ნაკრები U21: არაერთი მომენტი და მხოლოდ ფრე 

საქართველოს ახალგაზრდულმა ნაკრებმა ბალკანეთში ერთკვირიანი შეკრება დაასრულა. სანაკრებო პაუზისას გია ცეცაძის გაწვრთნილებმა მეორე ამხანაგური შეხვედრა სლოვენიასთან გამართეს და ფრეს (1:1) დასჯერდნენ. 

ევროშესარჩევი ციკლის მზადების ფარგლებში გია ცეცაძის გუნდმა პირველი ამხანაგური მატჩი სტუმრად საბერძნეთთან ჩაატარა და 0:3 დამარცხდა. ცეცაძემ შემადგენლობა შეცვალა და რამდენიმე მოთამაშე ძირითადში გამოსცადა: კარში დემეტრე ბულისკერია იდგა, ნახევარდაცაში გიორგი კუცია გამოჩნდა, ხოლო თავდასხმაში - ნუგზარ სპანდერაშვილი.

ამჯერად, ქართველი ახალგაზრდები ბევრად უკეთ გამოიყურებოდნენ და მომენტები რომ გამოეყენებინათ, დამაჯერებლად მოიგებდნენ. მაგრამ საქმეც ისაა, რომ ამ პრობლემამ თავი კიდევ ერთხელ იჩინა. 

გია ცეცაძის გუნდი პირველ ტაიმში კონტრშეტევაზე თამაშობდა და მასპინძლებს დისკომფორტს უქმნიდა. თუმცა, პირველი რეალური მომენტი სლოვენიელებმა შექმნეს. მე-14 წუთზე ანგარიშის გახსნა დეიან პეტროვიჩს შეეძლო, მაგრამ მეკარე დემეტრე ბულისკერიასთან პირისპირ დარჩენილმა კარს ააცილა.

22-ე წუთზე სახიფათო გამოდგა გიორგი კოხრეიძის ჩაწოდება, რომელიც მეკარემ მოიგერია, მაგრამ დამატებაზე ლუკა ლაკვეხელიანმა ვერ დაარტყა - მცველმა ბურთი ფეხიდან ააცალა.

ანგირიში 32-ე წუთზე გაიხსნა. კუთხურიდან მოწოდებული ბურთი მცველმა მოიგერია და ნიკა ნინუამ ისევ საჯარიმოში დააბრუნა - შეტევაში ჩართული ჩვენი მცველი ლუკა ლოჩოშვილი ბურთიანად ეფექტურად შემოტრიალდა და მეკარეს შორეულ კუთხეში ზუსტად დაურტყა - 0:1.

38-ე წუთზე კოხრეიძემ და ნიკა მალმა საჯარიმოში ბურთი გაითამაშეს და ამ უკანასკნელმა კარში დაარტყა, მაგრამ მეკარეს ვერ აჯობა.

მეორე ტაიმი კიდევ უფრო ცოცხალი გამოდგა და საქართველოს ნაკრებმა მეტოქეზე ბევრად მეტი რეალური მომენტი შექმნა, მაგრამ ვერ ისარგებლა. 59-ე წუთზე კოხრეიძემ კარისკენ დაძრულ ნუგზარ სპანდერაშვილს უპასა, მაგრამ ჩვენმა თავდამსხმელმა დარტყმა ვერ მოასწრო და სლოვენიელები გადარჩნენ.
მე-60 წუთზე კი ჯარიმიდან გიორგი არაბიძის მოწოდებულ ბურთს თავი დავით კობოურმა დაახვედრა და მიზანს ოდნავ ააცილა.

სლოვენიელებმა მხოლოდ ერთი რეალური მომენტი შექმნეს, მაგრამ შანსით ისარგებლეს და ანგარიში გაათანაბრეს. ეს 63-ე წუთზე მოხდა და ესეც მასპინძლებმა ჩვენების ბავშვური შეცდომის ხარჯზე შეძლეს: მცველის მიერ მოგერიებულ ბურთს სლოვენიელმა ფეხი დააფარა, შეტევა ფლანგზე განვითარდა, იქიდან გადაცემა კი მეკარემ ცუდად მოიგერია და კარის წინ მყოფმა ჰარის კადრიჩმა გაიტანა - 1:1. 

ბოლო წუთებზე საქართველომ ძალიან მწვავედ შეუტია, რაც შეცვლაზე შესული ირაკლი ბუღრიძის და ლუკა სილაგაძის დამსახურება იყო. მათ შეტევა ძალიან გაამწვავეს და მასპინძლების დაცვა აიკლეს.

77-ე წუთზე სილაგაძეს ჩვენების დაწინაურება შეეძლო, მაგრამ სლოვენიელთა მეკარემ მისი ძლიერი დარტყმის შემდეგ გუნდი ნახტომში აშკარა გოლისგან იხსნა.

81-ე წუთზე, ბუღრიძემ მეტოქე სისწრაფეში ცრუ მოძრაობით ჩამოიშორა, მაგრამ ახლოდან კარგად ვერ დაარტყა. 83-ე წუთზე ისევ სილაგაძე ცდილობდა “მოჭრილი” დარტყმით კარის აღებას და ამჯერად მიზანს ოდნავ ააცილა.

საქართველოს ბოლო შანსი დამატებულ წუთზეც ჰქონდა, როცა სწრაფად წამოწყებული შეტევის შემდეგ საჯარიმოსთან ბურთი ირაკლი ბუღრიძეს დაუგდეს, მაგრამ მას სლოვენიელი მცველი გადაეფარა და მასპინძლები აშკარა გოლისგან იხსნა.

საქართველო: ბულისკერია, ფაცაცია, ლოჩოშვილი, კობოური, მალი, ნინუა, კუცია, ლაკვეხელიანი, არაბიძე, კოხრეიძე, სპანდერაშვილი; შეცვლაზე შევიდნენ: ძებნიაური, ქოჩორაშვილი, ნებიერიძე, დავითაშვილი, ბუღრიძე, სილაგაძე, სამურკასოვი.

ყოველდღიური სპორტული გაზეთი "ლელო"
807
მკითხველის კომენტარები / 0 /
მსგავსი ამბები
რუბრიკის სხვა სიახლეები
;