ნაკრების დაქსაქსული მზადება

საქართველოს ვაჟ ძიუდოისტთა ნაკრები კვლავაც მთავარი მწვრთნელის გარეშე, რამდენიმე ჯგუფად აგრძელებს მზადებას მოახლოებული მსოფლიოს ჩემპიონატისთვის, რომელიც 20-27 სექტემბერს ბაქოში ჩატარდება.

ერთი ჯგუფი, რომელშიც ივნისში კორეა-იაპონიაში მოვარჯიშე ფალავნები შედიან, უკვე გერმანიაშია წასული, სადაც ჯერ კიოლნში გაივლიან ერთობლივ შეკრებას, შემდეგ ზაარბრიუკენში ევროპის თასზე იჭიდავებენ, მისი დასრულების შემდეგ კი იქვე დარჩებიან სამდღიან საწვრთნელ კემპში.

გერმანიაში მწვრთნელ მინდია ბოდაველის და გურამ მოდებაძის ხელმძღვანელობით ოლიმპიური და ევროპის ჩემპიონი ლაშა შავდათუაშვილი (73), ევროპის ჩემპიონი და მსოფლიოს ბრინჯაოს მედალოსანი ვაჟა მარგველაშვილი, თორნიკე ნაგლიაშვილი (ორივე - 66), ლაშა ჩადუნელი (60), ევროპის მედალოსანი ბექა ღვინიაშვილი და გიორგი პაპუნაშვილი (90) იასპარეზებენ.

აქვე შევნიშნავთ, რომ რანგით ბევრად დაბალ ევროპის თასებზე ასეთი ტიტულოვანი ფალავნებით და ეგზომ წარმომადგენლობითი გუნდით გამოსვლა სიახლეა, რადგან აქამდე წამყვანი სპორტსმენები მხოლოდ უმაღლესი რანგის შეჯიბრებებში გამოდიოდნენ.

ცხადია, იქ ბევრად ძლიერი შემადგენლობა იკრიბება, მაგრამ ასეთ ტურნირებში მონაწილეობაც აუცილებელია, რადგან მსგავს სუსტ სტარტებსაც თავისი დანიშნულება აქვს.

მაგალითად, აქ უფრო იოლად შეიძლება სიახლეების გამოცდა, დატესტვა; შეიძლება, ნაკლები დატვირთვით მიიღო საჭირო სტარტი და ბოლომდე არ დაიხარჯო, როგორც ეს ძირითად ტურნირებში მთავარ კონკურენტებთან შეხვედრებში ხდება.

მსგავსი შეჯიბრებების დანიშნულება მრავალნაირია და ისინი საჭირო რომ არ იყოს, მაშინ არც ზედმდგომნი ჩაატარებდნენ. ძიუდოს ქომაგებს კარგად მოესენებათ, რომ რუსეთის ნაკრების მთავარ მწვრთნელ ეციო გამბას ძირითადი შემადგენლობა ხშირად დაჰყავს ასეთ, თითქოსდა, მეორეხარისხოვან შეჯიბრებებში. სამი წლის წინ თბილისში, ევროპის ახალგაზრდულ ოლიმპიურ ფესტივალზე ჩამოსულმა გამბამ ამ თემაზე საუბრისას მითხრა, რომ საჭიროა, სპორტსმენები ასეთი დონის ტურნირებშიც გამოვიდნენ, ნახონ ეს დონეც და იქაც გამოსცადონ საკუთარი თავი...

სხვები იაპონიაში

თუმცა დავუბრუნდეთ უთავოდ დარჩენილ ჩვენს ნაკრებს და ძიუდოისტთა მეორე ჯგუფი უახლოეს დღეებში - 15 ივლისს იაპონიაში გაემგზავრება შეკრებაზე, სადაც სამ ჯგუფად გაიყოფიან და სხვადასხვა კლუბში გაივლიან შეკრებას ადგილობრივ ფალავნებთან.

ისინი იქ სამი კვირა დარჩებიან, მერე კი მათი ნაწილი 6 აგვისტოს პირდაპირ იქიდანვე გადავა ბუდაპეშტში, სადაც 10-12 აგვისტოს "დიდ პრიზზე" იჭიდავებენ.

ქართველ ძიუდოისტთა ერთი ჯგუფი ანალოგიურ ტურნირში, "დიდ პრიზზე" მანამდეც გამოვა - 27-29 ივლისს ზაგრებში, სადაც 9-კაციანი წარმომადგენლობა გვეყოლება.

ამ ჯგუფშია მსოფლიოს ჩემპიონი, ევროპის სამგზის ტრიუმფატორი ავთანდილ ჭრიკიშვილიც (90), ვისაც ტრავმებისა თუ ბოლოდროინდელი საგაფიცვო აქტივობების გამო ხანგრძლივი პაუზა გამოუვიდა.

ასევე იჭიდავებს ევროპის ჩემპიონი გურამ თუშიშვილიც (+100). მათ გარდა, ხორვატიაში ჩვენგან იგივე ჩადუნელი, ნაგლიაშვილი, პაპუნაშვილი, თამაზ კირაკოზაშვილი, კობა მჭედლიშვილი (ორივე - 81), ლაშა ტაველური (100) და გიორგი ქავთარაძე (მძიმე წონა) გამოვლენ, ოღონდ ეს ჯგუფი ზაგრებში წასვლამდე ჯერ საფრანგეთში გაივლის 10-დღიან ერთობლივ შეკრებას - 16-26 ივლისს და იქიდან გადავა ხორვატიაში. მათ მწვრთნელად ამირან ტოტიკაშვილი გაჰყვებათ.

აქვე შევნიშნავთ, რომ "დიდი პრიზის" ორივე ტურნირი სალიცენზიო რეიტინგში იძლევა ქულებს. ლიცენზიებამდე ჯერ კიდევ ბევრი დრო და დიდი გზაა გასავლელი, დღეისათვის კი მსოფლიოს რეიტინგში ორი ლიდერი გვყავს - თავიანთ წონით კატეგორიებს ვალერი ლიპარტელიანი (100) და თუშიშვილი

ლიდერობენ, მარგველაშვილი და ღვინიაშვილი მეორეზე არიან, დარჩენილი სამი წონიდან კი, 81-ის გარდა, ხუთეულში ყველა წონაში შევდივართ.
რაც შეეხება მთავარი მწვრთნელის საკითხს, სავარაუდოდ, ეს საკითხი მსოფლიოს ჩემპიონატის შემდეგ გახდება აქტუალური.

ყოველდღიური სპორტული გაზეთი "ლელო"
1950
მკითხველის კომენტარები / 0 /
მსგავსი ამბები
რუბრიკის სხვა სიახლეები
;