მჭედლიძისა და ოქრიაშვილის დაბრუნება ახლოვდება, ანანიძემ ივარჯიშა

ჯანო ანანიძე ტრავმისა და ოპერაციის შემდეგ რეაბილიტაციის კურსს აგრძელებს.

მოსკოვის "სპარტაკის" ინფორმაციით, ჯვარედინი იოგების ოპერაციიდან ორ კვირაში საქართველოს ნაკრების ერთერთმა ლიდერმა რომის კლინიკა "ვილა სტიუარტის" ფიტნესდარბაზში სირბილზე ივარჯიშა და ბურთიც აკენწლა.

შეგახსენებთ, რომ ჯანო საქართველოსა და ლიტვის ნაკრებთა 24 მარტის ამხანაგური შეხვედრის დასაწყისშივე დაშავდა და ნახევარწლიანი დასვენება მოუწევს. თუმცა კარგია, რომ პროცესი შეფერხების გარეშე მიდის.

რეაბილიტაციას ამთავრებს და ახლოს არის დაბრუნებასთან თორნიკე ოქრიაშვილი, რომელიც ბოლო ტურში "კრასნოდარის" მატჩს გულშემატკივრებთან ერთად ადევნებდა თვალს.

სასიხარულოა, რომ "ემპოლის" საერთო ჯგუფთან ერთად ვარჯიშობს ლევან მჭედლიძე. განაცხადში მის გამოჩენას 7 აპრილს, სერია B-ს 34ე ტურში "სპეციასთან" საგარეო მატჩისას ველოდით, მაგრამ სიფრთხილის გამო მწვრთნელმა მაინც თავი შეიკავა. "პიანეტაემპოლის" ცნობით, 27 წლის ფორვარდი მოედანს უახლოეს პერიოდში დაუბრუნდება.

რაკი საქართველოს ნაკრების მოთამაშეებზე ვწერთ, აქვე ვთქვათ, რომ მცირე ტრავმების შემდეგ თავიანთ გუნდებს დაუბრუნდნენ ვაკო გვილია ("ლიუცერნი") და გიორგი მერებაშვილი (პლოცკის "ვისლა"). საბედნიეროდ, მათი პრობლემები სერიოზული არ არის და მალე შეძლებენ თამაშს.

ყოველდღიური სპორტული გაზეთი "ლელო"
1556
მკითხველის კომენტარები / 0 /
მსგავსი ამბები
რუბრიკის სხვა სიახლეები
;