მძლეოსნობა. ეროვნული ჩემპიონატი ახალგაზრდული რეკორდით

თბილისის მძლეოსნობის სასახლეში დამთავრდა საქართველოს მძლეოსანთა ზამთრის ღია ჩემპიონატი, რომელშიც სომეხმა სპორტსმენებმაც იასპარეზეს და თითო ოქრო-ვერცხლიც მოიპოვეს.

განსაკუთრებით მნიშვნელოვანი კი ის იყო, რომ 19 წლის გორელმა გიორგი მუჯარიძემ ბირთვი 18,93-მეტრიან ნიშნულს გადააცილა და ქვეყნის ჩემპიონობა მესამედ მოიპოვა ახალგაზრდებში საქართველოს რეკორდით.

უწინდელი მიღწევა - 18,62 მეტრი მერაბ ყურაშვილს ეკუთვნოდა. მუჯარიძე ხუთი წელიწადია, მძლეოსნობაში ვარჯიშობს, ამჯერად დავით მანთიძე ამეცადინებს.

შარშან 20-წლამდელთა ბალკანეთის ჩემპიონატში გიორგიმ მესამე ადგილი დაიკავა. მსგავს შეჯიბრებაზე ამ უქმეებზეც გაემგზავრება სტამბოლში, ოღონდ ამჯერად უფროსებში.

მთავარი კი მისთვის 23-წლამდელთა ევროპის ზამთრის ჩემპიონატია, რომელიც პორტუგალიაში 10-13 მარტს გაიმართება.

ამავე სახეობაში გორელ სპორტსმენს მხარი აუბა ოზურგეთელმა სოფო შათირიშვილმა. მართალია, მას რეკორდი არ დაუმყარებია, მაგრამ პირადი შედეგი გააუმჯობესა და მთავარ კონკურენტს - უფროსებში საქართველოს მრავალგზის ჩემპიონ ნათია რიგიშვილს პირველად აჯობა.

839
მკითხველის კომენტარები / 0 /
რუბრიკის სხვა სიახლეები