მშვილდოსნ ქალთა და ვაჟთა ნაკრები ანტალიის გზაზე 

საქართველოს მშვილდოსან ქალთა და ვაჟთა ნაკრები გუნდები ხვალ ანტალიაში მიემგზავრებიან, სადაც 20-26 მაისს „ჰიუნდაის მსოფლიოს თასის“ სეზონში რიგით მესამე ეტაპი გაიმართება.

თუმცა ის ჩვენებისთვის ამ რანგის პირველი შეჯიბრება იქნება, რადგან უსახსრობის გამო გამოტოვეს კოლუმბიურ მედელინსა და ჩინურ შანხაიში გამართული ანალოგიური ეტაპები. 

ანტალიაში ჩვენს ქალთა ნაკრებში აჭარის რეგიონის წარმომადგენლები იასპარეზებენ: ევროპის ორგზის ვიცე-ჩემპიონი გუნდურში ხათუნა ნარიმანიძე, მისი შვილი ციკო ფუტკარაძე და ირა არჯევანიძე.

ვაჟებში საქართველოს ღირსებას ქუთაისელები - ლაშა ფხაკაძე, ჯაბა მოსეშვილი და თბილისელი ზურაბ მესტვირიშვილი დაიცავენ, ისე კი ამათგან ფხაკაძეც თბილისელია, თუმცა, რაკი დედაქალაქში თავის დროზე სათანადოდ არ აფინანსებდნენ და არ აქცევდნენ ყურადღებას, უკვე წლებია, რიონისპირელთა სახელით გამოდის. 

ჩვენი ორივე ნაკრები ამ ტურნირისთვის ბათუმში გადიოდა შეკრებას და ანტალიაშიც იქიდან გაემგზავრებიან. 

ანტალიაში 18-19 მაისი დელეგაციების მიღების ანუ ჩასვლის დღეა. 20-ში ოფიციალური ვარჯიშია, შეჯიბრებები კი მეორე დღიდან დაიწყება. ცხადია, თავდაპირველად საკვალიფიკაციო ეტაპი ჩატარდება, სადაც 70-70 გასროლის შემდეგ გამოვლინდებიან როგორც პირად პირველობაში კონკრეტულ ადგილებზე - პლეი ოფში გასული მშვილდოსნები, ასევე დაჯამდება გუნდური ასპარეზობის და შერეული წყვილების შედეგები.

22 მაისს პლეი ოფები დაიწყება პირად პირველობაში, რომელიც 23-შიც გაგრძელდება და პლუს მას გუნდურის პლეი ოფებიც დაემატება. 24-ში შერეულ წყვილთა შეჯიბრებაა, ფინალური სტადია კი უკლებლივ ყველა დისციპლინაში 26 მაისს ჩატარდება. 

ჩვენები სამშობლოში 27 მაისს დაბრუნდებიან და მალევე ბათუმში საქართველოს დამოუკიდებლობის დღისადმი მიძღვნილ ტურნირსაც ჩაატარებენ. ის მსოფლიოს ჩემპიონატისთვის მოსამზადებელი ერთგვარი სტარტი იქნება, რასაც ხანმოკლე, რამდენიმედღიანი აღდგენითი შეკრება მოჰყვება იქვე, თავად მსოფლიოს ჩემპიონატი კი 3-9 ივნისს ჰოლანდიურ ჰერტოგენბოშში ჩატარდება.

ის სალიცენზიო სტატუსისა იქნება, ამ მეტად მნიშვნელოვან შეჯიბრებას კი მალევე - 33-30 ივნისს არანაკლებ მნიშვნელოვანი სტარტი - მეორე ევროპული თამაშები მოჰყვება მინსკში.

ყოველდღიური სპორტული გაზეთი "ლელო"
423
მკითხველის კომენტარები / 0 /
მსგავსი ამბები
რუბრიკის სხვა სიახლეები
;