მშვილდოსნობა. ორიოლში მშვილდი მომართეს

რუსეთის ქალაქ ორიოლში მიმდინარეობს მშვილდოსანთა საერთაშორისო ტურნირი დარბაზში ანუ 18-მეტრიან დისტანციაზე.

მასში საქართველოდან მხოლოდ აჭარის ქალთა ნაკრები გამოდის, რადგან გუნდი იქაურმა ფედერაციამ დააფინანსა: ხათუნა ნარიმანიძე, ციკო ფუტკარაძე და ნანა მახარაძე.

თავად შეჯიბრება საკმაოდ ძლიერი გამოდგა. მასში რუსეთის ნაკრები ხომ გაფართოებული კი არა, გაათმაგებული შემადგენლობით გამოდის, მათ კი კარგი მსროლელები ნამდვილად ჰყავთ, რამდენიმე უცხოური გუნდიც ძლიერი ჩუბინებითაა ჩასული.

მაგალითად, მექსიკელთა რიგებში ოლიმპიადის ფინალისტი აიდა რომანი გამოდის, ნატო ნასარიძემ თურქეთიდან ახალგაზრდებში ევროპის ჩემპიონი იასემინ ანაგოზი ჩაიყვანა და სხვა...

შესარჩევი ეტაპი სწორედ ანაგოზმა მოიგო, თუმცა აქ ერთბაშად სამხელისუფლებიანობა დამყარდა: მან და რუსებმა, შედარებით უცნობმა ტატიანა პლოტნიკოვამ და გუნდურში ევროპის ჩემპიონმა ნატალია ერდენიევამ 582-582 ქულა დააგროვეს.

თუმცა თურქმა კონკურენტებს `ცენტრალური" 10-იანებით აჯობა (60 ისრიდან - 44), რუსებს კი, რაგდან ეს მაჩვენებელიც თანაბარი ჰქონდათ (43), დამატებითი მაჩვენებლებით მეორე ადგილი პლოტნიკოვას ერგო.

რომანი 581-ით მეოთხე იყო, თუმცა ამდენივე ჰქონდა რუს საიანა ცირემპილოვასაც. მათ ერთი ქულით ჩამორჩა სექტემბერში ბათუმში, ჩვენს ტურნირზე ნამყოფი რუსი ტუიანა დაშიდორჟიევა.

ჩვენი ტრიოდან ყველაზე კარგად ფუტკარაძე გამოვიდა - 571 ქულით 22-ე ადგილზე გავიდა. ნარიმანიძე 565-ით 31-ეა, მახარაძე კი 539-ით 59-ზე გავიდა.
პლეი ოფში 32 მონაწილე გადიოდა და იქ მახარაძე ვერ მოხვდა, დედა-შვილი კი პირველივე წრეში დამარცხდა.

თუმცა ნარიმანიძემ მხოლოდ გადასროლაში და ისიც დამატებითი მაჩვენებლით წააგო პლოტნიკოვასთან: 5:6. აქ ძირითადი დრო 5:5 დასრულდა, თუმცა ჩვენებური ორჯერ იგებდა შეხვედრას და მხოლოდ ბოლო, მეხუთე სერიის წაგებით გაათანაბრებინა რუსს ანგარიში.

დამატებითი ისარი ორივემ 9-იანში გაარტყა, მაგრამ ცენტრთან უფრო ახლოს რუსისა აღმოჩნდა და გამარჯვებაც მას დარჩა.

ფუტკარაძემ 2:6 წააგო რუს აიუნა მანკანოვასთან. ჩვენებურმა პირველი ორი სეტი ფრედ დაასრულა, მაგრამ, ჩანს, მერე ძალა აღარ ეყო და ზედიზედ ორი წააგო, თუმცა ბოლოში ურიგოდ არ უსვრია, 29 ქულა დააგროვა, მაგრამ მეტოქემ უდანაკარგოდ ისროლა და სამივე ისარი 10-იანში გაარტყა: 30:29 მის სასარგებლოდ.

პლეი ოფი რუსთა ზეობით წარიმართა და ნახევარფინალში სამი მონაწილე ჰყავდათ. დისონანსი იმან შეიტანა, ვისგანაც ამას, ალბათ, ნაკლებად ელოდნენ - აზერბაიჯანელმა იალაგულ რამაზანოვამ, ვინც ჯერ რუსეთის მთავარი ნაკრების წევრი ქსენია პეროვა გამოაგდო, მერე ერდენიევა და დაშიდორჟიევაც დაამარცხა,

ნახევარფინალში კი მომავალ ჩემპიონ ტატიანა ბილტრიკოვასთან 0:6 წააგო და საბოლოოდ მესამეზე გავიდა. ფინალში ბილტრიკოვამ 2:6 დაამარცხა თანაგუნდელი არიუნა ბუდაევა.

ყოველდღიური სპორტული გაზეთი "ლელო"
954
მკითხველის კომენტარები / 0 /
მსგავსი ამბები
რუბრიკის სხვა სიახლეები
;