მშვილდოსნობა. მსოფლიოს ჩემპიონატი: მეექვსე საკვალიფიკაციოში და მარცხი კორეასთან 1/4-ფინალში

ჩინებულად გამოვიდა მექსიკაში, მსოფლიოს ჩემპიონატზე ქრისტინე ესებუა - პირადში მსოფლიოს, გუნდურში კი ევროპის ვიცე-ჩემპიონმა საკვალიფიკაციო ტურნირში 666 ქულა კი დააგროვა, მაგრამ ამ შედეგით მეექვსე ადგილზე გავიდა, რაც ამ რანგის ტურნირზე მშვენიერი შედეგია.

თუმცა მეხიკოში სხვაც გვაქვს აღსანიშნავი: კარგად გამოვიდნენ ჩვენი გუნდის სხვა წევრები, რომლებმაც გუნდურშიც კარგი შედეგი აჩვენეს, პლეი ოფის პირველი წრე კი სამივემ დასძლია პირადშიც და გუნდურშიც.

ესებუამ პირველ სერიაში 330 ქულა დააგროვა და მეცხრე იყო, მაგრამ მეორეში უკეთ ისროლა, 336 ქულა დააგროვა და ამ სერიაში მეოთხეზე გავიდა... 72 ისრიდან მან თითქმის ნახევარი - 30 გაარტყა 10-იანში, აქედან ზედ ცენტრში კი 12 იყო.

როგორც გითხარით, მეხიკოში ჩვენი გუნდის სხვა წევრებიც კარგად გამოვიდნენ, დედა-შვილი ხათუნა ნარიმანიძე და ციკო ფუტკარაძე, რომლებიც ამ რანგის ტურნირზე პირველად გამოდიან ერთად. თუმცა გასაგებია, რომ ასეთ ტურნირებში გამოცდილება დიდ როლს თამაშობს და ამჯერად ნარიმანიძემ აჯობა შვილს, თუმცა ბოლო პერიოდში ფუტკარაძემ მასაც რამდენჯერმე აჯობა და ესებუასაც.

ნარიმანიძემ ამჯერად 629 ქულა დააგროვა (19; 8), რაც მისი ბოლოდროინდელი გამოსვლების კვალობაზე აშკარა პროგრესია, და 54-ე ადგილზე გავიდა. მშვენივრად გაისარჯა ამ ტურნირის დებიუტანტი ფუტკარაძეც, ვინც 627 ქულით 58-ე ადგილზე გავიდა (11; 1).

პირადი პირველობის პლეი ოფში პირველი წრე სამივე ჩვენებურმა გადალახა, თუმცა გუშინდელი ბატალიებით ფუტკარაძე უკვე გამოგვაკლდა, დანარჩენები კი აგრძელებენ ბრძოლას. ესებუა ორი წრე თავისუფალი იყო და პირველ ბრძოლას დღეს გამართავს ბრიტანელ სარა ბეტლესთან. ნარიმანიძემ ერთი სიურპრიზი შემოგვთავაზა, როცა შინაური კედლებით გულგამაგრებული ოლიმპიური მედალოსანი აიდა რომანი დაამარცხა: 6:2. თუმცა ეს მეორე წრეში იყო, მანამდე კი შვეიცარიელ ვალენტინე დე გიულის 7:1 მოუგო.

ნარიმანიძე დღეს 1/16-ფინალში ტაივანელ ში-ჩი ლინს გაეჯიბრება.

ფუტკარაძემ პირველ წრეში დანიელი ანე მარიე ლაურსენი 6:4 დაამარცხა. ეს ფრიად დრამატული პაექრობა იყო, რომლის ბედიც ბოლო, დამატებით სერიაში გადაწყდა. მეორე წრეში დებიუტანტი ქართველი იაპონელ ტომომი სუგიმოტოსთან 2:6 დამარცხდა, ვინც შესარჩევში მე-10 იყო.

* * *

ჩვენს სამეულს გუნდურ ჩათვლაშიც საკმაოდ კარგი მაჩვენებელი აღმოაჩნდა - 1922 ქულა, რაც მე-8 შედეგი გამოდგა. სამაგიეროდ, ამით პლეი ოფშიც ძნელ ბადეში მოხვდნენ: მსოფლიოს უძლიერეს გუნდ სამხრეთ კორეის მხარეს, თუმცა მანამდე პირველ წრეში მსოფლიოს ორგზის ვიცე-ჩემპიონი, მეცხრეადგილოსანი ინდოეთი ერგოთ.

ჩვენები გუნდურს კარგად ისვრიან და მექსიკაშიც კიდევ ერთხელ გამოავლინეს მებრძოლი სული, შედეგად კი მრისხანე მეტოქეს დაძაბულ ბრძოლაში, გადასროლაში 5:4 აჯობეს. ჩვენები ორჯერ აგებდნენ და ორჯერვე გაათანაბრეს: პირველი და მესამე სერია, შესაბამისად, 50:56 და 49:54 წააგეს, მაგრამ მეორეში და მეოთხეში 55:54 და 49:48 მოიგეს.

სამაგიეროდ, დამატებით სერიაში დამაჯერებლად, 28:25 მოუგეს და მეოთხედფინალში გავიდნენ. სწორედ იქ შეხვდნენ საკვალიფიკაციო ეტაპის მომგებ კორეას, ვისთანაც 0:6 წააგეს.

კორეამ ყველა შეხვედრა მშრალი ანგარიშით, სეტის წაუგებლად მოიგო: ჩვენამდე კოლუმბიას აჯობა 6:0, ნახევარფინალში კი ჩინეთსაც ასეთივე ანგარიშით აჯობა და 22 ოქტომბერს, ჩემპიონატის ბოლო დღეს ფინალში მასპინძელ მექსიკას გაეჯიბრება.

ყოველდღიური სპორტული გაზეთი "ლელო"

1439
მკითხველის კომენტარები / 0 /
მსგავსი ამბები
რუბრიკის სხვა სიახლეები
;