მშვილდოსნობა. ნაკრები. ისარი ზამთარს გადააცილეს

ქართველი მშვილდოსნები წლის პირველი საშინაო ტურნირისთვის ემზადებიან - 8-11 თებერვალს ბათუმში საქართველოს ზამთრის ჩემპიონატი ჩატარდება.

ის 18-მეტრიან დისტანციაზე იმართება ორ ასაკობრივ ჯგუფში - უფროსებსა და ახალგაზრდებში. ამ ტურნირის შედეგებით შეირჩევიან ის სპორტსმენები, რომლებსაც სასწავლო-საწვრთნელ შეკრებაზე გამოიძახებენ, რომელიც თებერვლის ბოლოს ან მარტის პირველ რიცხვებში ბათუმშივე მოეწყობა.

წინა წლებში ეს ტურნირი შესარჩევი იყო ევროპის ან მსოფლიოს ზამთრის ჩემპიონატისთვის, თუმცა ამჯერად ასე აღარაა. წლეულს მსოფლიოს პირველობა ტარდება, რომელსაც 14-19 თებერვალს ამერიკული იანკტონი უმასპინძლებს.

ოღონდ ჩვენებმა იქ გამოსვლა თავიდანვე გამორიცხეს, რადგან ეს დიდ ხარჯებთანაცაა დაკავშირებული, ფინანსები კი ქართული სპორტისთვის წლის დასაწყისში მუდამ პრობლემაა, ხოლო ამჯერად, სპორტის სამინისტროს კულტურის სფეროსთან შერწყმის პროცესში - გაორმაგებით.

არადა, იქ წინასწარ განაცხადი რომ გაეკეთებინათ და მერე ვერ წასულიყვნენ, ამაზე ჯარიმის გადახდა მოუწევდათ. ამიტომ თავიდანვე არჩიეს უარის თქმა. არადა, წლეულს მსოფლიოს ჩემპიონატი უკანასკნელად იმართება - მომავალში ჩატარდება მსოფლიოს თასის ეტაპები, ბოლოს კი გათამაშდება სუპერთასი.

ევროპის ჩემპიონატი კვლავაც ძველებური ფორმატით გაიმართება.

შეიძლება ითქვას, ჩვენებისთვის ზამთრის ანუ 18-მეტრიან დისტანციაზე გასამართავი სეზონი ქვეყნის პირველობით მთავრდება და მათთვის მთავარი ზაფხულის დისციპლინები ხდება, ამ მხრივ კი მართლაც მნიშვნელოვანი სეზონი ელოდებათ, რადგან სხვადასხვა რანგის ლიცენზიების გათამაშება იწყება.

მარტის ბოლოს საქართველოს კიდევ ერთი ჩემპიონატი ჩატარდება - უკვე ოლიმპიურ, 70-მეტრიან დისტანციაზე და ისევ ბათუმში, მისი შედეგები კი უკვე დიდწილად განსაზღვრავს ევროპის ჩემპიონატზე წასაყვან შემადგენლობას. თუმცა იქამდე ჩვენები მსოფლიოსა და ევროპის თასებზეც გამოვლენ, თუმცა ჯერ კალენდარი საბოლოოდ დაზუსტებული არაა.

ესეც ფინანსებზეა დამოკიდებული, მით უფრო, რომ მსოფლიოს თასების ნახევარი ჩვენგან ძალიან შორს - ჩინურ შანხაისა (23-29 აპრილს) და ამერიკულ სოლტ ლეიკ სიტიში (18-24 ივნისს) ტარდება, დანარჩენ ორს კი ევროპა უმასპინძლებს - ანტალია (20-26 მაისი) და ბერლინი (16-22 ივლისი). ევროპის თასი წლეულს მხოლოდ ერთი იქნება - ბულგარეთში, თუმცა არაა გამორიცხული, კიდევ დაემატოს.

ევროპის ჩემპიონატს წლეულს პოლონეთი უმასპინძლებს და მისი მნიშვნელობაც ორმაგდება, რადგან გაისად მინსკში გასამართავი ევროპის მეორე ოლიმპიადის ლიცენზიები თამაშდება - 5 გუნდურში და 16 - პირადში. ამ თამაშების საგზურები გაისად ისევ გაიცემა ევროპის "დიდ პრიზზე".

წლეულს საგზურები საძიებელი ჭაბუკებსაც აქვთ - არგენტინაში გასამართავი მსოფლიოს III ახალგაზრდული თამაშებისა, ოღონდ ევროპას მხოლოდ 3 კვოტა აქვს დარჩენილი.

ყოველდღიური სპორტული გაზეთი "ლელო"
1108
მკითხველის კომენტარები / 0 /
მსგავსი ამბები
რუბრიკის სხვა სიახლეები
;