბილისი); 2. სალომე ხარშილაძე (მარნეული); 3. ნინო ევგენიძე (აჭარა).

ბიჭები

  1. თემურ მაკიევი (თბილისი); 2. მირიან წულუკიძე; 3. ანრი ბასილაძე (ორივე - აჭარა).
173
მკითხველის კომენტარები / 0 /
მსგავსი ამბები
რუბრიკის სხვა სიახლეები
;