მშვილდოსნობა. სოფიის გრანპრი ჩვენია!

სოფიაში ჩატარებულ მშვილდოსანთა ევროპის გრანპრიზე წარმატებით გამოვიდა საქართველოს ქალთა ნაკრები, რომელიც გუნდური პირველობის გამარჯვებული გახდა. საინტერესოა, რომ გუნდს საამისოდ პირველ ორ წრეში გადასროლა დასჭირდა, გზად კი ისეთი ძლიერი კონკურენტები დაამარცხეს, როგორიც უკრაინა და იაპონიაა.

ჩვენი ნაკრების შემადგენლობაში ამჯერად მსოფლიოს ვიცე-ჩემპიონი პირადში და ევროპისა - გუნდურში ქრისტინე ესებუა და დედა-შვილი, ევროპის ორგზის ფინალისტი გუნდურში ხათუნა ნარიმანიძე და ციკო ფუტკარაძე შედიოდნენ.

ამ სამეულმა საკვალიფიკაციო ეტაპი 1828 ქულით დაასრულა და პლეი ოფი მე-9 ადგილით დაიწყო. პირველ წრეში მათ ესტონეთს მოუგეს გადასროლაში - 5:4, რადგან ძირითადი დრო ფრედ, 2:2 დასრულდა. გადასროლაში, სადაც სამივე სპორტსმენი თითო ისარს ისვრის, ჩვენებმა 26:24 იმარჯვეს.

კიდევ უფრო დაძაბული და დრამატული გამოდგა მეოთხედფინალური პაექრობა უკრაინასთან, რომელიც ძირითად სერიებში ასევე ფრედ, 2:2 დასრულდა (ეს პაექრობა თამაზ ფუტკარაძის გუნდმა ბოლო, მეოთხე სერიაში გაათანაბრა), თუმცა გადასროლაც თანაბარი შედეგით, 27:27 დამთავრდა, გამარჯვებული კი დამატებითი მაჩვენებლებით გამოვლინდა - 10-იანთან უფრო ჩვენებურთა ისრები იყო და ნახევარფინალშიც გავიდნენ.

იქ ასევე საკმაოდ ძლიერ და წინა ეტაპზე მსოფლიოს ჩემპიონ რუსეთის გამომგდებ ბელარუსს გაცილებით ადვილად, 6:2 მოუგეს, ფინალში კი იაპონია 5:3 დაამარცხეს.

მშვილდოსნობა. ქალთა ნაკრებმა, ანთალიაში, მეორე წრეში გამოსვლა დაასრულა

1117
მკითხველის კომენტარები / 0 /
მსგავსი ამბები
რუბრიკის სხვა სიახლეები
;