მძაფრი კრიტიკა გურამ კაშიასა და ფანებისგან: სად არის ბრძოლა და ჟინი?

საშინაო არენა "ავაია სთედიუმზე" "კანზას სიტისთან" დამამცირებელი მარცხის (1:5) შემდეგ, "სან ხოსეს" კრიტიკა არ მოჰკლებია. ვაკო ყაზაიშვილისა და გურამ კაშიას გუნდი დიდი მიზნებისთვის რომ ვერ იბრძოლებდა, ეს ჩემპიონატის სტარტზევე ნათელი იყო.  

მაგრამ ამ წაგებამ გუნდის ბევრი სხვა პრობლემაც გამოამზეურა. კალიფორნიელთა ქართველმა ლეგიონერმა გურამ კაშიამ თქვა, რომ ბოლო ადგილზე მყოფი გუნდისთვის რაიმე მიზნებზე ფიქრი "ძალიან გვიანია".

"მიმაჩნია, რომ "კანზას სიტისთან" თამაში უკვე პირველ ნახევარში დასრულდა და ეს სეზონიც ჩვენთვის ამით დასრულებულია. უკვე დღეიდანვე, თითოეულმა ჩვენგანმა მობილიზება და კონცენტრირება მომავალი სეზონისთვის უნდა მოვახდინოთ", - ეს საქართველოს ნაკრების ვიცე-კაპიტანმა ჟურნალისტებთან საუბრისას თქვა.

სტუმრებმა მატჩის სრული კონტროლი მოახერხეს და მასპინძლები დიდი ანგარიშით დაამარცხეს. "კანზას სიტისთან"  კალიფორნიელებმა მიმდინარე სეზონში ყველაზე მტკივნეული მარცხი იწვნიეს და გამოჩნდა, რომ წლეულს მეტოქეებთან კონკურენციას ვეღარ შეძლებენ.

გუნდის ფანკლუბის გვერდი quakestalk.com წერს:

"ეს იყო ამერიკის საფეხბურთო ჩემპიონატების ისტორიაში მხოლოდ მეორე შემთხვევა, როცა პირველ ტაიმში გუნდს ("სან ხოსეს") არც ერთი ჯარიმა არ დაუფიქსირეს. ეს გუნდში მოთამაშეთა ბრძოლისუნარიანობისა და სპორტული ჟინის ნაკლებობაზე მეტყველებს".

"ჩვენ მოედანზე ენერგიისგან სრულიად დაცლილები გავედით. თქვენ შეგიძლიათ ილაპარაკოთ თამაშის სტრატეგიასა და სტრუქტურაში არსებულ პრობლემებზე, მაგრამ როდესაც შინ ვთამაშობთ, ყველა ელის, რომ ენერგიულად და ვალდებულების განცდით მაინც ვითამაშებთ", - ამბობს "სან ხოსეს" მწვრთნელი მიკაელ შტარე.

"რატომ უნდა დაუჭირონ ფანებმა მხარი "სან ხოსეს" სეზონის დარჩენილ ექვს მატჩში?" - მატჩის დასრულების შემდეგ შტარემ ამის დასაბუთება ერთი მიზეზითაც ვერ შეძლო", - წერს quakestalk.com.

ყოველდღიური სპორტული გაზეთი "ლელო"
1052
მკითხველის კომენტარები / 0 /
მსგავსი ამბები
რუბრიკის სხვა სიახლეები
;