მშვილდოსნობა. ევროპის ჩემპიონატი: მხოლოდ ესებუა და წყვილი

პოლონურ ლეგნიცაში გრძელდება მშვილდოსანთა ევროპის ჩემპიონატი. გუშინ იქ პლეი ოფის შეხვედრები ქალებმაც დაიწყეს, რომელიც ჩვენთვის არცთუ მთლად წარმატებული გამოდგა - ორი წრის შემდეგ ჩემპიონატს მხოლოდ ერთი ჩვენებური, ქრისტინე ესებუა შემორჩა. სამაგიეროდ, ჩვენი ქალები დამარცხდნენ გუნდურ პირველობაში.

პლეი ოფის პირველ წრეში ჩვენგან მხოლოდ ევროპის ორგზის ვიცე-ჩემპიონი ხათუნა ნარიმანიძე ისროდა, რადგან მისი შვილი - ციკო ფუტკარაძე და ქრისტინე ესებუა განთესილები იყვნენ, ისვენებდნენ.

იმ ეტაპზე ნარიმანიძეს სუსტი მეტოქე ჰყავდა - ისლანდიელი ასტრიდ დაქსბოკი, ვინც საკვალიფიკაციო ეტაპი ბოლოსწინა ადგილზე დაასრულა და 72 გასროლიდან სულ რაღაც 470 ქულა ჰქონდა მოგროვებული. მოლოდინისამებრ, ნარიმანიძემ მას იოლად მოუგო, სამივე სეტში აჯობა - 6:0. თუმცა მეორე სეტში რაღაც უცნაური ანგარიში დაფიქსირდა, 15:12, დანარჩენები კი ქართველმა 26:22 და 25:16 მოიგო.

ნარიმანიძეს ძალიან ძლიერი მეტოქე არც მეორე წრეში ჰყავდა - ესპანელი მონიკა გალისტეო, ვინც საკვალიფიკაციოში 35-ე იყო და მხოლოდ 5 საფეხურით ჩამორჩა ჩვენებურს. სამწუხაროდ, ნარიმანიძე მასთან ვერაფერს გახდა და 2:6 დათმო. ჩვენმა მსროლელმა მხოლოდ მესამე სეტში იმარჯვა - 27:24, დანარჩენები კი 25:27; 21:26 და 19:26 წააგო.

1/24 ფინალში შეჯიბრებაში უკვე ესებუა და ფუტკარაძეც ჩაებნენ. ესებუას მეტოქე ლატვიელი ელენა კონონოვა იყო, ვინც მანამდე დაძაბულ და ხანგრძლივ პაექრობაში, გადასროლაში დაამარცხა ბელარუსი კარინა ძიომინსკაია.

ამ შეხვედრაში ჩვენებური საგრძნობლად აღემატებოდა მეტოქეს და სამივე სეტი მოუგო - 6:0 (26:23; 27:25; 29:24). როგორც ვხედავთ, ესებუას საკმაოდ კარგი შედეგები აქვს. იმედია, ის გუშინდელ განწყობას დღესაც შეინარჩუნებს 1/16-ფინალში, სადაც იტალიელ ტატიანა ანდეოლის შეხვდება.

ანდეოლი იტალიელთა ახალწვეულია - ის ნაკრებში ბოლო პერიოდში მოხვდა, რაც აპენინელებმა ნაკრები გადაახალისეს და წარმოშობით მოლდოველი მსოფლიოს ოთხგზის ჩემპიონი ნატალია ვალეევა, ელენა ტონეტა თუ "ძველი გვარდიის" სხვა წარმომადგენლები პენსიაზე გაუშვეს. მათ პოლონეთში სულ ახალი სამეული ჰყავთ ჩაყვანილი, თუმცა ფინალში მაინც გავიდნენ. ვფიქრობთ, დღეს ჩვენებურს მასთან, პლეი ოფის მესამე წრეში იოლი გასეირნება არ ელოდება.

თუმცა შესარჩევი სხვა სპეციფიკაა, პლეი ოფი - სხვა და თან, ესებუაც მებრძოლი ხასიათით გამოირჩევა. ის იტალიელს თუ მოუგებს, მერე ბელგიელ ოლენა კუშნირუკსა და რუს ინა სტეპანოვას შორის მოგებულს შეხვდება.

სწორედ კუშნირუკმა მოუგო 1/24 ფინალში ფუტკარაძეს - 6:4. ანგარიშიდანაც ჩანს, რომ ჩვენმა დებიუტანტმა გვარიანად იბრძოლა და მართლაც ასეა: შეხვედრის შუაწელში გამარჯვებასთან ახლოსაც იყო, რადგან სამი სეტის შემდეგ 4:2 იგებდა, თუმცა, სამწუხაროდ, დათმო მომდევნო ორი დამატებითი სერია და საბოლოოდ ჩემპიონატსაც გამოეთიშა.

ბელგიელმა პირველი სეტი მინიმალური სხვაობით, 25:24 მოიგო და 2:0 დაწინაურდა. ფუტკარაძემ მყისვე არათუ გაუთანაბრა ანგარიში - 26:25, არამედ წინაც გავიდა: 26:22 და 4:2 საერთო ანგარიში. როგორც გითხარით, ჩვენებური ამის შემდეგ მოეშვა და ზედიზედ ორი სეტი დათმო: 24:28; 23:27.

გუნდური ტურნირის პლეი ოფის პირველივე შეხვედრაში ჩვენი ორივე ნაკრები დამარცხდა. თუმცა ვაჟების წაგება მოსალოდნელიც იყო, აი, ქალების მარცხი კი საკმაოდ მტკივნეულია ესტონეთთან, თუმცა საქმე აქ გადასროლამდე მივიდა და ჩვენები მხოლოდ ასე დრამატულად დამარცხდნენ - 4:5. ესტონეთი არც ჩვენნაირი ტიტულებით გამოირჩევა, არც ცალკეული მშვილდოსნები ჰყავს ჩვენებზე უფრო ტიტულოვანი, თუმცა საკვალიფიკაციოში ერთი ადგილით ჩამოგვრჩნენ - მეცხრეზე გავიდნენ.

ჩვენი ნაკრები პირველ წრეში ისვენებდა, ესტონეთს კი მეორე ეტაპზე შეხვდა. თავიდან მეტოქე დაწინაურდა - 47:46; 49:48 და 4:0 მათ სასარგებლოდ. თუმცა ჩვენებმა ეს სხვაობა მომდევნო ორ სეტში ამოუქაჩეს: 53:51; 44:43 და საერთო ანგარიში 4:4 გახდა. დაინიშნა დამატებთი სერია, სადაც სამივე სპორტსმენი თითო ისარს ისვრის. სამწუხაროდ, იქ უფრო ზუსტნი ესტონელები აღმოჩნდნენ და 28:25 მოიგეს, რითაც საერთო ანგარიში 5:4 გახდა მათ სასარგებლოდ.

ქალთა ფინალში იტალია და თურქეთი გავიდნენ, რომლის სამწვრთნელო შტაბში ნატო ნასარიძე შედის, ბრინჯაოსთვის კი გეერმანია რუსეთს გაეჯიბრება.

ვაჟები პლეი ოფში ბოლო, 24-ე ადგილით შევიდნენ და მეტოქედ ძლიერი სლოვენია ერგოთ. მათთან შანსი ნაკლებად ჰქონდათ და აკი სამივე სეტი დათმეს: 50:53; 52:53; 49:53 და ჯამში 0:6 წააგეს.

ქალებისგან განსხვავებით, ვაჟთა ტურნირი გვარიანი სენსაციით წარიმართა, რის ავტორადაც ლუქსემბურგის ნაკრები იქცა, რომელმაც ნახევარფინალამდე სამი პაექრობა მოიგო გადასროლაში ერთნაირი ანგარიშით, 5:4: მათ ჯერ ავსტრიას მოუგეს, მერე საკვალიფიკაციოს მომგები საფრანგეთიც გამოაგდეს, "მამლებს" კი სლოვენიის მძლეველი ბრიტანეთიც მიაყოლეს.

"ჯუჯების" წინსვლა მხოლოდ იტალიამ შეაჩერა ნახევარფინალში, სადაც 6:0 მოუგო, თუმცა ლუქსემბურგი 1 სექტემბერს ბრინჯაოსთვის მაინც იასპარეზებს, სადაც ესპანეთს შეერკინება, ჩემპიონობისთვის კი იმავე დღეს იტალია და რუსეთი იასპარეზებენ.

დღეს საქომაგო მხოლოდ ესებუა და შერეული წყვილი დაგვრჩა, რომელშიც ესებუა და ფხაკაძე შედიან. ისინი იქაური დროით 13:20-ზე ბელგიელებს - კუშნირუკსა და იარნო დე შმედტს შეხვდებიან, ხოლო თუ მოუგებენ, მერე თურქთა ძლიერი წყვილი - იაცემინ ანაგიოზი და ევროპის ვიცე-ჩემპიონი მატე გაზოზი ელოდებათ.

ყოველდღიური სპორტული გაზეთი "ლელო"
726
მკითხველის კომენტარები / 0 /
მსგავსი ამბები
რუბრიკის სხვა სიახლეები
;