ნაკრები მსოფლიოს ლიგის საგზურისთვის  იბრძოლებს

საწყლოსნო სახეობათა მსოფლიოს ფედერაციამ წყალბურთელ ვაჟთა ეროვნული ნაკრები გუნდებისთვის მსოფლიოს ლიგის გათამაშების ფორმატი შეცვალა. ფინალურ რაუნდში მოსახვედრად ევროპიდან 12 გუნდი იბრძოლებს. ისინი წილისყრით ოთხ ჯგუფში გადანაწილდნენ:

A ჯგუფი: იტალია, საბერძნეთი, საქართველო
B ჯგუფი: უნგრეთი, რუსეთი, საფრანგეთი
C ჯგუფი: ჰოლანდია, სერბეთი, ხორვატია
D ჯგუფი: მონტენეგრო, უკრაინა, ესპანეთი

ტურნირი 12 ნოემბერს დაიწყება. სასტარტო დღეს ჩვენი ჯგუფიდან საბერძნეთი და იტალია გაარკვევენ ერთმანეთთან ურთიერთობას, საქართველოს ნაკრები კი შეჯიბრებაში 17 დეკემბრიდან ჩაებმება - სტუმრად ითამაშებს აპენინელებთან, ბერძნებს კი 2020 წლის 11 თებერვალს თბილისში ვუმასპინძლებთ. ამ ეტაპზე ორივე მეტოქე ჩვენზე ძლიერია, თუმცა, როგორც სპეციალისტები აღნიშნავენ, ბრძოლა ყველასთან შეიძლება, განსაკუთრებით კი ელინებთან. 

მსოფლიოს ლიგის 2019-2020 წლების გათამაშების ახალი ფორმატი იმით არის საინტერესო, რომ ის ჯგუფებში ორივე შეხვედრაწაგებულ გუნდებსაც, წინა გათამაშებისგან განსხვავებით, ტურნირის გაგრძელებისა და ერთმანეთთან ძალების გამოცდის საშუალებას აძლევს. იმ შემთხვევაში, თუ ქართველი წყალბურთელები ჯგუფში მე-3 ადგილზე გავლენ, 17 მარტს C ჯგუფის (სტუმრად), 14 და 28 აპრილს კი შინ B და D ჯგუფების მესამეადგილოსნებს შევხვდებით. ასე რომ, გაისად იანვარში ევროპის ჩემპიონატის მერეც საქართველოს ნაკრებს უმაღლეს დონეზე მატჩების გამართვის საშუალება ექნება.

ყოველდღიური სპორტული გაზეთი "ლელო"
290
მკითხველის კომენტარები / 0 /
მსგავსი ამბები
რუბრიკის სხვა სიახლეები
;