მშვილდოსნობა. მსოფლიოს თასი: ანთალიაში ქალთა ტრიო შემოგვრჩა 

ანტალიაში მიმდინარე „ჰიუნდაის მშვილდოსანთა მსოფლიოს თასზე“ გუშინ პლეი ოფები დაიწყო, რომელშიც ჩვენმა ქალთა ნაკრებმა

პირველი ეტაპი წარმატებით გადალახა, პირად პირველობაში კი უკვე ექვსივე ჩვენებური გამოეთიშა შეჯიბრებას. თუმცა ცალკეული წარმატებები მათაც ჰქონდათ. კერძოდ, რამდენიმე მათგანმა პირველი ეტაპი გაიარა. 

გუნდურ ტურნირში ჩვენი ქალთა ნაკრები პირველ წრეში ბრიტანეთის სოლიდურ გუნდს ხვდებოდა და ძალიან მძიმე ბრძოლაში, დამატებით სერიაში 5:4 დაამარცხეს. 

მართალია, ბრიტანელებს შემადგენლობაში აღარც მსოფლიოს ვიცე-ჩემპიონი ალისონ ვილიამსონი ჰყავთ და არც მისი ყალიბრის ჩუბინი; ეგ კი არა, შემადგენლობაში ბოლო წლების ერთ-ერთი ძლიერი მშვილდოსანი ამი ოლივერიც ვეღარ ხვდება, მაგრამ მათი გუნდი მაინც რაგინდარა შეჯიბრების ერთ-ერთ ფავორიტად მიიჩნევა. სამაგიეროდ, გუნდშია გამობრძმედილი ნაომი ფოლკარდი, ვისაც ამ ტურნირზე გვერდს უმშვენებდნენ სარა ბეთლესი და ბრაიონ პიტმანი. 

ბრიტანელებთან შეხვედრაში ძირითადი სერია ფრედ, 4:4 დასრულდა. არადა, პაექრობა ბრიტანელთა უპირატესობით დაიწყო - პირველი სეტი 57:54 მოგვიგეს, მაგრამ ჩვენებმა მომდევნო ორი სეტი მოიგეს - 57:49; 58:51 და საერთო ანგარიშშიც 4:2 დაწინაურდნენ. ბოლო, დამატებით სერიაში ჩვენებს ფრეც აძლევდათ ხელს, მაგრამ ბრიტანელებმა 54:50 მოიგეს და საერთო ანგარიშიც გაათანაბრეს: 4:4.

დაინიშნა დამატებითი გასროლა, რომელშიც სამივე მსროლელი თითო ისარს ისვრის. ამ სერიაში ვერც ბრიტანელებმა და ვერც ჩვენებმა ვერ ისროლეს დამაჯერებლად, თუმცა ჩვენები მაინც უფრო ზუსტნი აღმოჩნდნენ და 26:24 მოიგეს, რითაც საერთო ჯამში 5:4 იმარჯვეს. მერვედფინალში ჩვენები დღეს უკრაინის კიდევ უფრო ძლიერ გუნდს გაეჯიბრებიან. 

ჩვენი ვაჟთა ნაკრები პლეი ოფის პირველ წრეში ბრაზილიას ხვდებოდა. სამწუხაროდ, ჩვენები უშანსოდ, 0:6 დამარცხდნენ. 

პირად პირველობაში ქალებში პლეი ოფის პირველი წრე ჩვენებიდან მხოლოდ ხათუნა ნარიმანიძემ გადალახა, ვინც 6:0 დაამარცხა დანიელი კრისტინე ანდერსენი. როგორც ანგარიშიდან ჩანს, დანიელს შანსიც არ ჰქონია და ნარიმანიძემ დამაჯერებლად მოუგო, რაც ცალკეულ სერიებშიც ჩანს: 26:24; 26:23. 27:20.

სამწუხაროდ, ნარიმანიძე მომდევნო წრეში იტალიელ ტატიანა ანდეოლისთან დამარცხდა, თუმცა კი დაძაბულ ბრძოლაში დაყარა ფარ-ხმალი: 6:4. ეს შეხვედრა ფრიად უცნაური გამოდგა: 5 სერია გაიმართა და აქედან ბოლო ოთხი ფრედ დასრულდა! გადამწყვეტი პირველი სეტი გამოდგა, რომელიც ანდეოლიმ მინიმალური სხვაობით, 26:25 მოიგო და სწორედ ამის ხარჯზე იმარჯვა, მომდევნოები კი 28:28; 27:27; 27:27; 28:28 დასრულდა.

პირველ წრეში გამარჯვებასთან ახლოს იყო ნარიმანიძის შვილი ციკო ფუტკარაძე, ვინც პირველ წრეში ზემოხსენებულ ბრიტანელ ფოლკრადთან გადასროლაში, 5:6 დამარცხდა. არადა, ფუტკარაძე ორი სეტის შემდეგ 3:1 იგებდა, რადგან ფრედ, 29:29 დასრულებული პირველი პერიოდის შემდეგ მეორე ჩვენებურმა 28:26 მოიგო. ფოლკარდმა მაშინვე გაათანაბრა: 27:28, მაგრამ ფუტკარაძე ისევ დაწინაურდა - მეოთხე სეტი 28:25 მოიგო და გამარჯვებასთან ძალიან ახლოს იყო, თუმცა მეხუთე სეტი 26:27 წააგო და საერთო ანგარიშიც 5:5 გახდა. ჩვენებურს ისევ ჰქონდა მოგების შანსი დამატებით სერიაში, მაგრამ ისიც 9:10 წააგო და საბოლოოდ 5:6 დამარცხდა. 

ირა არჯევანიძეც პირველ წრეში დამარცხდა უკრაინელ ლიდია სიჩენიკოვასთან - 2:6. ამ წყვილში სიჩენიკოვა ფავორიტი იყო, ჩვენებურის სასარგებლოდ კი იმას თუ ვიტყვით, რომ ერთი სეტი მოუგო ძლიერ მეტოქეს: მესამე სეტში 26:24 იმარჯვა. სამაგიეროდ, დანარჩენებში 26:29; 24:28 და 22:27 წააგო.

ვაჟებში პირველი წრე ორმა ჩვენგანმა გადალახა. ჯაბა მოსეშვილმა „მშრალად“, 6:0 მოუგო მექსიკელ დავიდ ანგელ ალვარადო სანტინის: 27:26; 29:27; 29:28. მეორე შეხვედრა მოსეშვილმა პოლონელ ოსკარ კასპროვსკისთან 2:6 დათმო: 24:28; 28:24; 25:26; 27:28. 

პირველი წრე გადალახა ლაშა ფხაკაძემაც, თუმცა პოლონელ მათეუშ ოგროდოვჟიკთან მძიმე ბრძოლაში იმარჯვა: 6:4. ფხაკაძემ პირველი ორი სეტი მოიგო - 28:22; 29:27 და 4:0 დაწინაურდა. თუმცა წააგო მომდევნო ორი სეტი: 26:28; 26:27, მაგრამ მეხუთეში 26:25 იმარჯვა და შემდეგ ეტაპზეც გავიდა. სამწუხაროდ, იქ იაპონელ ტეცუაია აოშიმასთან 1:7 დამარცხდა: 25:26; 26:29; 28:28; 28:29. 

ჩვენი ვაჟებიდან პირველ წრეში მხოლოდ ზურაბ მესტვირიშვილი დამარცხდა - ფრანგ კლემენტ ჟაქუსთან 2:6 წააგო: 24:28; 26:28; 27:26; 27:28. 

ყოველდღიური სპორტული გაზეთი "ლელო"
535
მკითხველის კომენტარები / 0 /
მსგავსი ამბები
რუბრიკის სხვა სიახლეები
;