მშვილდოსნობა. ქალთა ნაკრებმა, ანთალიაში, მეორე წრეში გამოსვლა დაასრულა

საქართველოს მშვილდოსან ქალთა ნაკრებმა მეორე წრეში დაასრულა გამოსვლა ანთალიაში მიმდინარე ჰიუნდაის მსოფლიოს თასის მეორე ტურნირში - ჩვენებმა ტაივანის ნაკრებთან 1:5 წააგეს.

ჩვენებმა ეს ერთადერთი ქულაც ბოლო სეტში მოიპოვეს, რომელიც ფრედ - 56:56 დასრულდა და რომელიც უკვე არაფერს წყვეტდა, რადგან მანამდე 54:57 და 53:58 წააგეს.

ტაივანმა მომდევნო ეტაპზე გადახალისებულ იტალიასაც გამოუყვანა წირვა - 5:3, მაგრამ ნახევარფინალში გადასროლაში 4:5 წააგო გერმანიასთან და 26 მაისს, საფინალო დღეს ბრინჯაოს მედლისთვის ინდოეთს გაეჯიბრება. გერმანიამ გვარიანი სენსაცია შემოგვთავაზა, თუმცა კი პლეი ოფში მეექვსე ადგილით მოხვდა.

ტაივანელებამდე მათ 5:4 დაამარცხეს ინდონეზია, პოლონეთი - 6:0 და ასევე 26 მაისს ფინალში კორეას შეხვდებიან. იქნებ პოლონეთთან გამარჯვება ვინმეს ჩვეულებრივ ამბად მოეჩვენოს და მართალიც იყოს, რადგან ბოლო წლებში მათ კრიზისი აქვთ (თუმცა დიდად არც გერმანელები ბრწყინავენ), ოღონდ აქ გასათვალისწინებელია, რომ გერმანიასთან შეხვედრამდე პოლონეთმა ჩინეთის უძლიერესი გუნდი დაამარცხა! თან ანგარიშსაც გააჩნია - 5:1 მოუგეს. საბოლოოდ ისე გამოვიდა, რომ ფავორიტებიდან ჯერჯერობით, იმედი მხოლოდ სამხრეთ კორეამ გაამართლა.

ყოველდღიური სპორტული გაზეთი "ლელო"
838
მკითხველის კომენტარები / 0 /
მსგავსი ამბები
რუბრიკის სხვა სიახლეები
;