ნანა ძაგნიძე მსოფლიოს ჩემპიონია!

ქართველმა სპორტსმენებმა წლეულს მსოფლიოს ჩემპიონატებში რამდენიმე ოქროს მედალი მოიპოვეს.

წლის მიწურულს უმაღლესი სინჯის ჯილდოების რაოდენობა კლასიკურ ჭადრაკში ევროპის 2017 წლის ჩემპიონატის გამარჯვებულმა ნანა ძაგნიძემ ერთით გაზარდა - 30 დეკემბერს ერ-რიადში (საუდის არაბეთი) ბლიცის (ელვისებური ჭადრაკი) მსოფლიოს ჩემპიონატში მან პირველი ადგილი დაიკავა და 80.000 დოლარი გადაეცა.

შეჯიბრებაში 35 ქვეყნის 100 ქალი მონაწილეობდა. შვეიცარიული სისტემით 11 შეწყვილებული ტური გაიმართა. ბოლო ტურის წინ ქართველი დიდოსტატი ქულით უსწრებდა ევროპის ორგზის ჩემპიონ ვალენტინა გუნინას (რუსეთი). ჩვენებური ბოლო ტურში სომეხ ელინა დანიელიანს დაუზავდა და 21 შესაძლებლობიდან 16.5 ქულით სხვებისთვის მიუწვდომელი აღნოჩნდა.

16 ქულით ვერცხლის მედალი ვალენტინა გუნინას ხვდა. 14-14 ქულით მესამე-მეოთხე ადგილები რაპიდში მსოფლიოს 2017 წლის გამარჯვებულმა ცზიუ ვენძიუნმა (ჩინეთი) და ევროპის ორგზის ჩემპიონმა კატერინა ლაგნომ (რუსეთი) გაიყვეს. უკეთესი კოეფიციენტით მესამე ადგილი ვენძიუნმა დაიკავა.
ძაგნიძის გარდა, დანარჩენ ქართველთა მონაგარი ასეთია:

15. ლელა ჯავახიშვილი (12.5), 18. ბელა ხოტენაშვილი (12.5), 23. ნინო ბაციაშვილი 12,5), 50. ინგა ჭარხალაშვილი (10,5), 63. სოფიკო ხუხაშვილი (10), 77. სოფიო გვეტაძე (9,5). სალომე მელია (9).

ვაჟებში საპრიზო ადგილები ასე განაწილდა: 1. მაგნუს კარლსენი (ნორვეგია, 16 ქულა), 2, სერგეი კარიაკინი (რუსეთი, 14,5), 3. ვიშვანათან ანანდი (ინდოეთი, 14,5)... 29. ლევან ფანცულაია (12.5), 30. ბაადურ ჯობავა (12), 37. გიგა ყუფარაძე (12), 71. მიხელ მჭედლიშვილი (10,5).

4489
მკითხველის კომენტარები / 1 /
თეონა
0
როგორ გაუფასურდა ყველაფერი ამ ქვეყანაში! ნონა და მაია ჩემპიონები რომ ხდებოდნენ, მთელი საქართველო ზეიმობდა, ამ გოგონას კი სახეზეც ვერ ცნობენ. ვიღაც ერთკვირიანი „ვარსკვლავებ" უფრო გვაინტერესებს.ვულოცავ ნანას! ამ პატარა საქართველოს უკვე მესამე მსოფლიოს ჩემპიონი ქალი ყავს ჭადრაკში.
მსგავსი ამბები
რუბრიკის სხვა სიახლეები
;