მშვილდოსნობა. ქრისტინე ესებუამ პოზიცია 23-ე შეინარჩუნა

ამერიკულ სოლტ ლიკ სიტიში მიმდინარე ჰიუნდაის მსოფლიოს თასის შესარჩევ ეტაპზე მსოფლიოსა და ევროპის ვიცე-ჩემპიონმა ქრისტინე ესებუამ შეინარჩუნა 23-ე პოზიცია.

შეგახსენებთ, რომ საკვალიფიკაციო ეტაპი გუშინწინ დაიწყო და პირველი სერიის შემდეგ ესებუა 301 ქულით 23-ე ადგილზე იყო.

მეორე სერიაში ოდნავ უფრო ცუდად ისროლა, 298 ქულა დააგროვა, რითაც საერთო ჩათვლაში 599 დაუგროვდა, თუმცა 23-ე ადგილი მაინც შეინარჩუნა. მას შეეძლო, ერთი ადგილით წინაც წაეწია, რადგან ამდენივე ქულა დააგროვა მექსიკელმა ანა პაულა ვასკესმა, მაგრამ მას უფრო მეტი 10-იანი აღმოაჩნდა.

სამაგიეროდ, საგრძნობლად წაიწია წინ ამერიკის სახელით მოასპარეზე ჩვენმა თანამემამულე ხათუნა ლორიგმა (ქვრივიშვილი), ვინც ჯამში 615 ქულა დააგროვა და მე-18 ადგილიდან მე-13 საფეხურამდე აღზევდა.

შეგახსენებთ, რომ ამერიკაში ჩვენგან მხოლოდ ესებუა გამოდის, რადგან საქართველოს მშვილდოსნობის ფედერაციამ, შედეგებიდან გამომდინარე, იქ სხვები არ გაუშვა.

ამერიკაში არ გამოდიან კორელეები, ხოლო ჩინელები გადახალისებული გუნდით გამოდიან. კორეელთა არყოფნაში ბურთი და მოედანი სხვებს დარჩათ: შესარჩევი ეტაპი გერმანელმა ლისა უნრუმ მოიგო 641 ქულით, მეორე-მესამე ადგილები კი 637-637-ით ტაივანელმა იან-ტინ ტანიმ და დანიელმა ევროპის ჩემპიონმა მაია ჯაგერმა გაინაწილეს. ხუთეულში 629 ქულით მოხვდნენ ინდოელთა ორგზის მსოფლიოს ვიცე-ჩემპიონი დეეპიკა კუმარი და ამერიკელი მაკენზი ბრაუნი.

ამერიკაში წუხელ, ჩვენი დროით გვიან ღამით პლეი ოფის შეხვედრებიც გაიმართებოდა, თუმცა მათ შესახებ ხვალ თუ გიამბობთ. ესებუა კოლუმბიელ ალეხანდრა მარია სეპულვედას შეხვდებოდა, ამათში გამარჯვებულს კი ძლიერი მეტოქე ელოდება - მექსიკელი ოლიმპიადის ვიცე-ჩემპიონი აიდა რომანი.

ყოველდღიური სპორტული გაზეთი "ლელო"
855
მკითხველის კომენტარები / 0 /
მსგავსი ამბები
რუბრიკის სხვა სიახლეები
;