მძლეოსნებმა მსოფლიოს ჩემპიონატი გადადეს

როგორც უკვე იცით, დადგინდა 2021 წლისთვის გადატანილი ტოკიოს ოლიმპიური და პარალიმპური თამაშების გამართვის თარიღები: ზაფხულის XXXII ოლიმპიური თამაშები გაისად 23 ივლისიდან 8 აგვისტოს ჩათვლით ჩატარდება ნაცვლად წლევანდელი 24 ივლისი-9 აგვისტოსი, ხოლო პარალიმპიადას "ამომავალი მზის ქვეყნის" მთავარი ქალაქი ზუსტად ორკვირიანი შუალედის დაცვით, გაისად, 24 აგვისტოდან 9 სექტემბერის ჩათვლით უმასპინძლებს, წლეულს კი მისთვის საერთაშორისო კალენდარში 25 აგვისტო-6 სექტემბერი იყო გამოყოფილი.

მოგეხსენებათ, ოლიმპიადის გარდა, წლეულს კიდევ რამდენიმე მნიშვნელოვანი და კომპლექსური შეჯიბრება გადაიდო. ამას გაისად დანიშნულებიც ემატება და გასაგებია, რომ 2021 წლის სპორტული სეზონი არნახულად დატვირთული გამოდის. ასე მაგალითად, იგივე ზაფხულის ოლიმპიადის გამართვის ახალი თარიღი ორ ფრიად მასობრივ სპორტულ ღონისძიებას ემთხვევა: 6-15 აგვისტოს აშშ-ს ქალაქი იუჯინში მძლეოსანთა, ხოლო მანამდე - 16 ივლისიდან 1 აგვისტოს ჩათვლით იმავე იაპონურ ფუკუოკაში საწყლოსნო სახეობებში მსოფლიოს ჩემპიონატებია დანიშნული. შეგახსენებთ, რომ ოლიმპიადებზე სწორედ ამ ორ სახეობაში გაიცემა ყველაზე მეტი მედალი.

ორივე სახეობის საერთაშორისო ფედერაციამ უკვე გამოთქვა მზადყოფნა, შეცვალოს თავდაპირველად დადგენილი ეს თარიღები, მძლეოსნებმა კი თავიანთი ნათქვამი უკვე პრაქტიკულადაც შეასრულეს და მსოფლიოს ჩემპიონატი ერთი წლით გადაავადეს ანუ 2021 წლის ნაცვლად 2022 წელს ჩატარდება, ოღონდ კონკრეტული ვადები მოგვიანებით გახდება ცნობილი. ჯერ ასევე არაფერი ცნობილი, შეიცვლება თუ არა მასპინძელი ქალაქი.

167
მკითხველის კომენტარები / 0 /
მსგავსი ამბები
რუბრიკის სხვა სიახლეები
;