ბორჯღალოსნები. შერკინება რუსეთთან

საქართველოს ნაკრები რაგბი ევროპის ჩემპიონატის მეოთხე ტურის მატჩს 10 მარტს სტუმრად, კრასნოდარში გამართავს. "ბორჯღალოსნები", ტრადიციულად, "შევარდენის სანაკრებო ბაზაზე" შეიკრიბნენ და მომავალი მატჩისთვის ემზადებიან.

საქართველოს ნაკრების მთავარმა მწვრთნელმა, ახალზელანდიელმა მილტონ ჰეიგმა მომავალი შეხვედრისთვის გაფართოებულ შემადგენლობაში ერთი ცვლილება განახორციელა.

შერკინების ბურჯის ზურაბ ჟვანიას (სტად ფრანსე) ნაცვლად საწვრთნელ შეკრებაზე კარლენ ასიეშვილს უხმო. მან ბოლოს ეროვნულ ნაკრებში ნოემბრის ტესტებზე, უელსის ნაკრების წინააღმდეგ ითამაშა.

გამორიცხული არ არის, რუსების წინააღმდეგ ვერ ითამაშოს მესამეხაზელმა ვიქტორ კოლელიშვილმა, რომელიც ხვალ საფრანგეთის ჩემპიონატის სადისციპლინო კომიტეტის სხდომაზეა დაბარებული.

ის 24 თებერვალს საფრანგეთის ჩემპიონატის მორიგი ტურის მატჩში მაღალი ბოჭვისთვის გაასინბინეს და კომიტეტს უნდა დაადგინოს, განზრახ ჩაიდინა თუ არა მან ეს ქმედება. ასე რომ, კოლელიშვილს, შესაძლოა, დისკვალიფიკაცია მისცენ.

საქართველოს ნაკრები რუსეთის ეროვნულ გუნდს კრასნოდარში მეოთხედ დაუპირისპირდება. წინა სამი შეხვედრა კი "ბორჯღალოსნების" გამარჯვებით დასრულდა.

კრასნოდარში პირველად 2001 წელს ვითამაშეთ და მეტოქეს დაძაბულ ბრძოლაში ვძლიეთ - 25:23. ორი წლის შემდეგ ანგარიშში სხვაობა ოდნავ გაიზარდა - 23:17. 2004 წელს კი, მეტოქე 27:15 დავამარცხეთ.

რუსებს გასვლით შეხვედრებში ყველაზე დიდი სხვაობით 2016 წელს, სოჭში მოვუგეთ - 24:7.


თავის მხრივ, დანაკლისი განიცადა რუსეთის ნაკრებმაც. ტრავმის გამო საქართველოს ნაკრების წინააღმდეგ ვერ ითამაშებს მორკინალი ინოკენტი ზიკოვი, რომელიც რუმინეთთან მატჩში დაშავდა.

იქამდე რუსთა გუნდში ტრავმების გამო არ უთამაშიათ: ანდრეი ტემნოვს, იგორ გალინოვსკის, ვასილი არტემევს და ბოგდან ფედოტოკოს. ეს მორაგბეები ვერც საქართველოს ნაკრების წინააღმდეგ იასპარეზებენ. რუსეთის ნაკრები ამჟამად საწვრთნელ შეკრებაზე თურქეთში იმყოფება.

შეგახსენებთ, რომ თამაში თბილისის დროით 16 საათზე დაიწყება.

საქართველოს ნაკრები

პირველი ხაზი: მიხეილ ნარიაშვილი (მონპელიე), კარლენ ასიეშვილი (ბრივი), შალვა მამუკაშვილი (ლოკომოტივი), ბადრი ალხაზაშვილი (ტულონი), ლევან ჩილაჩავა (ტულონი), ანტონ ფეიქრიშვილი (კარდიფი), გიორგი მელიქიძე (სტად ფრანსე);

მეორე ხაზი: გიორგი ნემსაძე (ბრისტოლი), შალვა სუთიაშვილი (ანგულემი), ნოდარ ჭეიშვილი (შამბერი);

მესამე ხაზი: ვიქტორ კოლელიშვილი (კლერმონი), ლაშა ლომიძე (ლონდონ აირიში), გიორგი თხილაიშვილი (ბათუმი), ოთარ გიორგაძე (კლერმონი), მიხეილ გაჩეჩილაძე (ენისეი), გიორგი ცუცქირიძე (ორიკი);

#9: ვასილ ლობჟანიძე (ბრივი), გელა აფრასიძე (მონპელიე);
#10: ლაშა ხმალაძე (ბათუმი), რეზო ჯინჭველაშვილი (არმაზი);
#12-13: დავით კაჭარავა (ენისეი), გიორგი კვესელაძე (არმაზი), გიორგი კოშაძე (ხარები), ლაშა მალაღურაძე (კრასნი იარი);
#11-14: ალექსანდრე თოდუა (ლელო), ანზორ სიჭინავა (აკადემია), ბექა წიკლაური (ლოკომოტივი);
#15: მერაბ კვირიკაშვილი (ლელო), სოსო მათიაშვილი (აკადემია).

თ მ ფ წ ბ ქ(პ)
1. საქართველო 3 3 0 0 +124 14(2)
2. რუმინეთი 3 2 0 1 +77 9(1)
3. ესპანეთი 3 2 0 1 +6 8(0)
4. რუსეთი 3 1 0 2 +24 6(2)
5. ბელგია 3 1 0 2 -34 5(1)
6. გერმანია 3 0 0 3 -197 0(0)

IV ტური. 10 მარტი

რუსეთი-საქართველო
რუმინეთი-ბელგია
გერმანია-ესპანეთი

ყოველდღიური სპორტული გაზეთი "ლელო"
1243
მკითხველის კომენტარები / 0 /
მსგავსი ამბები
რუბრიკის სხვა სიახლეები