მწარე 1:5: დანია როგორც "პეჟო", საქართველო როგორც "ნოლშესტი" [VIDEO]

საქართველოში ბავშვმაც კი იცის რა მანქანაა "ნოლ შესტი" (ვაზ 21 06), მაგრამ "პეჟო 208"? ეს ქართველებისთვის შედარებით უცხო ავტომობილია, სამაგიეროდ, ბრიტანული საიტის, Aუტოცარ-ის გამოკვლევით დანიაში ყველაზე პოპულარული მანქანაა სწორედ "პეჟო 208".

იგი "ნოლშესტს" სიჩქარეშიც უგებს (1:0), ცხენის ძალაშიც (2:0), კომფორტშიც (3:0), მანევრირებაშიც (4:0), ეკონომიურობაშიც (5:0)... ვაზ 21 06 "პეჟო 208-ს" მხოლოდ ფასით სჯობია, გაცილებით იაფია (5:1).

5:1 - გეცნობათ? სწორედ ასეთი სხვაობით დამარცხდა საქართველოს ნაკრები დანიაში. თითქოს მწვანე მოედანზე "პეჟო 208" და ვაზ 21 06 გააჯიბრესო - დანიელებმა ყველა კომპონენტში გვაჯობეს.

გუშინდელი წაგებისთვის, გუშინდელი შეცდომისთვის ვინმესთვის კბილის გაკვრა და ნიშნის მოგებით ლაპარაკი ჩემს ხასიათში არ ჯდება. მაბრაზებს, როცა ამბობენ: ასე რომ მოქცეულიყავი, ურემი არ გადაბრუნდებოდაო. ეს უკვე საყვედურია. საყვედური კი სუსტი კაცის საქმე მგონია. შე კაი ადამიანო, თუ ურემზე გული შეგტკიოდა, ვიდრე გადაბრუნდებოდა, მანამ გეთქვა!

ჰოდა, ძალიან მინდა ხვალ თუ არა, ზეგ საქართველოს ნაკრები "მერსედესს" (გერმანიის ნაკრებს) თუ არა, "პეჟო 208-ს" მაინც ჰგავდეს, გამართული, მოქნილი და კომფორტული. იმიტომ გადავწყვიტე დანიისა და საქართველოს ტექნიკური მახასიათებლების შედარება, რომ დავინახოთ გზა, რომელიც ავტოინდუსტრიასაც გაგვიუმჯობესებს და საქართველოს ნაკრების შედეგებსაც.

[ანალიზი, VIDEO] დანია 5-1 საქართველო. ვაისის ქართული კარიერაც დაღმა მიექანება... შიშმა ვერ იხსნა სიკვდილი

სიჩქარე
კოპენჰაგენურ მატჩში იყო მომენტი, როცა მეტოქემ გრძელი პასი გაჭრა. ბურთისკენ ორი ქართველი და ერთი დანიელი გაიქცნენ. სწორედ ამ ეპიზოდში გამოჩნდა რა სხვაობაა გუნდებს შორის სისწრაფეში - დანიელი უსაინ ბოლტივით გარბოდა.

"პეჟო 208-ის" მაქსიმალური სიჩქარე 230 კმ/სთ-ია, ვაზ 21 06-ის - 180. ეს უბრალო რიცხვებია, თუმცა დავძენთ: "პეჟოს" მძღოლი 200 სიჩქარეს რომ გადააჭარბებს, მანქანას არაფერი დაეტყობა... "ნოლ შესტში" არა, მაგრამ ამასწონათ, "ნოლ სემში" ვიჯექი და მძღოლი 140კმ/სთ-მდე რომ ავიდა, მანქანამ ხვეწნა დაიწყო - ნუ მტანჯავო.

დანიელები ბავშვობიდან სწორად ვარჯიშობენ, სისწრაფეზეც ბევრს მუშაობენ, ხოლო ინგლისის ჩემპიონატში რომ ხვდებიან, კიდევ უფრო უმატებენ სისწრაფესა და ვარჯიშს. აბა, სალაჰსა და ობამეიანგს სხვანაირად როგორ უნდა სდიო?

საქართველოში მძლეოსნობა სულს ღაფავს, არადა იცით, რამდენს ნიშნავს ფეხბურთელისთვის მძლეოსნობის მწვრთნელის კონსულტაცია?! მერწმუნეთ, სწორად სირბილი ბავშვობიდანვე რომ ვისწავლოთ, იანსენი, დოლბერგი, პოულსენი სისწრაფეში ვერ მოგვიგებენ.

ცხენის ძალა
ავტომოყვარულებს ძალიან უყვართ ცხენის ძალებზე ლაპარაკი. ჩვენც ავყვეთ: "პეჟო 208-ს", რომლის ძრავიც 1.2 მოცულობისაა 68 ცხენის ძალა აქვს, ვაზ 21 06-ის ცხენის ძალაა 60.

გავიხსენოთ საქართველოსა და დანიის მატჩისას საჰაერო ორთაბრძოლები, რამაც გარკვეულწილად გადაწყვიტა შეხვედრის ბედი: ფიზიკურად ვერ ვაჯობეთ, ვერც ახტომამდე ვუგებდით პოზიციას და ვერც ჰაერში ვასწრებდით.

ესეც იმიტომ, რომ დანიელები დღე და ღამ მუშაობენ ტრენაჟორებზე.

მახსოვს, 2018 წლის თებერვალში ავსტრიასთან საკალაბურთო მატჩის წინა დღეს გოგა ბითაძემ ნაკრების ფიზმომზადების მწვრთნელს ჰკითხა, ტრენაჟორებზე შესვლის საშუალება ხომ იქნებაო. როგორც წესი, მატჩების წინ ტრენაჟორებს ყველა ერიდება. თუმცა ბითაძეს გეგმა ჰქონდა, რომელსაც ვერ ჩააგდებდა. შედეგი? - ზუსტად 8 თვეში სრულიად განსხვავებული, ორმაგად მოძლიერებული ბითაძე ვიხილეთ საბერძნეთთან და ისრაელთან.
დარწმუნებული ვარ, დანიის ნაკრების ყველა ფეხბურთელი ბავშვობიდან მიჰყვება ფიზმომზადების გეგმას...

მჯერა, საქართველოს ნაკრების წევრებიც ბევრს რომ ვარჯიშობენ, მაგრამ როცა პრემიერლიგაში თამაში გინდა, ბითაძესავით თვიდან თვემდე უნდა ღონიერდებოდე...



მანევრი
"პეჟო 208-ზე" არ ვმჯდარვარ, მაგრამ, რატომღაც მგონია, რომ ვაზ 21 06-ზე უფრო მანევრირებადია.

გახსოვთ პირველი გოლი საქართველოს ნაკრების კარში? ჩვენს საჯარიმოში დოლბერგმა ყველაზე სწორი პოზიცია შეარჩია, ყველაზე იოლად გაერკვა სიტუაციაში, სწრაფად დატრიალდა და 1:0. ის გოლი თუ გახსოვთ, მეკარე ლორია რომ დაბლოკეს? - ამ ეპიზოდშიც დიდხანს იფრინა ბურთმა საქართველოს ნაკრების საჯარიმოში, მასთან მხოლოდ დანიელები ჩანდნენ.

საჭე მარცხნივ თუ...
ბრიტანეთს თუ არ ჩავთვლით, ევროპაში მარცხენასაჭიანი მანქანები მოძრაობენ. საქართველოში მარჯვენასაჭიანები კინაღამ მარცხენებს უთანაბრდებიან...

ფეხბურთში პირიქითაა: თუ დანიელი ფეხბურთელი ბავშვობიდან ორივე ფეხით თამაშობს, საქართველოში, სამწუხაროდ ნაკრებშიც მინახავს მოთამაშე - მარცხენაზე რომ მიუვა ბურთი, დასარტყმელად მარჯვენაზე გადაიტანს (ან პირიქით). მიზეზი? - ვერ ხმარობს ორივე ფეხს. ასეთი ფეხბურთელები კი ინგლისის პრემიერლიგაში ვერ ითამაშებენ. ვინ დააცდის ფეხიდან ფეხზე გადატანას - ბურთს ფეხიანად მოაგლეჯენ!

საქართველოში საქმე "უკეთესადაა": ფეხიდან ფეხზე გადატანას აცდიან და რატომ არ უნდა დაარტყას იმ ფეხით, რომელსაც უკეთ ხმარობს?

გადაცემათა კოლოფი
ბავშვთა ფეხბურთშიც კალათბურთივითაა: გუნდში ერთი-ორი "ვარსკვლავია", რომელიც ბურთს რომ მიიღებს, კარისკენ დაიძვრება და შეუძლია მარადონასეული გოლი გაიტანოს. თავი მესი ჰგონია. როდესაც ასე ეგოისტურად თამაშობ 10 წლიდან 18 წლამდე, 20 წლისა რომ გახდები, საქართველოს ნაკრებში მიგიწვევენ და მეტოქის კართან ცარიელი პარტნიორი დაგიძახებს, ბურთს მას კი არ გადააწვდი - თავად დაარტყამ (ან მეკარისკენ შეიჭედები).

ასეთი ფეხბურთელები საქართველოს ნაკრებში არ გეგულებათ?

მე მეგულება და ყველაზე მეტად მათი ყურება არ მსიამოვნებს, მექანიკურ გადაცემათა კოლოფს მაგონებენ! თანამედროვე ფეხბურთში სიჩქარეებიც ავტომატურად უნდა გადაირთოს და პასებიც ავტომატურად უნდა განაწილდეს სწორედ იქ, სადაც საჭიროა.

საბურავები
კარგია კარგი საბურავი. მანქანასაც სიამოვნებს და მძღოლის თვალსაც.

საქართველოში ბავშვების უმეტესობა ხელოვნურსაფარიან მოედანზე ვარჯიშობს. ასეთ მოედანზე სირბილი სხვა კუნთებს ამუშავებს, ბუნებრივზე სირბილი - სხვას, ხელოვნურზე სხვა ბუცი და ქაცვია საჭირო, ბუნებრივზე - სხვა.

ჰოდა, ხელოვნურზე გაზრდილი ქართველი ბავშვი, დიდ ფეხბურთში რომ გადავა მარტო ბუცის გამოცვლა აღარ უშველის...

ხიდი
"პეჟო 208" ორხიდიანი არ არის, დანიის ნაკრები - არის. გგონიათ, რამეს ვაჭარბებ? გაიხსენეთ მისი მატჩი შვეიცარიელებთან: ვიკინგები ბოლო წუთებამდე 0:3-ს აგებდნენ, ბოლოს ჩართეს ხიდი და ურთულეს გზაზე ავიდნენ - მატჩი 3:3 დასრულდა.

გინახავთ ჩართული ხიდი საქართველოს ნაკრების შესრულებით? ამას რესურსი სჭირდება, რაც პატარაობიდან უნდა ჩაიდოს...

მივადექით ყველა ზემოთნახსენები პრობლემის ერთობლიობას: თუ სისწრაფეზე ბევრი არ გიმუშავია, ხიდს ვერ ჩართავ; თუ ფიზიკურად ძალიან ძლიერი არ ხარ, ხიდს ვერ ჩართავ; თუ პასი არ იცი, ჩართე ხიდი და შეასკდი კლდეს...

2652
მკითხველის კომენტარები / 5 /
ილია
0
ძალიან მაგარი წერილია.ყველაფერი ბავშვობიდან იწყება.რა თქმა უნდა სწორი ფიზიკა ბავშვობიდან მთავარია. სამწუხაროდ,ქართული საფეხბურთო მენტალიტეტი დიდხანს ვერ გამოვა მოატყუა ერთი , მოატყუა ორის ეგოისტური ტყვეობიდან გუნდის მნიშვნელობის აღქმა სწორი გაგებით ჩვენი პრობლემაა.
კაი
0
სტატიის ავტორმა წაითამაშა? :) ასეთ შედარებებს ჯობია იმაზე ისაუბროთ რომ კაპიტანმა მსგავსი შეცდომა არუდნა დაუშვას და ასე არ აკიდოს ნაკრებს პენალტი - კარში ლორია გვყავს და ნუ დაგვავწიყდება შმეიხელი კი არაა და გიბრალტართან რაც გააკეთა არ ნიშნავს რომ ყველაფერს აიღებს...1:1 რომ გახდა უნდა გადასულიყვნენ დაცვაზე და 1 ტაიმი მინიმუმ ფრით დაესრულებინათ.
მსგავსი ამბები
რუბრიკის სხვა სიახლეები
;