მშვილდოსნობა. ახალი სასროლეთის ძველი ჩემპიონები

22-25 მარტს ანგისას სტადიონზე ჩატარდა საქართველოს ჩემპიონატი მშვილდოსნობაში, რომელშიც პარასპორტსმენებიც მონაწილეობდნენ.

აღსანიშნავია, რომ ამ ტურნირს სასროლეთი განახლებული შეხვდა. იქ სარემონტო სამუშაოები კარგა ხნის წინ დაიწყო, რომელიც საკუთრივ მშვილდოსნებმა წამოიწყეს. შედეგად მოეწყო მათთვის ცალკე სავარჯიშო თუ საასპარეზო მოედანი თავისი გადახურული პავილიონით, საიდანაც წვიმაშიც შეიძლება სროლა, მოეწყო სასროლი ზოლები და სხვა...

ჩემპიონატში ქვეყნის ყველა უძლიერესი მსროლელი გამოვიდა, ვისაც კი ეროვნულ ნაკრებში მოხვედრის პრეტენზია გააჩნია. ეს შეჯიბრება სწორედ მთავარი გუნდისთვის გახლავთ ერთ-ერთი შესარჩევი სტარტი. ტურნირში გამოვიდნენ აჭარის, თბილისისა და ქუთაისის გუნდები.

ქალებშიც და ვაჟებშიც შეჯიბრებამ მოულოდნელობების გარეშე ჩაიარა - გამარჯვებითაც ხომ ფავორიტებმა გაიმარჯვეს, ფინალურ პაექრობებშიც იმათ იმარჯვეს, ვინც შესარჩევი ეტაპიც მოიგო.

ქალებში ასეთი თბილისელი ქრისტინე ესებუა აღმოჩნდა, ვინც საკვალიფიკაციო ეტაპი 652 ქულით მოიგო. მას ორივე სერიაში ერთნაირი შედეგი ჰქონდა - 326-326 ქულა და ორივეში პირველი იყო.

მომდევნო ადგილებზე დედა-შვილის დუეტი გავიდა აჭარიდან: ფედერაციის პრეზიდენტი ხათუნა ნარიმანიძე 636-ით მეორე აღმოჩნდა, მას კი ორი ქულით ჩამორჩა ციკო ფუტკარაძე. ამ სამეულს სხვები საგრძნობლად ჩამორჩნენ. მაგალითად, მეოთხეზე გასულმა კიდევ ერთმა ბათუმელმა ნანა მახარაძემ 612 ქულა მოაგროვა.

პლეი ოფში ადგილები ოდნავ შეიცვალა, მაგრამ ეს უფრო დედა-შვილს ეხება, თორემ ესებუამ თავიდანვე გაიკვალა გზა ფინალისკენ. ოქროს მედლისთვის ბრძოლის უფლება ციკო ფუტკარაძემაც მოიპოვა, ფინალი კი ესებუას გამარჯვებით დასრულდა, ოღონდ საკმაოდ დაძაბულ ბრძოლაში: 6:4. ბრინჯაოს მედალი ნარიმანიძემ მოიპოვა, ვინც გადამწყვეტ პაექრობაში ნანა მახარაძის და - მარიკა მახარაძე 7:3 დაამარცხა.

ვაჟებში საკვალიფიკაციო ეტაპი ასევე ორივე სერიის მოგებით ძლევამოსილად ჩაატარა თბილისელმა ზურაბ მესტვირიშვილმა - 647 ქულა. მან გვარიანად გაუსწრო უშუალო მდევარ ქუთაისელებს - ჯაბა მოსეშვილს 638 ჰქონდა, ლაშა ფხაკაძეს - 633. 623-ით მეოთხე იყო თბილისელი გიორგი გელაშვილი, აჭარის ნაკრების წევრი ნიკა თავდგირიძე კი 617-ით მეხუთეზე გავიდა.

პლეი ოფი ვაჟებში გაცილებით უფრო დიდი მოულოდნელობებით წარიმართა: მოსეშვილი ადრევე გამოვარდა და მედალოსნებშიც ვერ მოხვდა. სამაგიეროდ, ვითარება "თავდაყირა დააყენა" თბილისელმა ვლადიმერ დოლიძემ, ვინც ნახევარფინალში გავიდა.

ფინალში ოქროს მედლისთვის ერთმანეთს მესტვირიშვილი და ფხაკაძე შეხვდნენ. ფხაკაძემ, ვისაც ობიექტური მიზეზების გამო ბოლო პერიოდში ხეირიანად არ უვარჯიშია, დიდი ბრძოლა კი გაუმართა მომავალ ჩემპიონს, მაგრამ მესტვირიშვილიც მოწოდების სიმაღლეზე იდგა და 6:5 იმარჯვა. ბრინჯაოს მედალი გელაშვილმა მოიპოვა, ვინც გადამწყვეტ პაექრობაში 6:0 მოუგო დოლიძეს.

პარალიმპელ ვაჟთა შორის გამარჯვება აჭარის ნაკრების წევრმა ზვიად დუმბაძემ მოიპოვა, ვინც გადამწყვეტ ორთაბრძოლაში 6:4 დაამარცხა თბილისელი გია ბენიძე. მესამე ადგილისთვის შეხვედრაში თბილისელმა ვანო წიკლაურმა 7:3 მოუგო თანაგუნდელ ლევან მათიაშვილს.

აქვე გეტყვით, რომ ამათთან ერთად პარამშვილდოსანთა ტურნირში თბილისელი გოდერძი ზაქარაიაც გამოდიოდა, ქალებში კი მხოლოდ ერთი მონაწილე იყო - ასევე დედაქალაქელი თეა ბოლქვაძე, ვინც საკუთარი შედეგი გააუმჯობესა - 429 ქულა.

ყოველდღიური სპორტული გაზეთი "ლელო"
943
მკითხველის კომენტარები / 0 /
მსგავსი ამბები
რუბრიკის სხვა სიახლეები
;