მჯერა, რომ მივაღწევ კიდევ უფრო დიდ მიზანს, რომელიც დავისახე

ახლა უკვე თამამად შეიძლება ითქვას, რომ შოთა არველაძის მისვლა ტაშკენტის "ფახთაქორში" წარმატებული აღმოჩნდა. მისი ხელმძღვანელობით უზბეკურმა გრანდმა უკან მოიტოვა ჩავარდნის მძიმე ხანა და ქვეყნის ჩემპიონატის ბრინჯაოს მედლები მოიგო. დიდია იმის შანსი, რომ "ფახთაქორმა" აზიის ჩემპიონთა ლიგაზეც იასპარეზოს...

შოთას საინტერესო ინტერვიუ გამოქვეყნდა Championatasia.com-ზე. ვფიქრობთ, ის ინტერესმოკლებული არც ჩვენი გაზეთის მკითხველისთვის იქნება.

- საინტერესოა, თქვენი შეფასება იმ პერიოდისა, რომელიც გუნდში გაატარეთ. რა დასკვნების გამოტანის საშუალება მოგცათ ამ პერიოდმა?
- თავდაპირველად, ვიტყვი, რომ მიზანი, რომელიც ჩვენ დავისახეთ გუნდში მოსვლის დღიდან, შესრულებულია. გვინდოდა, რომ "ფახთაქორი" ჩემპიონატის სამ საუკეთესო კლუბს შორის ყოფილიყო და ეს შევძელით. ამასთან, უნდა ვთქვა ისიც, რომ საშინაო მატჩებში დაუმარცხებლები ვართ. ახლა ველით 4 დეკემბერს, როცა უზბეკეთის თასის ფინალი გაიმართება. ერთმანეთს ტაშკენტის "ლოკომოტივი" და "ბუნიოდკორი" შეხვდებიან და იმ შემთხვევაში, თუ მოიგებს "ლოკომოტივი", აზიის ჩემპიონთა თასზე ასპარეზობის უფლებას მოვიპოვებთ.

- გვიამბეთ იმ სირთულეებზე, რომელსაც წააწყდით "ფახთაქორში" მისვლის შემდეგ...
- მე მივიღე უზბეკეთის სუპერკლუბის გაწვრთნის გამოწვევა და ეს არ იყო ადვილი. ეს გზა ავირჩიე და იმისიც მჯერა, რომ მივაღწევ კიდევ უფრო დიდ მიზანს, რომელიც დავისახე. ჩვენი ფიქრები და მიზნები დღევანდელი დღით არ იფარგლება, მომავლისკენ ვიყურებით.

- "ფახთაქორმა" ლეგიონერები დაიმატა. ხალხს მიაჩნია, რომ მხოლოდ სიმიჩმა წარმოაჩინა თავი კარგად...
- ჩვენ სულ უფრო მეტი და მეტი გვინდა მათგან. ამასთან, ზოგიერთი მხოლოდ სტატისტიკურ მაჩვენებლებს უყურებს. ჩემთვის აბსოლუტურად სულერთია, ფეხბურთელი ლეგიონერია თუ ადგილობრივი. ითამაშებს ის, ვინც თავს უკეთესად წარმოაჩენს - ეს ჩემთვის აქსიომაა! სიმიჩის გარდა, კარგი ფეხბურთელები არიან კანიუკი, ტიაგო და გრიფინიც.

- არის მოსაზრება, რომ კარგ ლეგიონერს უნდა ჰყავდეს მაღალი დონის მწვრთნელი...
- მართალია. ლეგიონერისთვის ყოველთვის რთულია უცხო ქვეყანაში თამაში. მას იქ ხვდება ახალი ქვეყანა, გუნდი, ქალაქი, გარემო, უნდა შეეგუოს ახალ კულტურას, სამზარეულოს... ამ დროს, კარგი მწვრთნელის როლი მართლაც ძალიან დიდია. ის მას უნდა დაეხმაროს ადაპტაციაში, გვერდით უნდა დაუდგეს ფსიქოლოგიურადაც... მწვრთნელი მნიშვნელოვნად განაპირობებს იმას, თუ როგორ თამაშობს კონკრეტულ შემთხვევაში ესა თუ ის ლეგიონერი.

- კმაყოფილი ხართ ფეხბურთელებით?
- არიან ფეხბურთელები, რომლებთან მუშაობაც მომწონს. ახლა ვერ დავასახელებ მათ გვარებს. ასევე, არიან მოთამაშეები, რომლებიც მოქცეულნი არიან ჩვენი თვალთახედვის არეში და სხვა კლუბებთან აქვთ კონტრაქტები. არ მიმაჩნია საჭიროდ რომელიმე მათგანის გამორჩევა.

- თქვენი აზრი უზბეკურ ფეხბურთზე. რომელ დადებით და უარყოფით ტენდენციებს გამოარჩევდით?
- არ ვიცი, როგორ შეიძლება, აგვისტოსა და სექტემბერში დღის სამ-ოთხ საათზე ითამაშო. სიმართლე გითხრათ, ძალიან გამიკვირდა ეს, როცა პირველად ჩამოვედი უზბეკეთში.

- რისი თქმა შეგიძლიათ უზბეკ გულშემატკივრებზე?
- ფეხბურთი არის სპორტის სახეობა, რომელიც ეკუთვნის ყველას. გულშემატკივარი ფეხბურთის ერთ-ერთი უმთავრესი ნაწილია. არ შეიძლება, ფეხბურთი თეატრს ან ოპერას შეადარო, სადაც სიჩუმე აუცილებელია...

- რომელი იყო თქვენთვის გამოსარჩევი თამაში იმათგან, "ფახთაქორმა" რომ ჩაატარა?
- ალბათ, ყველა მნიშვნელოვანი იყო. თითოეულ მათგანს სჭირდებოდა სწორი ანალიზი... და მაინც, უფრო "ლოკომოტივთან" მოგებულ თამაშს გამოვყოფდი, თუმცა იმ თამაშშიც 3 ქულა ჩაგვეწერა აქტივში, მეტი არაფერი.

- სეზონი მორჩა. საინტერესოა, რა გეგმები გაქვთ?
- ახლა ჩვენი მთავარი ამოცანაა, სწორი დასკვნები გამოვიტანოთ. იყო მოლოდინი და მეტიც გვინდოდა, მაგრამ მივიღეთ ის, რაც მივიღეთ. მნიშვნელოვანია, რომ "ფახთაქორი" ერთი ოჯახია და ერთმანეთის დიდი ნდობა გვაქვს.

(იბეჭდება მცირე ცვლილებით)
ყოველდღიური სპორტული გაზეთი "ლელო"
3024
მკითხველის კომენტარები / 0 /
მსგავსი ამბები
რუბრიკის სხვა სიახლეები
;