ნაწილი II: ოცნების გუნდის დაცემის ისტორია - Dream Team-ის უძლეველობის მითი

ამერიკის შეერთებული შტატების საკალათბურთო ნაკრები 2006 წლიდან მოყოლებული არ მარცხდება დიდ ტურნირებზე - ამ დროის განმავლობაში, მან მოიგო სამი ოლიმპიადა და მსოფლიოს ორი ჩემპიონატი.

ქვეყნის კალათბურთის ფედერაცია დიდ ყურადღებას ანიჭებს ეროვნული გუნდის შემადგენლობის დაკომპლექტებას, რადგან ორიათასიანებში დაიმსხვრა „დრიმ თიმის“ უძლეველობის მითი, რომელიც 1992 წელს ჩამოყალიბდა. აშშ-მ ზედიზედ სამი დიდი ტურნირი წააგო. დღეს სწორედ ოცნების გუნდის დაცემის ისტორიას გავიხსენებთ...

მსოფლიო ჩემპიონატი-2002
ინდიანაპოლისი, აშშ

VI ადგილი
ფორვარდები: ელტონ ბრენდი, რაფ ლაფრენცი, შონ მერიონი, პოლ პირსი, ჯერმეინ ო’ნილი; ცენტრები: ანტონიო დევისი, ბენ უოლასი; მცველები: რეჯი მილერი, ბაირონ დევისი, მაიკლ ფინლი, ანდრე მილერი, ჯეი უილიამსი.
მთავარი მწვრთნელი: ჯორჯ კარლი; მწვრთნელები: გრეგ პოპოვიჩი, მაიკ მონტგომერი, კელვინ სემპსონი.
I ჯგუფური ტურნირი: ალჟირი - 110:60, გერმანია - 104:87, ჩინეთი - 84:65.
II ჯგუფური ტურნირი: რუსეთი - 106:82, ახალი ზელანდია - 110:62, არგენტინა - 80:87.
ფლეი ოფი: იუგოსლავია (1/4 ფინალი) - 78:81, პუერტო რიკო (5-8 ადგილი) - 84:74, ესპანეთი (მე-5 ადგილისთვის) - 76:81.
სულ: 6 მოგება - 3 წაგება, საშ.სხვაობა - 92,4-75,4 (+17,0).
ლიდერები: ქულა - პირსი (19,8), მოხსნა - უოლასი (6,8), გადაცემა - ა.მილერი (4,1), ჩაჭრა - დევისი (1,6), დაფარება - უოლასი (1,7).

საშინაო მსოფლიო ჩემპიონატის წინ, NBA-ის სუპერვარსკვლავთა უმეტესობამ ნაკრებში თამაშზე უარი განაცხადა. შეიძლება ითქვას, რომ ინდიანაპოლისში, პირველად Dream Team-ის ისტორიაში ამერიკის მეორე ნაკრები იყო წარმოდგენილი, რომლის რიგებშიც პოლ პირსი და ჯერმეინ ო’ნილი გამოირჩეოდნენ.

2002 წლის მსოფლიო ჩემპიონატზე ამერიკელებმა სრული კრახი განიცადეს. თავიდან მათ პირწმინდად წააგეს ჯგუფში არგენტინასთან (მატჩის მსვლელობისას 19 ქულასაც აგებდნენ), მეოთხედფინალში იუგოსლავიას დანებდნენ, ბოლოს კი სამარცხვინოდ წააგეს მეხუთე ადგილისთვის მატჩი ესპანეთის ნაკრებთან. Dream Team-ის უძლეველობის მითი საბოლოოდ იქნა დამსხვრეული.

ოლიმპიადა-2004
ათენი, საბერძნეთი

III ადგილი
ფორვარდები: შონ მერიონი, კარმელო ენტონი, კარლოს ბუზერი, რიჩარდ ჯეფერსონი, ლამარ ოდომი, ამარე სტაუდმაიერი; ცენტრები: ტიმ დანკანი, ემეკა ოკაფორი; მცველები: ალენ აივერსონი, ლებრონ ჯეიმსი, სტეფონ მარბერი, დუეინ უეიდი.
მთავარი მწვრთნელი: ლარი ბრაუნი; მწვრთნელები: გრეგ პოპოვიჩი, ოლივერ პერნელი, როი უილიამსი.
ჯგუფური ტურნირი: პუერტო რიკო - 73:92, საბერძნეთი - 77:71, ავსტრალია - 89:79, ლიტვა - 90:94, ანგოლა - 89:53.
ფლეი ოფი: ესპანეთი (1/4 ფინალი) - 102:94, არგენტინა (1/2 ფინალი) - 81:89, ლიტვა (მე-3 ადგილისთვის) - 104:96.
სულ: 5 მოგება - 3 წაგება, საშ.სხვაობა - 88,1-83,5 (+4,6).
ლიდერები: ქულა - აივერსონი (13,8), მოხსნა - დანკანი (9,1), გადაცემა - მარბერი (3,4), ჩაჭრა - უეიდი (2,1), დაფარება - დანკანი (1,3).

მიუხედავად ინდიანაპოლისში სამარცხვინო ჩავარდნისა, ორი წლის შემდეგ ოლიმპიადაზე თამაშზე უარი განაცხადეს შაკილ ო’ნილმა, კობი ბრაიანტმა, კევინ გარნეტმა და სხვა ვარსკვლავებმა. ათენში, Dream Team-ის ისტორიაში, ალბათ, ყველაზე სუსტი ნაკრები გაემგზავრა.
ოლიმპიადის წინ, ამ გუნდმა რამდენიმე ამხანაგური მატჩის წაგება მოასწრო, ათენის ოლიმპიადა კი, პუერტო რიკოსთან სამარცხვინო დამარცხებით დაიწყო (-19 ქულა). მიუხედავად ამისა, ამერიკელებმა ნახევარფინალამდე მიაღწიეს, სადაც, პირველად ისტორიაში, ბუკმეიკერთა პროგნოზით მატჩის აუტსაიდერებად ითვლებოდნენ. და მართლაც, იმ მატჩში Dream Team არა აშშ-ის, არამედ არგენტინის ნაკრებს უფრო ეთქმოდა. და ასე იყო პირველიდან ბოლო წუთამდე.

მსოფლიო ჩემპიონატი-2006
საიტამა, საპორო, სენდაი,
ჰამამაცუ, ჰიროშიმა, იაპონია

III ადგილი
ფორვარდები: ელტონ ბრენდი, კარმელო ენტონი, ლებრონ ჯეიმსი, შეინ ბატიერი, ანტუან ჯეიმისონი; ცენტრები: ბრედ მილერი, კრის ბოში, დუაიტ ჰოვარდი; მცველები: დუეინ უეიდი, ჯო ჯონსონი, კირკ ჰინრიხი, კრის პოლი.
მთავარი მწვრთნელი: მაიკ კრჟიჟევსკი; მწვრთნელები: მაიკ დ’ანტონი, ნეიტ მაკმილანი, ჯიმ ბოუჰაიმი.
ჯგუფური ტურნირი: პუერტო რიკო - 111:100, ჩინეთი - 121:90, სლოვენია - 114:95, იტალია - 94:85, სენეგალი - 103:58.
ფლეი ოფი: ავსტრალია (1/8 ფინალი) - 113:73, გერმანია (1/4 ფინალი) - 85:65, საბერძნეთი (1/2 ფინალი) - 95:101, არგენტინა (მე-3 ადგილისთვის) - 96:81.
სულ: 8 მოგება - 1 წაგება, საშ.სხვაობა - 103,6-83,1 (+20,5).
ლიდერები: ქულა - ენტონი (19,9), მოხსნა - ჯეიმსი (4,8), გადაცემა - პოლი (4,9), ჩაჭრა - ენტონი, პოლი (1,9), დაფარება - ჰოვარდი (1,3).

იაპონიაში ამერიკა უკეთ გამოიყურებოდა, ვიდრე ათენში. შეიძლება ითქვას, რომ მთელ ტურნირზე ამერიკამ ერთი მატჩი ჩააგდო - ნახევარფინალში საბერძნეთთან. მაგრამ, მიუხედავად შესამჩნევი საორგანიზაციო ცვლილებებისა (პირველად პროფესიონალების მწვრთნელი არა NBA-დან, არამედ NCAA-დან იყო; ასევე პირველად, გუნდის შემადგენლობა საწვრთნელი შეკრების დროს დადგინდა. ეს შეკრება ჩვეულებრივზე დიდხანს - ერთი თვე გაგრძელდა), Dream Team-ის მთავარი პრობლემა ტრადიციული იყო: სუსტი სათამაშო დისციპლინა, შეზღუდული ტაქტიკური შესაძლებლობები და მაღალკვალიფიციური ცენტრალური თავდამსხმელების დეფიციტი.

სულ: 58 მატჩი, 51 მოგება - 7 წაგება, საშ.სხვაობა - 102,5-77,4 (+25,1).
ყველაზე დიდი ანგარიშით მოგება: +68 (116:48 ანგოლასთან, 1992)
ყველაზე დიდი ანგარიშით წაგება: -19 (73:92 პუერტო რიკოსთან, 2004)

ნაწილი I: ოცნების გუნდის დაცემის ისტორია

ყოველდღიური სპორტული გაზეთი "ლელო"
837
მკითხველის კომენტარები / 0 /
მსგავსი ამბები
;