მშვილდოსნობა. საქართველო ევროპაში მეორეა - რუსებთან დავმარცხდით

საქართველოს მშვილდოსან ქალთა ნაკრებმა ვერცხლის მედალი მოიპოვა სამსუნში მიმდინარე ევროპის ზამთრის პირველობაზე.

ფინალში ჩვენებმა რუსეთის ნაკრებთან წააგეს, თუმცა კი დამატებით სერიაში ანუ გადასროოლაში და იქაც - მინიმალური სხვაობით: 29:30. საბოლოოდ რუსეთმა 5:4 მოიგო და ჩემპიონი გახდა, მესამეზე კი ჩვენების მიერ ძლეული უკრაინა გავიდა.

გადამწყვეტ შეხვედრაში მათ მეზობელ ბელარუსს იმავე ანგარიშით - 5:4, ანუ ასევე გადასროლაში სძლიეს, ოღონდ მათი დამატებითი გასროლები 29:28 დამთავრდა.

ჩვენს ნაკრებში ამჯერად პირადში მსოფლიოს, გუნდურში კი ევროპის ვიცე-ჩემპიონი ქრისტინე ესებუა, გუნდურში ევროპის ორგზის ვიცე-ჩემპიონი ხათუნა ნარიმანიძე და მისი შვილი ციკო ფუტკარაძე შედიოდნენ. ამ სამეულმა პლეი ოფის პირველ წრეში მასპინძელი თურქეთი 6:2 დაამარცხა (57:55; 59:57; 55:59; 59:58), ნახევარფინალში კი კიდევ ერთ ფავორიტს - უკრაინას მოუგო: 5:3

. ამ დაძაბულ პაექრობაში გადამწყვეტი მესამე სეტი აღმოჩნდა, რომელიც ჩვენმა მანდილოსნებმა შესანიშნავად ჩაატარეს, ექვსი გასროლიდან ხუთი 10-იანში მოარტყეს და 59:56 მოიგეს. ამით საერთო ჩათვლაში 4:2 დაწინაურდნენ, რადგან წინა ორი სეტი ფრედ დასრულდა: 57:57; 57:57. სხვათა შორის, დამატებითი, მეოთხე სეტიც ფრედ დამთავრდა - 58:58, თუმცა გამარჯვება საქართველოს ნაკრებს დარჩა: 5:3.

რუსეთი ერთი მოგებით გავიდა ფინალში - პირველ წრეში ისვენებდა, ნახევარფინალში კი ბელარუსს 5:3 მოუგო.

რუსებთან ფინალურ შეხვედრაში ჩვენს ნაკრებს ჩამორჩენის აღმოფხვრა მოუხდა. ეს მესამე სეტში მოხდა, რომელშიც ქართველებმა 57:55 იძალეს, მანამდე კი პირველი სეტი ფრედ, 58:58 დასრულდა, მეორე კი რუსებმა მოიგეს - 58:55. ამდენად სამი სეტის შემდეგ საერთო ანგარიში საყაიმო, 3:3 იყო. მეოთხე სეტში ორივე გუნდი მშვენივრად გამოვიდა და მხოლოდ თითო 9-იანი ჰქონდათ, დანარჩენი სულ 10-იანები მიითვალეს, სეტი კი ფრედ, 59:59 დასრულდა.
გუნდები გადასროლაშიც კარგად გაისარჯნენ, თუმცა სამი ისარიდან ჩვენებმა ერთი ისევ 9-იანში მოარტყეს, რუსებმა კი სამივე 10-იანში გაგზავნეს და 30:29 მოგვიგეს.

სამწუხაროდ, ჩვენები პირად პირველობაში მედლებისთვის ბრძოლას გამოეთიშნენ. პლეი ოფის პირველი დღის შესახებ პარასკევს უკვე გაცნობეთ, მას შემდეგ კი ტურნირს შემორჩენილთაგან მერვედფინალში ესებუა უკრაინელ ლიდია სიჩენიკოვასთან დამარცხდა - 2:6, ხოლო ნარიმანიძემ დრამატული შეხვედრა წააგო ბელარუს ჰანა მარუსავასთან - 5:6. ოღონდ წინა შეხვედრის მსგავსად, რომელიც ფრანგ ლაურენ ვილარს მოუგო, მას ახლაც გადასროლა დასჭირდა.

უცნაურია, რომ იქ ორივემ დამატებითი ისარი 10-იანში მოარტყა, მაგრამ უფრო ცენტრისკენ ბელარუსისა იყო და მედლისთვის ბრძოლაც მან გააგრძელა. თუმცა დიდხანს არც მას დასცალდა, რადგან მომდევნო წრეში სიჩენიკოვამ გამოაგდო და ეს ამბავიც გადასროლაში მოხდა.

ესებუას უკრაინელთან ცუდად არ უსვრია - ოთხი სერია ისროლეს და აქედან სამში 29 ქულა ჰქონდა (თითო სერიაში მეტოქეები 3-3 ისარს ისვრიან), თუმცა უკრაინელი ორჯერ თითო ნაბიჯით წინ აღმოჩნდა მასზე, ორი სერია კი ფრედ დასრულდა: 29:30; 29:29; 28:29; 29:29.

ნარიმანიძეს კიდევ უფრო დაძაბული ბრძოლა ჰქონდა მარუსავასთან - მეტოქე მასაც ქულა-ქულაში მისდევდა, თავიდან 4:0 დაწინაურდა, მაგრამ ბოლოსკენ ჩამორჩა. როგორც ჩანს, ის ფიზიკურმა მომზადებამ დააღალატა. ქართველმა ჩუბინმა ერთნაირი ანგარიშით - 29:28; 29:28 მოიგო საწყისი ორი სეტი, მესამე ფრედ - 29:29 დასრულდა, ბოლო ორში კი ბელარუსმა იმარჯვა (27:30; 29:30) და საქმე გადასროლამდე მივიდა, სადაც, როგორც გითხარით, 10:10 დაფიქსირდა, თუმცა გამარჯვება მარუსავას დარჩა.

ახალგაზრდებში პლეი ოფში მხოლოდ ერთი მონაწილე - თემურ მაკიევი გვყავდა დარჩენილი, ვინც პირველი წრე გაიარა, გუშინ კი უკრაინელ არტემ ოვჩინიკოვსაც მოუგო: 7:3 (29:30; 30:27; 29:28; 29:29; 30:29). ის მეოთხედფინალში რუს სოდნომ ბუდაევთან 1:7 დამარცხდა, ვინც მანამდე ანრი ბასილაძესაც აჯობა.

ბიჭების ნაკრები გუნდურ შეჯიბრებაშიც მონაწილეობდა, მაგრამ პლეი ოფის პირველივე წრეში რუსეთის გუნდთან 3:5 წააგო.

ყოველდღიური სპორტული გაზეთი "ლელო"
707
მკითხველის კომენტარები / 0 /
მსგავსი ამბები
რუბრიკის სხვა სიახლეები
;