მშვილდოსნობა. ევროპის ჩემპიონატზე ისევ ქალების იმედად

პოლონურ ლეგნიცაში დაიწყო მშვილდოსანთა ევროპის ჩემპიონატი, რომელშიც ჩვენგან ქალების ნაკრებიც გამოდის და - ვაჟებისაც.

გუშინ გაიმართა საკვალიფიკაციო ეტაპი. ქალებში ჩვენგან საუკეთესო შედეგი კვლავ მსოფლიოს ვიცე-ჩემპიონ ქრისტინე ესებუას აღმოაჩნდა - 637 ქულა და 21-ე ადგილი.

მას 20-ეულში შეღწევის შანსიც ჰქონდა, მაგრამ დამატებითი მაჩვენებლებით ჩამორჩა ორ თანაბარქულიანს - ბრიტანელ ბრიონი რიტმანსა და შვეიცარიელ ვალენტინე დე ჟიულს, რომლებსაც უფრო მეტი 10-იანი ჰქონდათ. თუმცა ეს დანაკარგი არაფერია იმასთან შედარებით, რაც ჩვენებურს შესარჩევი ეტაპის მეორე სერიაში ჰქონდა: პირველი სერიის შემდეგ თუ მე-16 ადგილზე იყო, მეორე სერიაში 29-ე შედეგით დაასრულა. თუმცა სერიებს შორის განსხვავება მხოლოდ სამი ქულაა (320+317). ამის მიუხედავად, ქულები მაინც არაა ურიგო მაჩვენებელი.

ასევე ტრადიციულად, ცხრილში დედა-შვილი ერთმანეთის მეზობლად განლაგდა: ფუტკარაძემ 632 ქულა დააგროვა და 28-ეა, ხოლო ნარიმანიძის ანგარიშზე 628 ქულაა, რაც 84 მონაწილეს შორის 30-ე შედეგია. ესებუასგან განსხვავებით, მათ მეორე სერია ჩაატარეს ბევრად უფრო ძლიერად: ფუტკარაძე პირველში თუ 29-ე იყო, მეორეში მე-18 შედეგი ჰქონდა, ნარიმანიძემ კი სერიები, შესაბამისად, 41-და მე-15 პოზიციით დაასრულა.

გუნდურში ჩვენს ქალებს 1897 ქულა დაუგროვდათ და პლეი ოფში მერვე შედეგით შევიდნენ. მაღალი ადგილის გამო განთესვაც კარგი მიიღეს: პირველ წრეში თავისუფალნი არიან, მერვედფინალში კი მათი მეტოქე ესტონეთსა და ისლანდიას შორის გამარჯვებული იქნება. ესტონეთი მეცხრე იყო 1889 ქულით, ისლანდია კი პლეი ოფში ბოლო, 24-ე ადგილით გავიდა.

დაუძლეველი ბარიერი არც ერთი არაა, მეოთხედფინალში გასვლის შემთხვევაში კი ჩვენებურთა მეტოქე შესარჩევის მომგები გერმანიის (1966), ავსტრიის (მე-17 ადგილი, 1800) და შვედეთის (16, 1809) სამეულიდან გასული იქნება. გუნდურში პლეი ოფები დღეს დაიწყება და გამოვლინდებიან ფინალისტები, ოქროსა და ბრინჯაოს მედლებისთვის დასკვნითი პაექრობები კი ჩემპიონატის ბოლო დღეს, 1 სექტემბერს გაიმართება, როგორც უკლებლივ ყველა დანარჩენ დისციპლინაში.

დღესვე დაიწყება პლეი ოფი პირად პირველობაშიც, თუმცა მხოლოდ ორი წრე ჩატარდება - 48-ე და 24-ედფინალები, დანარჩენი კი ხვალ გაგრძელდება. პირველ წრეში ორი ჩვენებურია თავისუფალი - ესებუა და ფუტკარაძე. ისინი მეორე ეტაპიდან ჩაებმებიან გათამაშებაში, სადაც ესებუა ლატვიელ ელენა კონონოვასა (69-ე ადგილი, 580) და ბელარუს კარინა ძიომინსკაიას (44, 613) შორის გამარჯვებულს შეხვდება. მას განთესილი - იტალიელი ტატიანა ანდრეოლი (12, 648) მხოლოდ მესამე წრეში თუ შეხვდება, ოღონდ ცხადია, იქამდე თუ მივა ან ერთი, ან - მეორე.

ფუტკარაძის პირველი მეტოქე ბელგიელ ოლენა კუშნირუკსა (37, 622) და ირლანდიელ სარა მოლონის (76, 561) დუეტიდან ერთ-ერთი იქნება. მათი ბარიერის გავლისას მას საკმაოდ ძლიერი კონკურენტი ელოდება - რუსი ინა სტეპანოვა, ვინც შესარჩევში მეხუთე იყო 656 ქულით.

დღეს ჩვენგან პლეი ოფის პირველ წრეში მხოლოდ ნარიმანიძე ისვრის - ისლანდიელ ასტრიდ დაქსბოკს გაეჯიბრება, ვინც შესარჩევში ბოლოსწინა, 83-ე ადგილზე გავიდა 470 ქულით.

ყველა ლოგიკით, ამ წყვილის ფავორიტი ნარიმანიძეა, ვისაც მაინცდამაინც ძლიერი მეტოქე არც გამარჯვების შემთხვევაში ეყოლება მეორე ეტაპზე: ესპანელი მონიკა გალისტეო (35, 623) ან ბულგარელი დობრომირა დანაილოვა (78, 553). სამაგიეროდ, 1/16-ფინალში გასვლისას ელოდება ძლიერი თურქი იაცემინ ანაგიოზი - მესამე ადგილი 662 ქულით.

ქალებში ბოლო სამ ადგილს ისლანდიელები იკავებენ, ცხრილს კი, იქნებ ბევრისთვის მოულოდნელად, გერმანელები ლიდერობენ - ლისა უნრუსაც და ელენა რიხტერსაც 665 ქულა აქვთ. ნატო ნასარიძის შეგირდი ანაგიოზი 662-ით მესამეა, მეოთხეზე კი, ასევე ბევრისთვის მოულოდნელად, ესტონელი ლაურა ნურსალუა 657-ით და დიდწილად მისი დამსახურებაა ესტონეთის მეცხრე გუნდური ადგილი. როგორც გითხარით, მეხუთეზე რუსი სტეპანოვაა.

სამწუხაროდ, ვაჟები ბევრად უფრო წარუმატებლად გამოვიდნენ. მათგან საუკეთესო ლაშა ფხაკაძეა 635 ქულით, რაც 105 მონაწილეს შორის 63-ე შედეგია. ზურაბ მესტვირიშვილის ანგარიშზე 625 ქულა და 71-ე ადგილია, ჯაბა მოსეშვილი კი 589-ით 97-ეა.

გუნდურ ჩათვლაში ჩვენებს 1849 ქულა დაუგროვდათ და პლეი ოფში ბოლო, 24-ე ადგილით შევიდნენ. დღეს ისინი პირველ წრეში მეცხრეადგილოსან სლოვენიას ხვდებიან.

პირად პირველობაში პლეი ოფში სამივე ჩვენებური გავიდა, მაგრამ, ქალებისგან განსხვავებით, ვაჟებმა გუშინვე გამართეს პირველი წრის შეხვედრები.

სამწუხაროდ, სამივე მათგანი დამარცხდა და გამოეთიშა ჩემპიონატს. ფხაკაძემ უკრაინელთა ოლიმპიურ ჩემპიონ ვიქტორ რიბანს პირველი სეტი 27:25 კი მოუგო, ხოლო მეოთხე ფრედ დაუმთავრა - 28:28, მაგრამ დანარჩენებში 26:28; 23:27, 26:27 წააგო და საერთო ანგარიშით 3:7 დამარცხდა. ფხაკაძეს ბოლო სერია რომ მოეგო, მაშინ შეხვედრა ფრედ, 5:5 დასრულდებოდა და დამატებითი გასროლა დაინიშნებოდა...

მესტვირიშვილი ბრიტანელ პატრიკ ჰიუსტონთან 1:7 დამარცხდა (25:26; 27:28; 27:27; 26:28), მოსეშვილმა კი მეორე ბრიტანელ ტომ ჰალთან 0:6 დათმო 26:27; 25:26; 25:29).

ჩვენგან შერეული წყვილი ესებუამ და ფხაკაძემ შეადგინეს - მათ ჯამში 1272 ქულა დაუგროვდათ, რაც მე-17 შედეგი აღმოჩნდა. ისინი პლეი ოფში ხვალ ისვრიან და 1276 ქულით ზუსტად მათ წინ მდგომ ბელგიელებს - კუშნირუკსა და ჯამო დე სმედტს გაეჯიბრებიან. თუმცა ბადის ამავე მხარესაა შესარჩევის მომგები თურქული წყვილი - ანაგიოზი და ევროპის ვიცე-ჩემპიონი მატე გაზოზი.

ყოველდღიური სპორტული გაზეთი "ლელო"
901
მკითხველის კომენტარები / 0 /
მსგავსი ამბები
რუბრიკის სხვა სიახლეები
;