მძლეთამძლე ლაშა ტალახაძე: შეუკვეთეთ, რამდენიც გინდათ, ავწევ! [VIDEO]

სამი ოქრო და მსოფლიოს შვიდი რეკორდი - ასეთი ფენომენალური შედეგით დაასრულა ასპარეზობა მძიმე წონაში (+109) ქართველმა გოლიათმა, რიოს ოლიმპიური თამაშების გამარჯვებულმა, ევროპის სამგზის და აქამდე მსოფლიოს ორგზის ჩემპიონმა ლაშა ტალახაძემ, რომელმაც ეს ბოლო ტიტული აშხაბადში მეორედ შეინარჩუნა და თურქმენეთის დედაქალაქის სპორტის სასახლეში პლანეტის უძლიერეს ათლეტთა ასპარეზობა ქართული ჰიმნით დახურა.

არავის ეეჭვებოდა, რომ ლაშა ტალახაძე მსოფლიოს ჩემპიონობას მესამედ მოიპოვებდა. ძალოსნობის ქომაგები მხოლოდ იმაზე ბჭობდნენ, ქართველი სპორტსმენი ტურნირზე რამდენ რეკორდს დაამყარებდა. ლაშამ ყოველგვარ მოლოდინს გადააჭარბა.

საქართველო მსოფლიოზე მძიმეა

შეგახსენებთ, რომ წლეულს ზაფხულს ტაშკენტში ძალოსნობის საერთაშორისო ფედერაციამ 2018 წლის პირველი ნოემბრიდან ახალი წონითი კატეგორიები შემოიღო.

მსოფლიოს ჩემპიონატამდე, ფაქტობრივად, თვე-ნახევრის წინათ ტალახაძემ საქართველოს ჩემპიონატში მოსინჯა ძალები, ოღონდ - ძველ (+105 კილოში) წონაში. მესამე ცდაზე მან 264 კილოგრამი აკრა, რაც კილოგრამით აღემატება 2004 წელს ათენში ირანელი ჰოსეინ რეზა ზადეს მიერ დამყარებულ მსოფლიოს რეკორდს (ატაცშიც პირველობა ტალახაძეს ეკუთვნის - 220 კგ). ორჭიდში ლაშამ 478 კილოგრამი მოაგროვა, რაც, ასევე, კილოგრამით მეტია მისსავე 2017 წლის მსოფლიო მიღწევაზე.

ოღონდ საქმე ის არის, რომ ქართველი გოლიათის მიერ ნაჩვენები შედეგები მსოფლიოს რეკორდებად არ ჩაითვალა, რადგან ჩვენი ეროვნული ჩემპიონატი ძალოსნობის საერთაშორისო ფედერაციის კალენდარში არ შედის და შეჯიბრებას უცხოელი მსაჯები არ ემსახურებოდნენ. თუმცა საამაყოა, რომ ახალი წონების შემოღებამდე დამყარებული საქართველოს ეს რეკორდები მსოფლიოსას აღემატება და ასეთად დარჩება მარად.



სარეკორდო იერიშები

ძალოსნობის საერთაშორისო ფედერაციამ ზაფხულშივე ყველა წონითი კატეგორიისთვის ახალი მსოფლიო სტანდარტები დააწესა. მძიმე წონისთვის (+109): ატაცში - 210 კგ, აკვრაში - 250 კგ, ორჭიდში - 453 კგ. ლაშა ტალახაძემ აშხაბადში უკვე მეორე ცდიდან შეუტია მსოფლიოს: სტარტზე 207 კილოგრამი აიტაცა, მერე - 212 კილო, რაც პირველი ახალი მიღწევა იყო - სტანდარტზე 2 კილოგრამით მეტი. რამდენიმე წუთში ლაშამ თავისივე რეკორდი 5 კილოგრამით გააუმჯობესა. ამ დისციპლინაში ვერცხლის პრიზიორ გორ მინასიანს (სომხეთი) 12 კილოგრამით აჯობა. ატაცში სამივე ცდა გამოიყენა საქართველოს ნაკრების კაპიტანმა, რიოს ოლიმპიადის ბრინჯაოს და ევროპის ჩემპიონატის ოქროსმედალოსანმა ირაკლი თურმანიძემ და 203 კილოგრამით მესამე ადგილზე გავიდა. სამწუხარო ის არის, რომ ამ მოძრაობისას ირაკლის უწინდელი ტრავმა გაუმიზეზდა და აკვრაში საასპარეზოდ არ გამოსულა. ცხადია, ორჭიდშიც შეუფასებელი დარჩა.

სამაგიეროდ, ისევ ლაშა ტალახაძემ გაგვახარა. პირველ ცდაზე მან თავისუფლად დაიმორჩილა 245 კილოგრამი, რაც ამ მოძრაობაში მსოფლიოს სტანდარტზე 5 კილოგრამით ნაკლები იყო, მაგრამ ორჭიდში 462 კილოს მოუყარა თავი - მსოფლიოს სტანდარტზე ცხრა კილოგრამით მეტს და მესამე მსოფლიოს რეკორდი მიითვალა. მომდევნო ორი ცდისას კი 4 რეკორდს გამოჰკრა ხელი - ორს აკვრასა (252 და 257 კგ) და ამდენივეს ოჭიდში (469 და 474 კგ).
საგულისხმოა, რომ მას შემდეგ, რაც ლაშამ მეორე ცდაზე 252-კილოგრამიანი შტანგა დაიმორჩილა, მწვრთნელებმა ჰკითხეს, მესამე მისვლისთვის რამდენი შევუკვეთოთო. რამდენიც გინდათ, მზად ვარ, ყველაფერს ვიღებო, უპასუხა. მერე - 260 იყოსო, დაამატა. ნაკრების მთავარმა მწვრთნელმა, ოლიმპიურმა ჩემპიონმა გიორგი ასანიძემ ძალების დაზოგვისკენ მოუწოდა და 257 კილო შეუკვეთა, რომელიც ოლიმპიურმა ჩემპიონმა ბუმბულივით აიტაცა.



გოლიათებს საფიქრალი გაუჩინა
პირდაპირ უნდა ითქვას - ახალი მძიმე წონითი კატეგორიის პირველივე ტურნირზე ტალახაძემ ისეთ სიმაღლეზე ასწია მაჩვენებლების თამასა, რომ პლანეტის უძლიერეს მამაკაცებს საფიქრალი გაუჩინა. თავად განსაჯეთ: ამ შეჯიბრებაზე ჩვენებურს აკვრაშიც 12 კილოგრამით ჩამორჩა რიოს ოლიმპიადის ვერცხლის პრიზიორი გორ მინასიანი, რომელსაც ვერცხლი ერგო, ხოლო უზბეკმა რუსტამ ჯანგაბაევმაც ამ დისციპლინაში 245 კილოგრამით დაიკავა მესამე ადგილი.

შეჯიბრების დამთავრების შემდეგ რიოს ოლიმპიადის გმირმა, აწ უკვე მსოფლიოს და ევროპის სამ-სამგზის ჩემპიონმა, მსოფლიოს მრავალგზის რეკორდსმენმა ლაშა ტალახაძემ საზოგადოებას ფეისბუქგვერდის მეშვეობით მიმართა: "ზედიზედ მესამედ მოვახერხე ჩემპიონის ტიტულის მოპოვება და ამით ძალიან ბედნიერი ვარ. განსაკუთრებით გამახარა ირაკლი თურმანიძის ბრინჯაოს მედალმა და მჯერა, რომ არა ტრავმა, ის კვლავ შეძლებდა ორჭიდის ჯამში მედლის მოპოვებას. მინდა დიდი მადლობა გადავუხადო ჩემს მწვრთნელებს, ექიმს, ფედერაციას, სპონსორებს და, რაც მთავარია, ყველაზე დიდი მადლობა თქვენ, ჩემო გულშემატკივრებო. მინდა იცოდეთ, რომ ვარ და ვიქნები ჩემი ქვეყნის ერთგული სამუდამოდ. შევეცდები სამომავლოდაც გაგახაროთ".

+109 კგ.
1. ლაშა ტალახაძე (საქართველო) 474 (217+257)
2. გორ მინასიანი (სომხეთი) 450 (205+245)
3. რუსტამ ჯანგაბაევი (უზბეკეთი) 447 (202+245)

გუნდური მესამე საქართველოს

საქართველოს ნაკრებმა 3 ოქროს და 2 ბრინჯაოს მედლით საერთო-გუნდურ ჩათვლაში მესამე ადგილი დაიკავა. პირველი იყო ჩინეთის ნაკრები (9 ოქრო, 11 ვერცხლი და 5 ბრინჯაო), მეორე ადგილი ირანს (5 ოქრო, 1 ვერცხლი, 2 ბრინჯაო) ხვდა.

2417
მკითხველის კომენტარები / 0 /
მსგავსი ამბები
რუბრიკის სხვა სიახლეები