მშვილდოსნობა. იტალიელის ცხრიანი უფრო ახლოს იყო... ესებუა დამარცხდა

პოლონურ ლეგნიცაში მიმდინარე მშვილდოსანთა ევროპის ჩემპიონატი გუშინ ჩვენთვის საბოლოოდ დასრულდა, რადგან პირად პირველობაში ქრისტინე ესებუაც დამარცხდა და ვერც შერეულმა წყვილმა მიაღწია წარმატებას.

თუმცა მარცხიცაა და მარცხიც: ესებუამ გადასროლაში, ფრეზე 5:6 წააგო იტალიელ ტატიანა ანდრეოლისთან! მან პლეი ოფში პირველ შეხვედრაში ლატვიელი ელენა კონონოვა რომ დაამარცხა და 1/16-ფინალში გავიდა, უკვე გაცნობეთ. ჩვენი მსოფლიოსა და ევროპის ვიცე-ჩემპიონი იქაც ახლოს იყო წარმატებასთან და ოთხი სერიის შემდეგ 5:3 ამარცხებდა აპენინელს, მაგრამ ბოლო სერიაში წააგო და ანგარიში გაათანაბრებინა: 28:26; 27:27; 28:29; 28:24; 27:29.

ვფიქრობთ, მისთვის ყველაზე დასანანი მესამე სეტის დათმობა იყო - 28:29 - თითქოს ურიგოდ არ უსვრია, მაგრამ მეტოქემ მაინცდამაინც იმ დროს გაიგიჟა თავი და მთელ შეხვედრაში პირველად დააგროვა 29 ქულა. არადა, ის სეტიც ფრედ რომ დასრულებულიყო, საერთო ანგარიში 4:2 გახდებოდა და მეოთხე სეტის მოგებით საბოლოო გამარჯვებასაც გაინაღდებდა. ბოლო დამატებითი სერია კვლავ იტალიელმა მოიგო, ანგარიში 5:5 გახდა და საქმე დამატებით გასროლამდე მივიდა. იქ ორივემ კუთვნილი თითო ისარი 9-იანში გაარტყა, თუმცა ცენტრთან უფრო ახლოს ანდრეოლის ნასროლი გამოდგა და მერვედფინალის საგზურიც მან მიიღო.

ესებუა მოგვიანებით ისევ გავიდა სტარტზე. ამჯერად - შერეულ წყვილებში საასპარეზოდ, სადაც მისი მეწყვილე ლაშა ფხაკაძე იყო. შეგახსენებთ, რომ ჩვენები პლეი ოფის პირველ წრეში ბელგიელებს - ოლენა კუშნირუკს და იარნო დე შმედტს ხვდებოდნენ. ჩვენებმა მათთან დაძაბულ ბრძოლაში, გადასროლაში 5:4 იმარჯვეს.

შეხვედრა გარდამავალი უპირატესობით მიმდინარეობდა და წყვილები მონაცვლეობით იგებდნენ სეტებს: ჩვენებმა იმარჯვეს პირველსა და მესამეში (37:35; 39:38), იმათ - მეორე-მეოთხეში (36;33; 38:33). დაინიშნა დამატებითი სერია, სადაც სპორტსმენები ასევე თითო ისარს ისვრიან. საინტერესოა, რომ ის სერია ფრედ დასრულდა - 16:16, თუმცა ჩვენებმა დამატებითი მაჩვენებლებით იმარჯვეს.

მერვედფინალში მათი მეტოქე შესარჩევი ეტაპის მომგები თურქული წყვილი იყო - ევროპის ვიცე-ჩემპიონი მათე გაზოზი და იაცემინ ანაგიოზი, ვინც ამ ტურნირზე გავიდა პირადი პირველობის ფინალში და ხვალ ოქროს მედლისთვის იასპარეზებს.

სამწუხაროდ, ჩვენებმა მათთან პირწმინდად წააგეს - 0:6, თუმცა ცალკეულ სერიებში კი ეომნენ: 33:35; 34:35; 35:36. ნატო ნასარიძის გაწვრთნილმა თურქებმა მერე ბრიტანელებსაც ასეთივე ანგარიშით მოუგეს, მაგრამ ნახევარფინალში გადასროლაში 4:5 წააგეს იტალიელებთან და ხვალ ბრინჯაოსთვის იასპარეზებენ, სადაც მათი მეტოქე რუსული წყვილი იქნება, ფინალში კი იტალია საფრანგეთს გაეჯიბრება.

ყოველდღიური სპორტული გაზეთი "ლელო"
966
მკითხველის კომენტარები / 0 /
მსგავსი ამბები
რუბრიკის სხვა სიახლეები
;