მშვილდოსნებმა, ჰიუნდაის მშვილდოსანთა მსოფლიოს თასზე, უკრაინაც მიაყოლეს

ანტალიაში მიმდინარე „ჰიუნდაის მშვილდოსანთა მსოფლიოს თასზე“ საქართველოს ქალთა ნაკრებმა მორიგი სიურპრიზი შემოგვთავაზა:

დიდი ბრიტანეთის შემდეგ უკრაინის ნაკრებიც დაამარცხა. მართალია, ჩვენები საბოლოოდ მაინც უმედლოდ დარჩნენ - მეოთხედფინალში ესპანეთთან 0:6 დამარცხდნენ, მაგრამ ზედიზედ ორი ფავორიტის გამოგდება მაინც საყურადღებო ფაქტია.

ეს მით უფრო სასიამოვნო, რომ ჩვენი ნაკრები გადახალისებულია - ამჯერად მასში გუნდურში ევროპის ორგზის ვიცე-ჩემპიონი ხათუნა ნარიმანიძე, მისი შვილი ციკო ფუტკარაძე და ირა არჯევანიძე შედიან. სულ მალე მათ მსოფლიოს ჩემპიონატი ელოდებათ, რომელიც სალიცენზიო ტურნირია.

ბუნებრივია, იქ გაცილებით ძლიერი შემადგენლობა შეიკრიბება (თუმცა ურიგო არც აქაა - 51 ქვეყანა მონაწილეობს) და თვით ეს გუნდებიც მსოფლიოზე გაცილებით უფრო მომზადებულნი იქნებიან, მაგრამ ანტალიურმა გამოსვლამ გვაჩვენა, რომ პერსპექტივა ჩვენს ნაკრებსაც გააჩნია. 

როგორც პირველ წრეში ბრიტანელებთან, ჩვენს მანდილოსნებს უკრაინასთანაც გადასროლა დასჭირდათ და მეორე ფავორიტიც დამატებითი სერიაში დაამარცხეს: 5:4. მათ გამოსვლაში ერთი უცნაურობა დაფიქსირდა: ორი სეტი წააგეს და ორივეში საკმაოდ დაბალი შედეგი, 47 ქულა დააგროვეს. თან შეხვედრაც გარდამავალი უპირატესობით წარიმართა - მეტოქეები მონაცვლეობით იგებდნენ სეტებს.

პლეი ოფში გამოსვლაც ჩვენებმა არც ისე კარგად დაიწყეს - პირველი სეტი 47:53 წააგეს. სამაგიეროდ, მეორეში აღადგინეს წონასწორობა - 55:52 იმარჯვეს, მაგრამ იქვე მესამე 55:47 დათმეს და უკრაინა საერთო ანგარიშით 4:2 დაწინაურდა. საბედნიეროდ, ამ კრიტიკულ ვითარებაში ჩვენებმა შეძლეს ნერვების მოთოკვა-მობილიზება და მეოთხე სეტში 51:48 იმარჯვეს, რითაც საერთო ანგარიშიც გაათანაბრეს. ჩვენებმა გადასროლაშიც მოთოკეს ნერვები და 26:25 იმარჯვეს, რითაც საერთო ანგარიში 5:4 გახადეს. 

ეტყობა, ამ გამარჯვებას მათ დიდი ენერგიაც შეალიეს და ესპანეთთან 0:6 წააგეს. არადა, ვერ ვიტყვით, რომ ესპანეთი უკრაინაზე ძლიერია ან ცალკეული მშვილდოსნები ჰყავდეთ ტიტულოვანნი - მათ რიგებში მხოლოდ პირველი ევროპული თამაშების მედალოსან ალიცია მარინის თუ გამოვარჩევთ. ესპანეთთან შეხვედრაში ჩვენებს შანსი მხოლოდ მეორე სეტში ჰქონდათ, რომელიც 52:53 წააგეს, დანარჩენები კი 48:55 და 50:55 დათმეს.

მოგვიანებით ესპანეთი ტაივანთან 2:6 დამარცხდა და 26 მაისს ბრინჯაოსთვის რუსეთს გაეჯიბრება, იმავე დღეს კი ოქროს მედლისთვის ტაივანი მექსიკასთან იბრძოლებს. 

ყოველდღიური სპორტული გაზეთი "ლელო"
909
მკითხველის კომენტარები / 0 /
მსგავსი ამბები
რუბრიკის სხვა სიახლეები
;